ਹੜਤਾਲ ਦੇ ਮੱਦੇਨਜ਼ਰ ਐਲਬਰਟਾ ਸਰਕਾਰ ਨੇ ਜਾਰੀ ਕੀਤਾ ਔਨਲਾਈਨ ਪਾਠਕ੍ਰਮ

ਐਲਬਰਟਾ ਦੇ ਟੀਚਰਜ਼ ਸੋਮਵਾਰ ਤੋਂ ਹੜਤਾਲ 'ਤੇ ਜਾ ਰਹੇ ਹਨ। ਇਸ ਦੇ ਮੱਦੇ ਨਜ਼ਰ ਸੂਬਾ ਸਰਕਾਰ ਨੇ ਪ੍ਰਭਾਵਿਤ ਹੋਣ ਵਾਲੇ ਵਿਦਿਆਰਥੀਆਂ ਲਈ ਔਨਲਾਈਨ ਹੋਮ ਕਰਕਿਊਲਮ ਤਿਆਰ ਕਰ ਲਿਆ ਹੈ ।ਸੂਬੇ ਦੇ ਐਜੂਕੇਸ਼ਨ ਮੰਤਰੀ ਡੀਮੇਟ੍ਰੀਓਸ ਨਿਕੋਲਾਈਡਸ ਨੇ ਕਿਹਾ ਕਿ ਬੱਚਿਆਂ ਨੂੰ ਔਨਲਾਈਨ ਤਿਆਰੀ ਕਰਵਾਈ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਅਧਿਆਪਕਾਂ ਦੀ ਹੜਤਾਲ ਦੌਰਾਨ ਬੱਚਿਆਂ ਦੀ ਪੜ੍ਹਾਈ ਦਾ ਨੁਕਸਾਨ ਨਹੀਂ ਹੋਣਾ ਚਾਹੀਦਾ।

ਕਰੀਬ 51 ਹਜ਼ਾਰ ਅਧਿਆਪਕਾਂ ਦੀ ਹੜਤਾਲ ਨਾਲ ਸੂਬੇ ਦੇ 7 ਲੱਖ ਵਿਦਿਆਰਥੀ ਪ੍ਰਭਾਵਿਤ ਹੋਣਗੇ। ਇਸ ਹਫਤੇ ਦੇ ਸ਼ੁਰੂ ਵਿੱਚ ਐਲਬਰਟਾ ਟੀਚਰਜ਼ ਐਸੋਸੀਏਸ਼ਨ ਦੇ 90 ਫੀਸਦੀ ਅਧਿਆਪਕਾਂ ਨੇ ਸੂਬੇ ਵੱਲੋਂ ਪੇਸ਼ ਕੀਤੇ ਸਮਝੌਤੇ ਦੇ ਪ੍ਰਸਤਾਵ ਨੂੰ ਅਸਵੀਕਾਰ ਕਰ ਦਿੱਤਾ ਹੈ। ਟੀਚਰਜ਼ ਛੇ ਅਕਤੂਬਰ ਤੋਂ ਹੜਤਾਲ ਕਰਨ ਲਈ ਤਿਆਰ ਹਨ, ਹਾਲਾਂਕਿ ਸੂਬੇ ਦੀ ਵਿਰੋਧੀ ਧਿਰ ਅਤੇ ਕੁਝ ਹੋਰ ਐਸੋਸੀਏਸ਼ਨਜ਼ ਸਰਕਾਰ ਨੂੰ ਹੜਤਾਲ ਰੋਕਣ ਲਈ ਚੰਗੀ ਡੀਲ ਦੀ ਪੇਸ਼ਕਸ਼ ਕਰਨ ਦਾ ਦਬਾਅ ਪਾ ਰਹੇ ਹਨ।

ਦੱਸ ਦੇਈਏ ਕਿ ਸੂਬੇ ਦੇ ਅਧਿਆਪਕ ਚੰਗੀ ਤਨਖਾਹ ਅਤੇ ਕਲਾਸ ਰੂਮਜ਼ ਵਿਚ ਵਿਦਿਆਰਥੀਆਂ ਦੀ ਵੱਧ ਰਹੀ ਗਿਣਤੀ ਦਾ ਜਲਦੀ ਹੱਲ ਕਰਨ ਦੀ ਮੰਗ ਕਰ ਰਹੇ ਹਨ।ਯੂਨੀਅਨ ਮੁਖੀ ਜੇਸਨ ਸ਼ਿਲਿੰਗ ਨੇ ਕਿਹਾ ਕਿ ਅਧਿਆਪਕ ਜਾਣਦੇ ਹਨ ਕਿ ਬੱਚਿਆਂ ਦੇ ਮਾਪਿਆਂ ਨੂੰ ਪਰੇਸ਼ਾਨੀ ਝੱਲਣੀ ਪੈ ਸਕਦੀ ਹੈ ਪਰ ਉਹ ਵਿਦਿਆਰਥੀਆਂ ਦੇ ਨਾਲ ਖੜ੍ਹੇ ਹਨ।