15.92C Vancouver 15.92C VancouverNov 14, 2023 6:31 PM -
ਵੈਨਕੂਵਰ ਪੁਲਿਸ ਨੇ ਹਾਈ ਰਿਸਕ ਸੈਕਸ ਅਪਰਾਧੀ ਰੈਂਡਲ ਹੋਪਲੇ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਪੁਲਿਸ ਲਗਭਗ 10 ਦਿਨਾਂ ਤੋਂ ਉਸ ਦੀ ਭਾਲ ਕਰ ਰਹੀ ਸੀ।
ਪੁਲਿਸ ਵਿਭਾਗ ਨੇ ਮੀਡੀਆ ਰੀਲੀਜ਼ ਵਿੱਚ ਦੱਸਿਆ ਕਿ ਹੋਪਲੇ ਨੂੰ ਡਾਊਨਟਾਊਨ ਈਸਟਸਾਈਡ ਤੋਂ ਹਿਰਾਸਤ ਵਿੱਚ ਲਿਆ ਗਿਆ।
ਕੋਰਟ ਵਿੱਚ ਪੇਸ਼ੀ ਤੋਂ ਪਹਿਲਾਂ ਉਹ 4 ਨਵੰਬਰ ਨੂੰ ਨਿਗਰਾਨੀ ਵਾਲਾ ਬ੍ਰੈਸਲੇਟ ਕੱਟ ਕੇ ਫਰਾਰ ਹੋ ਗਿਆ ਸੀ। ਉਸ ਨੂੰ ਫੜਨ ਲਈ ਕੈਨੇਡਾ-ਵਿਆਪੀ ਵਾਰੰਟ ਜਾਰੀ ਕੀਤੇ ਗਏ ਸਨ।
ਵੈਨਕੂਵਰ ਪੁਲਿਸ ਮੁਤਾਬਕ ਹੋਪਲੇ ਨੇ ਪਿਛਲੇ ਸਮੇਂ ਵਿੱਚ ਬੱਚਿਆਂ ਵਿਰੁੱਧ ਜਿਨਸੀ ਸੁਭਾਅ ਦੇ ਤਿੰਨ ਅਪਰਾਧ ਕੀਤੇ ਹਨ।
ਹੋਪਲੇ ਨੇ 2011 ਵਿੱਚ ਸਪਾਰਵੁੱਡ ਵਿੱਚ ਇੱਕ ਘਰੋਂ 3 ਸਾਲਾ ਬੱਚੇ ਨੂੰ ਸੁੱਤੇ ਹੋਏ ਅਗਵਾ ਕਰ ਲਿਆ ਸੀ।
ਉਸ 'ਤੇ ਜਿਨਸੀ ਅਪਰਾਧ, ਹਮਲੇ ਅਤੇ ਜਾਇਦਾਦ ਦੇ ਅਪਰਾਧ ਦੇ ਦੋਸ਼ ਹਨ। 58 ਸਾਲਾ ਹੋਪਲੇ ਨਿਗਰਾਨੀ ਆਰਡਰ ਦੀ ਉਲੰਘਣਾ ਦੇ ਦੋਸ਼ ਵਿੱਚ ਦੋ ਚਾਰਜਿਜ਼ ਦਾ ਸਾਹਮਣਾ ਕਰ ਰਿਹਾ ਸੀ ਅਤੇ 6 ਨਵੰਬਰ ਨੂੰ ਉਸ ਨੇ ਕੋਰਟ ਵਿੱਚ ਪੇਸ਼ ਹੋਣਾ ਸੀ।
ਹੋਪਲੇ ਨੂੰ ਬੱਚਿਆਂ ਤੋਂ ਦੂਰੀ ਬਣਾ ਕੇ ਰੱਖਣ ਦੇ ਹੁਕਮ ਸਨ ਪਰ ਉਸ ਨੂੰ ਬੱਚਿਆਂ ਦੇ ਨੇੜੇ ਪਬਲਿਕ ਲਾਇਬ੍ਰੇਰੀ ਕੰਪਿਊਟਰ ਵਰਤਦਿਆਂ ਦੇਖਿਆ ਗਿਆ ਅਤੇ ਜਨਵਰੀ ਵਿੱਚ ਨੈਸ਼ਨਲ ਪੈਰੋਲ ਬੋਰਡ ਨੇ ਅਟਾਰਨੀ ਜਨਰਲ ਨੂੰ ਸਿਫਾਰਿਸ਼ ਕੀਤੀ ਸੀ ਕਿ ਹੋਪਲੇ ਨੂੰ ਕਾਨੂੰਨ ਦੀ ਪਾਲਣਾ ਨਾ ਕਰਨ ਦੇ ਦੋਸ਼ ਵਿੱਚ ਅਪਰਾਧਿਕ ਤੌਰ 'ਤੇ ਚਾਰਜਿਡ ਕੀਤਾ ਜਾਵੇ।
