16.91C Vancouver 16.91C VancouverJul 8, 2025 10:41 PM - Pervez Sandhu - Connect Newsroom
ਸਰੀ 'ਚ ਸੌਫਟਬਾਲ ਸਿਟੀ ਵਿਖੇ ਕੈਨੇਡਾ ਕੱਪ ਅੰਤਰਰਾਸ਼ਟਰੀ ਟੂਰਨਾਮੈਂਟ ਦੀ ਸ਼ੁਰੂਆਤ ਹੋ ਗਈ ਹੈ। ਇਹ ਕੈਨੇਡਾ ਕੱਪ ਦਾ 30ਵਾਂ ਐਡੀਸ਼ਨ ਹੈ ਅਤੇ ਅੱਜ ਸਰੀ 'ਚ ਟੀਮ ਕੈਨੇਡਾ ਦੇ ਦੋ ਮੁਕਾਬਲੇ ਵੇਖਣ ਨੂੰ ਮਿਲਣਗੇ।
ਕੈਨੇਡਾ ਦੀ ਔਰਤਾਂ ਦੀ ਟੀਮ ਅੱਜ ਪਹਿਲਾਂ ਨਿਊਜ਼ੀਲੈਂਡ ਨਾਲ ਸ਼ਾਮ 6 ਵਜੇ ਅਤੇ ਫਿਰ ਯੂਕਰੇਨ ਨਾਲ ਦੇਰ ਸ਼ਾਮ 8.30 ਵਜੇ ਟੱਕਰ ਲਵੇਗੀ। ਟੂਰਨਾਮੈਂਟ ਦਾ ਫਾਈਨਲ ਮੁਕਾਬਲਾ ਆਉਂਦੇ ਐਤਵਾਰ ਨੂੰ ਖੇਡਿਆ ਜਾਵੇਗਾ।
ਟੂਰਨਾਮੈਂਟ 'ਚ ਕਨੇਡੀਅਨ ਟੀਮ ਤੋਂ ਇਲਾਵਾ ਚੈਕੀਆ, ਗਰੀਸ, ਕਿੰਗਡਮ ਆਫ ਨੀਦਰਲੈਂਡਸ, ਇਜ਼ਰਾਈਲ, ਟ੍ਰਿਪਲ ਕਰਾਊਨ ਕੋਲਾਰਾਡੋ, ਟੀਮ ਬੀ.ਸੀ. ਆਦਿ ਜਿਹੀਆਂ ਮਜ਼ਬੂਤ ਟੀਮਾਂ ਵੀ ਹਿੱਸਾ ਲੈ ਰਹੀਆਂ ਹਨ।
ਅੱਜ ਟੀਮ ਕੈਨੇਡਾ ਵੱਲੋਂ ਸਵੇਰ ਦੇ ਸਮੇਂ ਮੀਡੀਆ ਨਾਲ ਗੱਲਬਾਤ ਕਰਨ ਲਈ ਵਿਸ਼ੇਸ਼ ਸਮਾਂ ਕੱਢਿਆ ਗਿਆ ਜਿਸ ਦੌਰਾਨ ਕਨੈਕਟ ਐਫ.ਐਮ. ਨਾਲ ਵਿਸ਼ੇਸ਼ ਗੱਲਬਾਤ 'ਚ ਅੱਜ ਟੀਮ ਦੀ ਖਿਡਾਰਨ ਐਨਾਬੈਲ ਟੈਪਰਸਨ ਨੇ ਆਖਿਆ ਕਿ ਟੀਮ ਕੈਨੇਡਾ ਦੋਵਾਂ ਮੁਕਾਬਲਿਆਂ 'ਚ ਜਿੱਤ ਦਰਜ ਕਰਨ ਲਈ ਕਾਂਫੀਡੈਂਟ ਹੈ।
ਟੀਮ ਕੈਨੇਡਾ ਦੇ ਬੀਤੇ ਸਾਲ ਅਨਬੀਟਨ ਰਹਿੰਦਿਆਂ ਇਸ ਟੂਰਨਾਮੈਂਟ ਨੂੰ ਜਿੱਤਣ ਸੰਬੰਧੀ ਟੀਮ ਦੀ ਖਿਡਾਰਨ ਸੀ.ਸੀ. ਵੌਂਗ ਦਾ ਕਹਿਣਾ ਸੀ ਕਿ ਟੀਮ ਦਾ ਟੀਚਾ ਇਸ ਵਾਰ ਵੀ ਟੂਰਨਾਮੈਂਟ ਜਿੱਤਣ ਦਾ ਹੈ ਪਰ ਟੀਮ ਪ੍ਰਤੀ ਮੁਕਾਬਲੇ ਦੀ ਅਹਿਮੀਅਤ ਨੂੰ ਸਮਝਦੀ ਹੈ ਅਤੇ ਮੈਚ ਦਰ ਮੈਚ ਰਣਨੀਤੀ ਅਨੁਸਾਰ ਅੱਗੇ ਵਧੇਗੀ।
