16.24C Vancouver 16.24C VancouverMay 13, 2025 1:01 PM - The Canadian Press
ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਮਿਡਲ ਈਸਟ ਦੇ 4 ਦਿਨਾਂ ਦੌਰੇ ਦੇ ਪਹਿਲੇ ਦਿਨ ਅੱਜ ਸਾਊਦੀ ਅਰਬ ਪਹੁੰਚੇ,ਜਿੱਥੇ ਰਿਆਦ ਵਿਚ ਕ੍ਰਾਊਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਨੇ ਉਨ੍ਹਾਂ ਦਾ ਸ਼ਾਹੀ ਸਵਾਗਤ ਕੀਤਾ। ਟਰੰਪ ਦਾ ਇਹ ਆਪਣੇ ਦੂਜੇ ਕਾਰਜਕਾਲ ਦਾ ਪਹਿਲਾ ਵੱਡਾ ਡਿਪਲੋਮੈਟਿਕ ਦੌਰਾ ਹੈ,ਉਨ੍ਹਾਂ ਦੇ ਨਾਲ ਈਲੋਨ ਮਸਕ ਅਤੇ ਹੋਰ ਵੀਆਈਪੀਜ਼ ਵੀ ਹਨ।
ਟਰੰਪ ਵਲੋਂ ਇਸ ਦੌਰੇ ਦੌਰਾਨ ਅਰਬਾਂ ਡਾਲਰ ਦੇ ਅਮਰੀਕੀ ਨਿਵੇਸ਼ ਅਤੇ ਰੱਖਿਆ ਸੌਦਿਆਂ 'ਤੇ ਦਸਤਖਤ ਕਰਨ ਅਤੇ ਗਾਜ਼ਾ ਵਿਚ ਇਜ਼ਰਾਈਲ ਦੀ ਜੰਗ ਸਮੇਤ ਹੋਰ ਖੇਤਰੀ ਵਿਵਾਦਾਂ 'ਤੇ ਚਰਚਾ ਕਰਨ ਦੀ ਉਮੀਦ ਹੈ। ਉਹ 14 ਮਈ ਨੂੰ ਕਤਰ ਅਤੇ 15 ਮਈ ਨੂੰ ਯੂਏਈ ਦਾ ਵੀ ਦੌਰਾ ਕਰਨਗੇ।
ਗੌਰਤਲਬ ਹੈ ਕਿ ਅਮਰੀਕਾ ਵਿਚ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਕੈਨੇਡਾ-ਮੈਕਸੀਕੋ ਜਾਂ ਯੂਰਪੀ ਦੇਸ਼ ਦੀ ਯਾਤਰਾ ਕਰਨ ਦੀ ਪਰੰਪਰਾ ਹੈ, ਟਰੰਪ ਨੇ 2017 ਵਿਚ ਹੀ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਰਿਵਾਇਤ ਨੂੰ ਤੋੜ ਦਿੱਤਾ ਸੀ ਅਤੇ ਉਹ ਉਸ ਸਮੇਂ ਵੀ ਸਭ ਤੋਂ ਪਹਿਲਾਂ ਸਾਊਦੀ ਅਰਬ ਗਏ ਸਨ। ਪਿਛਲੇ ਰਾਸ਼ਟਰਪਤੀ ਜੋਅ ਬਾਈਡੇਨ ਆਪਣੇ ਪਹਿਲੇ ਦੌਰੇ 'ਤੇ ਬ੍ਰਿਟੇਨ ਗਏ ਸਨ।
