ਸਰੀ 'ਚ ਕੈਪਸ ਕੈਫੇ 'ਤੇ ਚੱਲੀਆਂ ਗੋਲੀਆਂ

ਸਰੀ ਵਿੱਚ ਕੁਝ ਹੀ ਦਿਨ ਪਹਿਲਾਂ ਖੋਲ੍ਹੇ ਗਏ ਕੈਪਸ ਕੈਫੇ 'ਤੇ ਗੋਲੀਆਂ ਚਲਾਈਆਂ ਗਈਆਂ ਹਨ। ਵਾਰਦਾਤ ਨੂੰ ਤੜਕੇ ਕਰੀਬ 1 ਵੱਜ ਕੇ 50 ਮਿੰਟ 'ਤੇ ਅੰਜਾਮ ਦਿੱਤਾ ਗਿਆ। 84 ਐਵੀਨਿਊ ਅਤੇ 120 ਸਟ੍ਰੀਟ ਕੋਲ ਸਥਿਤ ਇਹ ਕੈਫੇ ਹਿੰਦੀ ਫਿਲਮ ਇੰਡਸਟਰੀ ਅਤੇ ਸਟੈਂਡ ਅਪ ਕਾਮੇਡੀ ਦੀ ਦੁਨੀਆ ਦੀ ਨਾਮੀ ਸ਼ਖ਼ਸੀਅਤ ਕਪਿਲ ਸ਼ਰਮਾ ਅਤੇ ਉਨ੍ਹਾਂ ਦੀ ਪਤਨੀ ਗਿਨੀ ਦਾ ਹੈ।

ਇਸ ਵੀਕਐਂਡ ਦੌਰਾਨ ਕੈਫੇ ਦਾ ਸੌਫਟ-ਲਾਂਚ ਹੋਇਆ ਸੀ ਅਤੇ ਇਸ ਦੀ ਲਾਂਚਿੰਗ ਸੰਬੰਧੀ ਕਿਸੇ ਵੱਡੀ ਸਮਾਗਮ ਦਾ ਪ੍ਰਬੰਧ ਕਰਨ ਬਾਰੇ ਫਿਲਹਾਲ ਕਿਸੇ ਮਿਤੀ ਦਾ ਐਲਾਨ ਨਹੀਂ ਕੀਤਾ ਗਿਆ ਸੀ।

ਕਨੈਕਟ ਐਫ.ਐਮ. ਦੀ ਟੀਮ ਨੇ ਮੌਕੇ ਦਾ ਜਾਇਜ਼ਾ ਕੀਤਾ ਤਾਂ ਕੈਫੇ ਦੇ ਇੱਕ ਪਾਸੇ ਘਟੋ-ਘੱਟ 10 ਗੋਲੀਆਂ ਦੇ ਨਿਸ਼ਾਨ ਮਿਲੇ। ਇਨ੍ਹਾਂ 'ਤੇ ਪੁਲਿਸ ਦੀ ਮਾਰਕਿੰਗ ਵੀ ਵੇਖੀ ਜਾ ਸਕਦੀ ਸੀ। ਇਸ ਤੋਂ ਇਲਾਵਾ ਇੱਕ ਪਾਸੇ ਦਾ ਕੱਚ ਟੁੱਟ ਕੇ ਸਟ੍ਰੀਟ ਕਿਨਾਰੇ ਖਿੰਡ ਗਿਆ ਸੀ, ਪਰ ਇਸ ਹਿੱਸੇ 'ਚ ਕਿੰਨੀਆਂ ਗੋਲੀਆਂ ਚੱਲੀਆਂ, ਇਹ ਅੰਦਾਜ਼ਾ ਲਗਾਉਣਾ ਮੁਸ਼ਕਿਲ ਸੀ।

ਪੁਲਿਸ ਅਨੁਸਾਰ ਘਟਨਾ 'ਚ ਕਿਸੇ ਦੇ ਜ਼ਖਮੀ ਹੋਣ ਤੋਂ ਬਚਾਅ ਰਿਹਾ। ਕਨੈਕਟ ਐਫ.ਐਮ. ਨਾਲ ਗੱਲਬਾਤ ਕਰਦਿਆਂ ਇਲਾਕੇ ਦੇ ਰਹਿਣ ਵਾਲੇ ਇੱਕ ਬਜ਼ੁਰਗ ਦਾ ਕਹਿਣਾ ਸੀ ਕਿ ਅਜਿਹੀਆਂ ਵਾਰਦਾਤਾਂ ਵਧਦੀਆਂ ਜਾ ਰਹੀਆਂ ਹਨ।

ਇਸ ਵਪਾਰ ਦੇ ਉੱਪਰ ਵਾਲੇ ਹਿੱਸੇ 'ਚ ਬਣੇ ਅਪਾਰਟਮੈਂਟਸ ਵਿੱਚੋਂ ਇੱਕ ਔਰਤ ਦਾ ਕਨੈਕਟ ਐਫ.ਐਮ. ਨਾਲ ਬਿਨਾ ਪਛਾਣ ਸਾਂਝੀ ਕੀਤੀਆਂ ਕਹਿਣਾ ਸੀ ਕਿ ਰਾਤ ਦੇ ਸਮੇਂ ਉਨ੍ਹਾਂ ਨੂੰ ਲੱਗਿਆ ਜਿਵੇ ਪਟਾਕੇ ਚਲਦੇ ਹੋਣ। ਉਧਰ ਘਟਨਾ ਵਾਲੀ ਜਗ੍ਹਾ ਕੋਲੋਂ ਆਪਣੇ ਨਨ੍ਹੇ ਪੁੱਤਰ ਨਾਲ ਵਾਕ ਕਰ ਕੇ ਲੰਘਦੀ ਇੱਕ ਮਾਂ ਦਾ ਕਹਿਣਾ ਸੀ ਕਿ ਉਹ ਖੁਦ ਆਪਣੀਆਂ ਭੈਣਾਂ ਨਾਲ ਇਸ ਕੈਫੇ 'ਤੇ ਆਉਣ ਦਾ ਵਿਚਾਰ ਕਰ ਰਹੀ ਸੀ। ਉਨ੍ਹਾਂ ਆਖਿਆ ਕਿ ਇੱਕ ਡੇਕੇਅਰ ਦੇ ਬਿਲਕੁਲ ਉਲਟ ਦਿਸ਼ਾ 'ਚ ਇਸ ਢੰਗ ਨਾਲ ਗੋਲੀ ਚੱਲਣਾ ਹੈਰਾਨੀਜਨਕ ਹੈ। ਉਨ੍ਹਾਂ ਆਖਿਆ ਕਿ ਸ਼ਹਿਰ 'ਚ ਸੁਰੱਖਿਆ ਸੰਬੰਧੀ ਸਥਿਤੀ ਡਰਾਉਣੀ ਹੈ।