10.94C Vancouver 10.94C VancouverFeb 13, 2021 9:38 PM -
ਅਮਰੀਕੀ ਸੈਨੇਟ ਨੇ ਡੌਨਲਡ ਟ੍ਰੰਪ ਨੂੰ 6 ਜਨਵਰੀ ਨੂੰ ਕੈਪੀਟਲ ਹਿੱਲ ’ਤੇ ਹੋਏ ਹਮਲੇ ਦੇ ਦੋਸ਼ ’ਚੋਂ ਬਰੀ ਕਰ ਦਿੱਤਾ ਹੈ।
ਇਸ ਦੇ ਨਾਲ ਹੀ ਸਾਬਕਾ ਰਾਸ਼ਟਰਪਤੀ ਟ੍ਰੰਪ ਨੂੰ ਇਮਪੀਚਮੈਂਟ ਦੇ ਮੁਕੱਦਮਿਆਂ ਵਿੱਚ ਦੂਸਰੀ ਵਾਰ ਇਤਿਹਾਸਕ ਜਿੱਤ ਹਾਸਲ ਹੋਈ ਹੈ।
ਟ੍ਰੰਪ ਨੂੰ ਦੋਸ਼ੀ ਕਰਾਰ ਦੇਣ ਲਈ ਸੈਨੇਟ ਵਿੱਚ 100 ਵਿੱਚੋਂ 67 ਵੋਟਾਂ ਦੀ ਲੋੜ ਸੀ, ਪਰ ਕੇਵਲ 57 ਸੈਨੇਟਰਾਂ ਨੇ ਹੀ ਟ੍ਰੰਪ ਦੇ ਖ਼ਿਲਾਫ਼ ਵੋਟ ਦਰਜ ਕਰਵਾਈ।
ਅਮਰੀਕੀ ਸੈਨੇਟ ਵਿੱਚ ਟ੍ਰੰਪ ਦੀ ਰਿਪਬਲਿਕਨ ਪਾਰਟੀ ਕੋਲ 50 ਸੀਟਾਂ ਹਨ, ਜਿਸ ਦਾ ਅਰਥ ਇਹ ਹੈ ਕਿ 7 ਰਿਪਬਲਿਕਨ ਸੈਨੇਟਰਾਂ ਨੇ ਵੀ ਟ੍ਰੰਪ ਦੇ ਖਿਲਾਫ ਵੋਟ ਪਾਈ ਹੈ। ਪਰ ਟ੍ਰੰਪ ਨੂੰ ‘ਕਨਵਿਕਟ’ ਕਰਨ ਲਈ ਇਹ ਨਾਕਾਫ਼ੀ ਸੀ।
ਡੇਮੋਕ੍ਰੈਟਿਕ ਪਾਰਟੀ ਦਾ ਇਹ ਕਹਿਣਾ ਸੀ ਕਿ ਡੌਨਲਡ ਟ੍ਰੰਪ ਨੇ ਕਈ ਮਹੀਨਿਆਂ ਤੱਕ ਇਹ ਰਾਗ ਅਲਾਪਿਆ ਕਿ ਚੋਣਾਂ ਵਿੱਚ ਧਾਂਦਲੀ ਕਰ ਕੇ ਉਹਨਾਂ ਕੋਲੋਂ ਜਿੱਤ ਚੋਰੀ ਕੀਤੀ ਗਈ, ਅਤੇ ਅਜਿਹਾ ਕਰ ਕੇ ਉਹਨਾਂ ਆਪਣੇ ਸਮਰਥਕਾਂ ਨੂੰ ਲੜ ਕੇ ਆਪਣੀ ਜਿੱਤ ਨੂੰ ਹਾਸਲ ਕਰਨ ਲਈ ਉਕਸਾਇਆ, ਜਿਸ ਕਰਕੇ ਕੈਪੀਟਲ ਹਿੱਲ ’ਤੇ ਹਮਲਾ ਹੋਇਆ।
ਟ੍ਰੰਪ ਦੇ ਵਕੀਲਾਂ ਦੀ ਦਲੀਲ ਸੀ ਕਿ ਇਹ ਮੁਕੱਦਮਾ ਟ੍ਰੰਪ ਪ੍ਰਤੀ ਡੈਮੋਕਰੈਟਿਕ ਪਾਰਟੀ ਦੀ ਨਫਰਤ ਦਾ ਨਤੀਜਾ ਹੈ, ਅਤੇ ਇਹ ਗੈਰ-ਸੰਵਿਧਾਨਿਕ ਹੈ ਕਿਉਂਕਿ ਟ੍ਰੰਪ ਪਹਿਲਾਂ ਹੀ ਆਪਣੀ ਅਹੁਦੇ ਤੋਂ ਲਾਂਬੇ ਹੋ ਚੁੱਕੇ ਹਨ।
ਟ੍ਰੰਪ ਦੇ ਅਹੁਦੇ ਤੋਂ ਹੱਟਣ ਤੋਂ ਪਹਿਲਾਂ, ਹਾਊਸ ਵਿਚ ਉਹਨਾਂ ਨੂੰ ਦੂਜੀ ਵਾਰ ‘ਇਮਪੀਚ’ ਕੀਤਾ ਗਿਆ ਸੀ। ਉਹਨਾਂ ਉੱਤੇ ਕੈਪੀਟਲ ਹਿੱਲ ’ਤੇ 6 ਜਨਵਰੀ ਨੂੰ ਹੋਈ ਹਿੰਸਾ ਨੂੰ ਭੜਕਾਉਣ ਦਾ ਦੋਸ਼ ਲਗਾਇਆ ਗਿਆ ਸੀ। ਇਸ ਹਿੰਸਾ ਵਿੱਚ 5 ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ।
