ਸਮਿਥ ਨੇ ਐਲਬਰਟਾ ਵੱਖਵਾਦ ਰੈਫਰੈਂਡਮ ਸਵਾਲ ਸ਼ਾਮਲ ਕਰਨ ਦੇ ਫੈਸਲੇ ਦਾ ਕੀਤਾ ਬਚਾਅ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ 19 ਅਕਤੂਬਰ ਨੂੰ ਹੋਣ ਵਾਲੇ ਰੈਫਰੈਂਡਮ ਵਿੱਚ ਸੂਬੇ ਦੇ ਕੈਨੇਡਾ ਤੋਂ ਵੱਖ ਹੋਣ ਬਾਰੇ ਸਵਾਲ ਸ਼ਾਮਲ ਕਰਨ ਦੇ ਆਪਣੇ ਫੈਸਲੇ ਦਾ ਬਚਾਅ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਵੱਖਵਾਦੀ ਲਹਿਰ ਦੇ ਦਾਅਵਿਆਂ 'ਤੇ ਭਰੋਸਾ ਕਰਨ ਲਈ ਤਿਆਰ ਹਨ, ਹਾਲਾਂਕਿ ਇਸ ਪਟੀਸ਼ਨ ਦੇ ਦਸਤਖਤਾਂ ਦੀ ਅਜੇ ਤੱਕ ਕਾਨੂੰਨੀ ਤੌਰ 'ਤੇ ਪੁਸ਼ਟੀ ਨਹੀਂ ਹੋਈ। ਸਟੇਅ ਫ੍ਰੀ ਐਲਬਰਟਾ ਨਾਂ ਦੀ ਸੰਸਥਾ ਨੇ ਰੈਫਰੈਂਡਮ ਲਈ 300,000 ਤੋਂ ਵੱਧ ਦਸਤਖਤ ਇਕੱਠੇ ਕਰਨ ਦਾ ਦਾਅਵਾ ਕੀਤਾ ਹੈ।

ਦੂਜੇ ਪਾਸੇ, ਕੈਨੇਡਾ ਦੇ ਨਾਲ ਰਹਿਣ ਦੇ ਪੱਖ ਵਾਲੀ ਸੰਸਥਾ ਫਾਰਐਵਰ ਕੈਨੇਡੀਅਨ ਦੇ 400,000 ਦਸਤਖਤਾਂ ਦੀ ਪੁਸ਼ਟੀ ਹੋ ਚੁੱਕੀ ਹੈ।ਪ੍ਰੀਮੀਅਰ ਸਮਿਥ ਮੁਤਾਬਕ, ਅਦਾਲਤੀ ਕਾਰਵਾਈ ਕਾਰਨ 'ਇਲੈਕਸ਼ਨਜ਼ ਐਲਬਰਟਾ ' ਵੱਖਵਾਦੀ ਪਟੀਸ਼ਨ ਦੇ ਦਸਤਖਤਾਂ ਦੀ ਜਾਂਚ ਨਹੀਂ ਕਰ ਸਕੀ। ਪਰ ਕਿਉਂਕਿ ਨਿਯਮਾਂ ਮੁਤਾਬਕ ਸਿਰਫ 177,000 ਦਸਤਖਤਾਂ ਦੀ ਲੋੜ ਸੀ ਅਤੇ ਉਨ੍ਹਾਂ ਨੇ 300,000 ਜਮ੍ਹਾ ਕਰਵਾਏ ਹਨ, ਇਸ ਲਈ ਇਹ ਸਵਾਲ ਰੈਫਰੈਂਡਮ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।ਰਾਜਨੀਤਿਕ ਮਾਹਰਾਂ ਅਤੇ ਵਿਰੋਧੀ ਪਾਰਟੀਆਂ ਵੱਲੋਂ ਇਸ ਫੈਸਲੇ ਦੀ ਕਾਨੂੰਨੀ ਅਤੇ ਨੈਤਿਕ ਜਾਇਜ਼ਤਾ 'ਤੇ ਸਵਾਲ ਚੁੱਕੇ ਜਾ ਰਹੇ ਹਨ।