ਉੱਤਰੀ-ਪੂਰਬੀ ਬੀ.ਸੀ.ਵਿੱਚ ਟੰਬਲਰ ਰਿਜ਼ ਨੇੜੇ ਬਰਫ਼ੀਲੇ ਤੂਫ਼ਾਨ ਵਿੱਚ ਸਨੋਮੋਬਾਈਲਰ ਦੀ ਮੌਤ

ਬੀ.ਸੀ. ਦੇ ਉੱਤਰ-ਪੂਰਬੀ ਹਿੱਸੇ ਵਿਚ ਰੌਕੀ ਮਾਊਨਟੇਨ ਤੋਂ ਇੱਕ ਬੁਰੀ ਖਬਰ ਸਾਹਮਣੇ ਆਈ ਹੈ, ਜਿੱਥੇ ਬਰਫ਼ਬਾਰੀ ਯਾਨੀ ਬਰਫ਼ ਦੇ ਤੋਦੇ ਡਿੱਗਣ ਕਾਰਨ ਇੱਕ ਸਨੋਮੋਬਾਈਲਰ ਦੀ ਮੌਤ ਹੋ ਗਈ। ਇਹ ਘਟਨਾ ਮੰਗਲਵਾਰ ਨੂੰ ਟੰਬਲਰ ਰਿਜ ਨੇੜੇ ਵਾਪਰੀ, ਜੋ ਕਿ ਇੱਕ ਮਸ਼ਹੂਰ ਪਹਾੜੀ ਇਲਾਕਾ ਹੈ।

ਐਵੇਲਾਂਚ ਕੈਨੇਡਾ ਮੁਤਾਬਕ,ਤਿੰਨ ਸਨੋਮੋਬਾਈਲਰ ਦਾ ਇੱਕ ਗਰੁੱਪ ਬੁਲਮੂਸ ਖੇਤਰ ਵਿਚ ਰਾਈਡਿੰਗ ਕਰ ਰਿਹਾ ਸੀ। ਇਸ ਦੌਰਾਨ ਪਹਾੜੀ ਦੇ ਹੇਠਲੇ ਹਿੱਸੇ ਤੋਂ ਅਚਾਨਕ ਐਵੇਲਾਂਚ ਟਰਿੱਗਰ ਹੋ ਗਿਆ ਯਾਨੀ ਬਰਫ਼ ਖਿਸਕ ਗਈ, ਜਿਸ ਵਿਚ ਇੱਕ ਰਾਈਡਰ ਪੂਰੀ ਤਰ੍ਹਾਂ ਹੇਠਾਂ ਦੱਬਿਆ ਗਿਆ। ​ਬਾਕੀ ਸਾਥੀਆਂ ਨੇ ਉਸ ਨੂੰ ਬਚਾਉਣ ਲਈ ਤੁਰੰਤ ਰੈਸਕਿਊ ਦੀ ਕੋਸ਼ਿਸ਼ ਕੀਤੀ ਪਰ ਬਦਕਿਸਮਤੀ ਨਾਲ ਉਸ ਦੀ ਜਾਨ ਨਹੀਂ ਬਚਾਈ ਜਾ ਸਕੀ।

ਐਵੇਲਾਂਚ ਕੈਨੇਡਾ ਨੇ ਦੱਸਿਆ ਕਿ ਉਸ ਇਲਾਕੇ ਵਿਚ ਬਰਫ਼ ਦੇ ਤੋਦੇ ਦਾ ਖਤਰਾ ਕਾਫੀ ਜ਼ਿਆਦਾ ਸੀ। ਇਸ ਦਾ ਮਤਲਬ ਹੈ ਕਿ ਕੁਦਰਤੀ ਤੌਰ 'ਤੇ ਜਾਂ ਇਨਸਾਨੀ ਗਲਤੀ ਨਾਲ ਬਰਫ਼ ਡਿੱਗਣ ਦੇ ਅਸਾਰ ਬਹੁਤ ਜ਼ਿਆਦਾ ਸਨ। ​ਅਧਿਕਾਰੀਆਂ ਨੇ ਪਹਾੜਾਂ ਵਿਚ ਜਾਣ ਵਾਲੇ ਲੋਕਾਂ ਨੂੰ ਸਾਵਧਾਨ ਰਹਿਣ ਅਤੇ ਪੂਰੀ ਸੁਰੱਖਿਆ ਗੇਅਰ ਨਾਲ ਹੀ ਬਾਹਰ ਜਾਣ ਦੀ ਸਲਾਹ ਦਿੱਤੀ ਹੈ।