24.86C Vancouver 24.86C VancouverJun 12, 2020 5:43 PM -
ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਐਂਡਰੂ ਸ਼ੀਅਰ ਦਾ ਕਹਿਣਾ ਹੈ ਕਿ ਫ਼ੌਰਨ ਅਫ਼ੇਅਰਜ਼ ਮਿਨਿਸਟਰ ਫ੍ਰਾਂਸੂਆ ਫ਼ੀਲੀਪ ਸ਼ੈਂਪੇਨ ਵੱਲੋਂ ਬੈਂਕ ਔਫ ਚਾਈਨਾ ਤੋਂ ਲਈਆਂ ਗਈਆਂ ਦੋ ਮੋਰਗੇਜਾਂ ਬਾਰੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਉਹ ਆਪ ਸਫ਼ਾਈ ਪੇਸ਼ ਕਰਨ।
ਸ਼ੀਅਰ ਨੇ ਕਿਹਾ ਕਿ ਸ਼ੈਂਪੇਨ ਇਹ ਸਮਝਾਉਣ ਕਿ ਉਨ੍ਹਾਂ ਵੱਲੋਂ ਇੱਕ ਚੀਨੀ ਬੈਂਕ ਤੋਂ ਲਏ ਗਏ ਇਸ ਕਰਜ਼ੇ ਦਾ ਉਨ੍ਹਾਂ ਦੀ ਚੀਨ ਨਾਲ ਨਜਿੱਠਣ ਦੀ ਯੋਗਤਾ 'ਤੇ ਕਿਵੇਂ ਕੋਈ ਪ੍ਰਭਾਵ ਨਹੀਂ ਪਵੇਗਾ।
ਉਨ੍ਹਾਂ ਕਿਹਾ ਕਿ ਸ਼ੈਂਪੇਨ ਹਾਊਸ ਔਫ਼ ਕੌਮਨਜ਼ ਦੀ ਇੱਕ ਵਿਸ਼ੇਸ਼ ਕਮੇਟੀ ਸਾਹਮਣੇ ਪੇਸ਼ ਹੋਣ ਅਤੇ ਟਰੂਡੋ ਇਸ ਕਮੇਟੀ ਨੂੰ ਇਹ ਸਮਝਾਉਣ ਕਿ ਸ਼ੈਂਪੇਨ ਨੂੰ ਉਨ੍ਹਾਂ ਦੇ ਕਰਜ਼ੇ ਦੇ ਬਾਵਜੂਦ ਵਿਦੇਸ਼ ਮੰਤਰੀ ਵਜੋਂ ਕਿਉਂ ਨਿਯੁਕਤ ਕੀਤਾ ਗਿਆ।
ਸ਼ੀਅਰ ਦਾ ਮੰਨਣਾ ਹੈ ਕਿ ਕੈਨੇਡਾ ਅਤੇ ਚੀਨ ਵਿਚਕਾਰ ਮੌਜੂਦਾ ਤਣਾਅ ਦੇ ਚੱਲਦੇ ਚੀਨ, ਸ਼ੈਂਪੇਨ ਵੱਲੋਂ ਲੰਦਨ ਵਿੱਚ ਦੋ ਅਪਾਰਟਮੈਂਟਾਂ ਲਈ ਲਏ ਗਏ $1.7 ਮਿਲੀਅਨ ($1.2 ਮਿਲੀਅਨ ਦੀ ਮੌਜੂਦਾ ਦੇਣਦਾਰੀ) ਦੇ ਇਸ ਕਰਜ਼ੇ ਨੂੰ ਆਪਣੇ ਫ਼ਾਇਦੇ ਲਈ ਵਰਤ ਸਕਦਾ ਹੈ।
ਸ਼ੀਅਰ ਨੇ ਆਪਣਾ ਪੱਖ ਸਾਫ਼ ਕਰਨ ਲਈ ਚੀਨ ਵੱਲੋਂ ਦਿਸੰਬਰ 2018 ਵਿੱਚ ਦੋ ਕਨੇਡੀਅਨ ਨਾਗਰਿਕਾਂ ਨੂੰ ਗਿਰਫ਼ਤਾਰ ਕੀਤੇ ਜਾਣ ਦਾ ਜ਼ਿਕਰ ਕੀਤਾ ਅਤੇ ਕਿਹਾ ਕਿ ਪਰਸਨਲ ਪ੍ਰੋਟੈਕਟਿਵ ਇਕਵਿਪਮੈਂਟ ਲਈ ਕੈਨੇਡਾ ਅਜੇ ਵੀ ਚੀਨ 'ਤੇ ਨਿਰਭਰ ਕਰਦਾ ਹੈ।
ਲਿਬਰਲ ਸਰਕਾਰ ਦਾ ਕਹਿਣਾ ਹੈ ਕਿ ਸ਼ੈਂਪੇਨ, ਐਥਿਕਸ ਕਮਿਸ਼ਨਰ ਨੂੰ ਸਾਰੀ ਸਥਿਤੀ ਬਾਰੇ ਦੱਸ ਚੁੱਕੇ ਹਨ ਅਤੇ ਇਸ ਸੰਬੰਧ ਵਿੱਚ ਸਾਰੀ ਜਾਣਕਾਰੀ ਜਨਤਕ ਹੈ।
