27.88C Vancouver 27.88C VancouverAug 25, 2025 11:46 PM - Pervez Sandhu - Connect Newsroom
ਸਰੀ ਵਿੱਚ ਯੌਰਕ ਸੈਂਟਰ ਵਿਖੇ ਸਿੱਧੂ ਟਰੈਵਲਸ ਦੇ ਦਫ਼ਤਰ 'ਤੇ ਗੋਲੀ ਚੱਲਣ ਦੀ ਵਾਰਦਾਤ ਵਾਪਰੀ ਹੈ।
ਘਟਨਾ ਸੰਬੰਧੀ ਜਾਣਕਾਰੀ ਅੱਜ ਦੁਪਹਿਰ ਦੇ ਸਮੇਂ ਉਜਾਗਰ ਹੋਈ ਅਤੇ ਕਨੈਕਟ ਐਫ.ਐਮ. ਦੀ ਟੀਮ ਨੇ ਮੌਕੇ 'ਤੇ ਪਹੁੰਚ ਮੌਕਾ-ਏ-ਵਾਰਦਾਤ ਦਾ ਜਾਇਜ਼ਾ ਲਿਆ।
ਮੌਕੇ 'ਤੇ ਸਿੱਧੂ ਟਰੈਵਲਸ ਦੇ ਦਫ਼ਤਰ ਦੇ ਐਂਟਰੈਂਸ ਵਾਲੇ ਦਰਵਾਜ਼ੇ ਦਾ ਕੱਚ ਖਿੰਡਿਆ ਵਿਖਾਈ ਦਿੱਤਾ।
ਸਰੀ ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਉਨ੍ਹਾਂ ਕੋਲ ਅੱਜ ਸਵੇਰ ਕਰੀਬ ਸਾਡੇ 9 ਵਜੇ ਵਪਾਰ 'ਤੇ ਕਿਸੇ ਕਿਸਮ ਦੀ ਤੋੜਭੰਨ ਜਾਂ ਬ੍ਰੇਕ-ਇਨ ਦੀ ਕੋਸ਼ਿਸ਼ ਸੰਬੰਧੀ ਜਾਣਕਾਰੀ ਮਿਲੀ ਸੀ।
ਮੌਕੇ 'ਤੇ ਪੁਲਿਸ ਨੇ ਪਹੁੰਚੇ ਕੇ ਇੰਵੈਸਟੀਗੇਟ ਕੀਤਾ ਤਾਂ ਪਤਾ ਲੱਗਿਆ ਕਿ ਦਰਵਾਜ਼ੇ 'ਤੇ ਗੋਲੀਆਂ ਚੱਲੀਆਂ ਸਨ।
ਵਪਾਰ ਦੇ ਬਿਲਕੁਲ ਨੇੜੇ ਕੁਝ ਮਾਰਕਰ ਵੀ ਲਗਾਏ ਵਿਖਾਈ ਦਿੱਤੇ।
ਅਫਸਰਾਂ ਨੇ ਪੁਸ਼ਟੀ ਕੀਤੀ ਕਿ ਘਟਨਾ 'ਚ ਕਿਸੇ ਦੇ ਜਖਮੀ ਹੋਣ ਤੋਂ ਬਚਾਅ ਰਿਹਾ। Surrey Police Service Frontline Investigative Support (FLIS) Team ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਪੁਲਿਸ ਅਨੁਸਾਰ ਘਟਨਾ ਦੀ ਜਾਂਚ ਅਜੇ ਸ਼ੁਰੂਆਤੀ ਦੌਰ 'ਚ ਹੈ ਪਰ ਮਾਮਲਾ ਐਕਸਟੌਰਸ਼ਨ ਸੰਬੰਧੀ ਹੋਣ ਦਾ ਸ਼ੱਕ ਹੈ।
ਕੁਨੈਕਟ ਐਫ.ਐਮ. ਨੇ ਘਟਨਾ ਤੋਂ ਬਾਅਦ ਇਲਾਕੇ ਦੇ ਕੁਝ ਵਪਾਰਾਂ ਨਾਲ ਗੱਲ ਕੀਤੀ।
ਇਨ੍ਹਾਂ 'ਚ ਇੱਕ ਦਾ ਕਹਿਣਾ ਸੀ, "ਸਾਨੂੰ ਆਪਣੇ ਨਾਲ-ਨਾਲ ਵਪਾਰ ਦੇ ਐਂਪਲਾਈਸ ਦੀ ਸੁਰੱਖਿਆ ਦਾ ਫਿਕਰ ਹੈ, ਕਿਉਂਕਿ ਕਈ ਐਂਪਲਾਈਸ ਰਾਤ ਤਕ ਕੰਮ ਕਰਦੇ ਹਨ ਅਤੇ ਉਨ੍ਹਾਂ ਨੂੰ ਸਮਝਾਉਣਾ ਔਖਾ ਹੈ ਕਿ ਕੰਮ ਦੀ ਜਗ੍ਹਾ ਸੇਫ ਹੈ।"
ਉੱਧਰ ਇੱਕ ਹੋਰ ਵਪਾਰਿਕ ਓਨਰ ਨੂੰ ਅਸੀਂ ਪੁੱਛਿਆ ਕਿ ਕੀ ਅਜਿਹੇ ਮਾਹੌਲ 'ਚ ਉਨ੍ਹਾਂ ਨੂੰ ਡਰ ਮਹਿਸੂਸ ਹੁੰਦਾ ਹੈ, ਤਾਂ ਉਨ੍ਹਾਂ ਕਿਹਾ, "ਡਰ ਨਹੀਂ ਪਰ ਚਿੰਤਾ ਹੈ ਕਿ ਵਾਰਦਾਤਾਂ ਕਰਨ ਵਾਲੇ ਕਿਸੇ ਦੀ ਜਾਨ ਵੀ ਲੈ ਸਕਦੇ ਹਨ।"
