ਐਡਮਿੰਟਨ ਦੇ ਲੇਡੁਕ ਨੇੜੇ ਹੋਏ ਕਤਲ ਮਾਮਲੇ ਦੀ ਵਰਲਡ ਸਿੱਖ ਆਰਗਨਾਈਜ਼ੇਸ਼ਨ ਨੇ ਕੀਤੀ ਜਾਂਚ ਦੀ ਮੰਗ

ਐਡਮਿੰਟਨ ਦੇ ਲੇਡੁਕ ਨੇੜੇ 22 ਸਾਲਾ ਸਿੱਖ ਨੌਜਵਾਨ ਬੀਰਇੰਦਰ ਸਿੰਘ ਦੇ ਹੋਏ ਕਤਲ ਦੇ ਮਾਮਲੇ ਵਿਚ ਵਰਲਡ ਸਿੱਖ ਆਰਗਨਾਈਜ਼ੇਸ਼ਨ ਔਫ ਕੈਨੇਡਾ ਨੇ ਇਸ ਦੀ ਜਾਂਚ ਸੰਭਾਵਿਤ ਹੇਟ ਕ੍ਰਾਈਮ ਦੇ ਪਹਿਲੂ ਤੋਂ ਕੀਤੇ ਜਾਣ ਦੀ ਮੰਗ ਕੀਤੀ ਹੈ। ਡਬਲਿਊ.ਐਸ.ਓ. ਦੇ ਪ੍ਰਧਾਨ ਦਾਨਿਸ਼ ਸਿੰਘ ਨੇ ਕਿਹਾ ਕਿ ਕੈਨੇਡਾ ਵਿਚ ਸਿੱਖਾਂ ਵਿਰੁੱਧ ਵੱਧ ਰਹੀ ਨਫ਼ਰਤ ਅਤੇ ਜ਼ਹਿਰੀਲੇ ਪ੍ਰਚਾਰ ਦੇ ਮੱਦੇਨਜ਼ਰ ਇਹ ਜਾਂਚ ਬਹੁਤ ਜ਼ਰੂਰੀ ਹੈ।

ਉਨ੍ਹਾਂ ਅਨੁਸਾਰ, ਭਾਰਤ ਤੋਂ ਚਲਾਈਆਂ ਜਾ ਰਹੀਆਂ ਕਥਿਤ ਗਲਤ ਜਾਣਕਾਰੀ ਮੁਹਿੰਮਾਂ ਕਾਰਨ ਕੈਨੇਡਾ ਵਿਚ ਸਿੱਖਾਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਡਬਲਿਊ.ਐਸ.ਓ. ਨੇ ਐਲਬਰਟਾ ਆਰ.ਸੀ.ਐਮ.ਪੀ. ਮੇਜਰ ਕ੍ਰਾਈਮ ਯੂਨਿਟ ਨੂੰ ਇਸ ਕਤਲ ਦੇ ਪਿੱਛੇ ਨਫ਼ਰਤੀ ਇਰਾਦਿਆਂ ਦੀ ਡੂੰਘਾਈ ਨਾਲ ਪੜਤਾਲ ਕਰਨ ਦੀ ਅਪੀਲ ਕੀਤੀ ਹੈ।

ਰਿਪੋਰਟਸ ਅਨੁਸਾਰ, ਬੀਰਇੰਦਰ ਸਿੰਘ 14 ਮਾਰਚ ਨੂੰ ਲੇਡੁਕ ਨੇੜੇ ਹਾਈਵੇ 2 'ਤੇ ਸਫ਼ਰ ਕਰ ਰਿਹਾ ਸੀ, ਜਦੋਂ ਇੱਕ ਪਿਕਅੱਪ ਟਰੱਕ ਵਿਚ ਸਵਾਰ ਵਿਅਕਤੀਆਂ ਨੇ ਉਸ ਦੀ ਗੱਡੀ 'ਤੇ ਬਿਨਾਂ ਕਿਸੇ ਉਕਸਾਵੇ ਦੇ ਗੋਲੀਆਂ ਚਲਾ ਦਿੱਤੀਆਂ, ਇਸ ਘਟਨਾ ਵਿਚ ਬੀਰਇੰਦਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਦਿਨ-ਦਿਹਾੜੇ ਹੋਈ ਇਸ ਵਾਰਦਾਤ ਵਿਚ ਪੁਲਿਸ ਅਜੇ ਤੱਕ ਕਿਸੇ ਸ਼ੱਕੀ ਜਾਂ ਉਦੇਸ਼ ਦੀ ਪਛਾਣ ਨਹੀਂ ਕਰ ਸਕੀ ਹੈ। ਬੀਰਇੰਦਰ ਸਿੰਘ ਤਿੰਨ ਸਾਲ ਪਹਿਲਾਂ ਭਾਰਤ ਤੋਂ ਕੈਨੇਡਾ ਆਇਆ ਸੀ।