ਅਮਰੀਕੀ ਟੈਰਿਫ ਦੇ ਦਬਾਅ ਹੇਠ ਕੈਨੇਡਾ ਦੀ ਆਰਥਿਕਤਾ, ਚੌਥੇ ਕੁਆਰਟਰ ਵਿਚ ਜੀ.ਡੀ.ਪੀ. ਡਿੱਗਣ ਦੀ ਸੰਭਾਵਨਾ

ਕੈਨੇਡਾ ਦੀ ਆਰਥਿਕਤਾ ਵਿਚ ਗਿਰਾਵਟ ਦੇ ਸੰਕੇਤ ਮਿਲ ਰਹੇ ਹਨ। ਤਾਜ਼ਾ ਅੰਕੜਿਆਂ ਮੁਤਾਬਕ, 2025 ਦੇ ਚੌਥੇ ਯਾਨੀ ਫਾਈਨਲ ਕੁਆਰਟਰ ਵਿਚ ਦੇਸ਼ ਦੀ ਕੁੱਲ ਜੀ.ਡੀ.ਪੀ. ਡਿੱਗਣ ਦੀ ਸੰਭਾਵਨਾ ਹੈ। ਵਪਾਰ 'ਤੇ ਨਿਰਭਰ ਕੈਨੇਡੀਅਨ ਆਰਥਿਕਤਾ ਇਸ ਵੇਲੇ ਅਮਰੀਕੀ ਟੈਰਿਫ ਦੇ ਪ੍ਰਭਾਵਾਂ ਨਾਲ ਜੂਝ ਰਹੀ ਹੈ, ਜਿਸ ਕਾਰਨ ਜੀਡੀਪੀ ਰਫ਼ਤਾਰ ਪ੍ਰਭਾਵਿਤ ਹੋਈ ਹੈ।

ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਨਵੰਬਰ ਮਹੀਨੇ ਵਿਚ ਆਰਥਿਕ ਵਿਕਾਸ ਦਰ ਵਿਚ ਪੂਰੀ ਤਰ੍ਹਾਂ ਖੜੌਤ ਰਹੀ। ਅਕਤੂਬਰ ਵਿਚ ਦੇਖੀ ਗਈ 0.3 ਫੀਸਦੀ ਦੀ ਗਿਰਾਵਟ ਤੋਂ ਬਾਅਦ ਇਹ ਲਗਾਤਾਰ ਦੂਜਾ ਮਹੀਨਾ ਹੈ ਜਦੋਂ ਆਰਥਿਕਤਾ ਵਿਚ ਕੋਈ ਸੁਧਾਰ ਨਹੀਂ ਦੇਖਿਆ ਗਿਆ। ਟਰੰਪ ਵੱਲੋਂ ਸਟੀਲ, ਐਲੂਮੀਨੀਅਮ, ਲੱਕੜ ਅਤੇ ਆਟੋਮੋਟਿਵ ਸੈਕਟਰ 'ਤੇ ਲਗਾਏ ਗਏ ਟੈਰਿਫਸ ਨੇ ਕੈਨੇਡਾ ਦੇ ਐਕਸਪੋਰਟ ਨੂੰ ਪ੍ਰਭਾਵਿਤ ਕੀਤਾ ਹੈ।

ਚੌਥੇ ਕੁਆਰਟਰ ਵਿਚ 0.5 ਫੀਸਦੀ ਦੀ ਗਿਰਾਵਟ ਦਾ ਅੰਦਾਜ਼ਾ ਲਗਾਇਆ ਗਿਆ ਹੈ। ਜੋਖਮ ਵਾਲੀ ਗੱਲ ਇਹ ਹੈ ਕਿ ਜੇਕਰ ਆਰਥਿਕਤਾ ਲਗਾਤਾਰ ਦੋ ਕੁਆਰਟਰ ਵਿਚ ਗਿਰਾਵਟ ਦਰਜ ਕਰਦੀ ਹੈ ਤਾਂ ਕੈਨੇਡਾ ਟੈਕਨੀਕਲ ਰਸੈਸ਼ਨ ਦੇ ਘੇਰੇ ਵਿਚ ਆ ਸਕਦਾ ਹੈ।

ਸਟੈਟਕੈਨ ਵਲੋਂ ਸ਼ੁੱਕਰਵਾਰ ਨੂੰ ਜਾਰੀ ਰਿਪੋਰਟ ਮੁਤਾਬਕ, 2025 ਵਿਚ ਕੈਨੇਡਾ ਦੀ ਪੂਰੇ ਸਾਲ ਦੀ ਵਿਕਾਸ ਦਰ 1.3 ਫੀਸਦੀ ਰਹਿਣ ਦੀ ਉਮੀਦ ਹੈ। ਬੈਂਕ ਔਫ਼ ਕੈਨੇਡਾ ਵਲੋਂ ਇਸ ਹਫ਼ਤੇ ਦੇ ਸ਼ੁਰੂ ਵਿਚ ਜਾਰੀ ਅਨੁਮਾਨ ਮੁਤਾਬਕ 2026 ਵਿਚ ਆਰਥਿਕਤਾ ਵਿਚ ਮਾਮੂਲੀ ਸੁਧਾਰ ਹੋਵੇਗਾ।