ਯੂ. ਸੀ. ਪੀ. ਲੀਡਰਸ਼ਿਪ ਡਿਬੇਟ 'ਚ ਘਿਰੀ ਡੈਨੀਅਲ ਸਮਿਥ ਨੂੰ ਮਾਹਰਾਂ ਨੇ ਮੰਨਿਆ ਫਰੰਟ-ਰਨਰ

ਯੂਨਾਈਟਿਡ ਕੰਜ਼ਰਵੇਟਿਵ ਲੀਡਰਸ਼ਿਪ ਰੇਸ ਦੀ ਇਸ ਹਫ਼ਤੇ ਦੀ ਬਹਿਸ ਨੂੰ ਲੈ ਕੇ ਰਾਜਨੀਤਿਕ ਮਾਹਰਾਂ ਨੇ ਵੱਡਾ ਅੰਦਾਜ਼ਾ ਪ੍ਰਗਟ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਾਬਕਾ ਵਾਈਲਡਰੋਜ਼ ਲੀਡਰ ਡੈਨੀਅਲ ਸਮਿਥ ਜੇਸਨ ਕੈਨੀ ਦੀ ਥਾਂ ਪਾਰਟੀ ਪ੍ਰਧਾਨ ਅਤੇ ਪ੍ਰੀਮੀਅਰ ਵਜੋਂ ਦੌੜ ਵਿਚ ਸਭ ਤੋਂ ਅੱਗੇ ਲੱਗ ਰਹੀ ਹੈ।

ਪੋਲਸਟਰ ਜੈਨੇਟ ਬ੍ਰਾਊਨ ਅਤੇ ਰਾਜਨੀਤਿਕ ਮਾਹਰ ਡੁਏਨ ਬ੍ਰੈਟ ਦਾ ਕਹਿਣਾ ਹੈ ਕਿ ਜਿਸ ਤਰ੍ਹਾਂ ਬਹਿਸ ਦੌਰਾਨ ਵਿਰੋਧੀਆਂ ਵੱਲੋਂ ਸਮਿਥ 'ਤੇ ਨਿਸ਼ਾਨੇ ਵਿੰਨੇ ਗਏ ਅਤੇ ਆਲੋਚਨਾ ਕੀਤੀ ਗਈ, ਇਸ ਤੋਂ ਸਪੱਸ਼ਟ ਹੈ ਕਿ ਵਿਰੋਧੀ ਉਸ ਤੋਂ ਹਾਰਨ ਦਾ ਖਦਸ਼ਾ ਮੰਨ ਰਹੇ ਹਨ।

ਬਹਿਸ ਦੌਰਾਨ ਸਮਿਥ ਦੀ ਉਸ ਦੇ ਪ੍ਰਸਤਾਵਿਤ ਐਲਬਰਟਾ ਸਾਵੇਰਨਿਟੀ ਐਕਟ ਨੂੰ ਲੈ ਕੇ ਆਲੋਚਨਾ ਕੀਤੀ ਗਈ। ਸਮਿਥ ਨੇ ਇਸ ਐਕਟ ਰਾਹੀਂ ਸੂਬੇ ਨੂੰ ਉਨ੍ਹਾਂ ਫੈਡਰਲ ਕਾਨੂੰਨਾਂ ਅਤੇ ਅਦਾਲਤੀ ਫ਼ੈਸਲਿਆਂ ਨੂੰ ਨਾ ਮੰਨਣ ਦੀ ਤਾਕਤ ਦੇਣ ਦੀ ਗੱਲ ਆਖ਼ੀ ਹੈ, ਜੋ ਸੂਬੇ ਦੇ ਹਿੱਤ ਵਿਚ ਨਹੀਂ ਹਨ।

ਡਿਬੇਟ ਵਿਚ ਟ੍ਰੈਵਿਸ ਟੋਜ਼ ਰੇਬੇਕਾ ਸ਼ੁਲਜ਼, ਰਾਜਨ ਸਾਹਨੀ ਅਤੇ ਬ੍ਰਾਇਨ ਜੀਨ ਨੇ ਇਸ ਪ੍ਰਸਤਾਵ ਨੂੰ ਗੈਰ-ਕਾਨੂੰਨੀ, ਲਾਗੂ ਨਾ ਕਰਨ ਯੋਗ ਅਤੇ ਆਰਥਿਕਤਾ ਲਈ ਘਾਤਕ ਕਰਾਰ ਦਿੱਤਾ ਸੀ। ਉੱਥੇ ਹੀ, ਸਮਿਥ ਦਾ ਕਹਿਣਾ ਹੈ ਕਿ ਐਲਬਰਟਾ ਦੇ ਆਰਥਿਕ ਵਿਕਾਸ ਨੂੰ ਕਮਜ਼ੋਰ ਕਰਨ ਵਾਲੀਆਂ ਫੈਡਰਲ ਨੀਤੀਆਂ 'ਤੇ ਓਟਾਵਾ ਦਾ ਧਿਆਨ ਖਿੱਚਣਾ ਅਤੇ ਇਸ ਵਿਚ ਇੱਕ ਲਾਈਨ ਖਿੱਚਣਾ ਜ਼ਰੂਰੀ ਹੈ।