ਦੋਵਾਂ ਖਿਡਾਰਨਾਂ ਨੇ ਮੰਨਿਆ ਕਿ ਟੂਰਨਾਮੈਂਟ 'ਚ ਕਈ ਮਜਬੂਤ ਟੀਮਾਂ ਹਨ ਅਤੇ ਮੁਕਾਬਲੇ ਚੁਣੌਤੀਪੂਰਨ ਹੋਣਗੇ।
ਅੱਜ ਕਨੇਡੀਅਨ ਖਿਡਾਰਨਾਂ 'ਚ ਲੈਰੀਸਾ ਫਰੈਂਕਲਿਨ ਵੀ ਮੌਜੂਦ ਸੀ ਜਿੰਨਾ ਦੱਸਿਆ ਕਿ ਉਨ੍ਹਾਂ ਨੂੰ ਲਿੰਫੋਮਾ ਡਿਟੈਕਟ ਹੋਣ ਤੋਂ ਬਾਅਦ ਕੀਮੋਥੈਰੇਪੀ ਦੀ ਪ੍ਰੀਕਿਰਿਆ ਤੋਂ ਲੰਘਣਾ ਪਿਆ। ਮੇਪਲ ਰਿਜ ਤੋਂ ਵਾਸਤਾ ਰੱਖਣ ਵਾਲੀ ਇਸ ਖਿਡਾਰਨ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦਾ ਫੋਕਸ ਸੌਫਟਬਾਲ 'ਤੇ ਹੈ ਅਤੇ ਉਹ ਘਰੇਲੂ ਮੈਦਾਨ 'ਤੇ ਪ੍ਰੀਵਾਰ, ਦੋਸਤਾਂ ਅਤੇ ਘਰੇਲੂ ਦਰਸ਼ਕਾਂ ਸਾਹਮਣੇ ਖੇਡਣ ਲਈ ਖੁਸ਼ ਹੈ।
ਸੀਨੀਅਰ ਟੀਮਾਂ ਦੇ ਨਾਲ ਇਸ ਟੂਰਨਾਮੈਂਟ 'ਚ ਅਨੇਕਾਂ ਯੂਥ ਟੀਮਾਂ ਵੀ ਹਿੱਸਾ ਲੈ ਰਹੀਆਂ ਹਨ ਅਤੇ ਸੀਨੀਅਰ ਖਿਡਾਰਨਾਂ ਦਾ ਕਹਿਣਾ ਹੈ ਕਿ ਉਹ ਵੀ ਇਨ੍ਹਾਂ ਹੀ ਯੂਥ ਟੀਮਾਂ 'ਚ ਹਿੱਸਾ ਲੈਣ ਅਤੇ ਪ੍ਰਫਾਰਮ ਕਰਨ ਆਸਰੇ ਟੀਮ ਕੈਨੇਡਾ 'ਚ ਸ਼ਾਮਿਲ ਹੋਣ ਦਾ ਸੁਪਨਾ ਪੂਰਾ ਕਰ ਸਕੀਆਂ।
ਕੋਚ ਕੇਲੀ ਰਾਫਟਰ ਦਾ ਕਹਿਣਾ ਸੀ ਕਿ ਟੀਮ ਦਾ ਟੀਚਾ ਤਾਂ ਕੈਨੇਡਾ ਕੱਪ ਜਿੱਤਣ ਦਾ ਹੈ ਪਰ ਉਹ ਨਾਲ ਹੀ ਖਿਡਾਰਨਾਂ ਤੋਂ ਕੰਸਿਸਟੈਂਟ ਪ੍ਰਦਰਸ਼ਨ ਦੀ ਵੀ ਆਸ ਕਰ ਰਹੀ ਹਨ।
ਖਿਡਾਰਨਾਂ ਦਾ ਕਹਿਣਾ ਸੀ ਕਿ ਯੂਥ ਟੀਮਾਂ ਲਈ ਇਹ ਟੂਰਨਾਮੈਂਟ ਚੰਗੀ ਪ੍ਰਤਿਭਾ ਨੂੰ ਨਿਖਾਰਨ ਦਾ ਕੰਮ ਕਰਦਾ ਹੈ। ਖਿਡਾਰਨ ਐਨਾਬੈਲ ਟੈਪਰਸਨ ਨੇ ਇਲਾਕੇ ਦੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਸੌਫਟਬਾਲ ਸਿਟੀ ਪਹੁੰਚ ਕੇ ਮੁਕਾਬਲਿਆਂ ਦਾ ਅਨੰਦ ਮਾਨਣ ਅਤੇ ਪ੍ਰਤਿਭਾਸ਼ਾਲੀ ਖਿਡਾਰਨਾਂ ਦਾ ਹੌਂਸਲਾ ਵਧਾਉਣ।
ਉਧਰ ਸੀ.ਸੀ. ਵੌਂਗ ਨੇ ਆਖਿਆ ਕਿ ਜੋ ਵੀ ਦਰਸ਼ਕ ਆ ਕੇ ਮੁਕਾਬਲੇ ਵੇਖਣਗੇ, ਉਨ੍ਹਾਂ ਨੂੰ ਖੇਡ ਪਸੰਦ ਜਰੂਰ ਆਵੇਗੀ।
