ਦੱਖਣੀ ਕੋਰੀਆ ਦੇ ਸਾਬਕਾ ਰਾਸ਼ਟਰਪਤੀ ਨੂੰ ਪੰਜ ਸਾਲ ਦੀ ਕੈਦ

ਸਾਊਥ ਕੋਰੀਆ ਦੀ ਇੱਕ ਅਦਾਲਤ ਨੇ ਸਾਬਕਾ ਰਾਸ਼ਟਰਪਤੀ ਯੂਨ ਸੁਕ ਯਿਓਲ ਨੂੰ ਮਾਰਸ਼ਲ ਲਾਅ ਲਾਗੂ ਕਰਨ ਜੁੜੇ ਮਾਮਲਿਆਂ ਵਿੱਚ ਦੋਸ਼ੀ ਠਹਿਰਾਉਂਦੇ ਹੋਏ ਸ਼ੁੱਕਰਵਾਰ ਨੂੰ 5 ਸਾਲ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਹੈ। ਇਹ ਫੈਸਲਾ ਯੂਨ ਦੇ ਖ਼ਿਲਾਫ਼ ਚੱਲ ਰਹੇ 8 ਅਪਰਾਧਿਕ ਮਾਮਲਿਆਂ ਵਿੱਚ ਪਹਿਲਾ ਵੱਡਾ ਫੈਸਲਾ ਹੈ। ਯੂਨ ਨੇ ਤੁਰੰਤ ਇਸ ਫੈਸਲੇ ’ਤੇ ਕੋਈ ਟਿੱਪਣੀ ਨਹੀਂ ਕੀਤੀ।

ਯੂਨ ਖ਼ਿਲਾਫ਼ ਸਭ ਤੋਂ ਅਹਿਮ ਦੋਸ਼ ਦਸੰਬਰ 2024 ਵਿੱਚ ਮਾਰਸ਼ਲ ਲਾਅ ਖਤਮ ਕਰਨ ਤੋਂ ਰੋਕਣ ਦੀ ਕੋਸ਼ਿਸ਼ ਕਰਨਾ ਸੀ। ਯੂਨ ਨੇ ਫੌਜ ਨੂੰ ਸੰਸਦ ਵੱਲ ਭੇਜਿਆ ਅਤੇ ਸੰਸਦ ਮੈਂਬਰਾਂ ਨੂੰ ਮਾਰਸ਼ਲ ਲਾਅ ਖ਼ਤਮ ਕਰਨ ਲਈ ਵੋਟਿੰਗ ਕਰਨ ਤੋਂ ਰੋਕਣ ਦੇ ਹੁਕਮ ਦਿੱਤੇ। ਇਸ ਕਾਰਵਾਈ ਦੌਰਾਨ 190 ਸੰਸਦ ਮੈਂਬਰ ਫੌਜੀ ਘੇਰੇ ਨੂੰ ਤੋੜ ਕੇ ਐਮਰਜੈਂਸੀ ਪ੍ਰਸਤਾਵ ਪਾਸ ਕਰਨ ਵਿੱਚ ਕਾਮਯਾਬ ਹੋ ਗਏ, ਜਿਸ ਨਾਲ ਯੂਨ ਨੂੰ ਪਿੱਛੇ ਹਟਣਾ ਪਿਆ।

14 ਦਸੰਬਰ ਨੂੰ ਸੰਸਦ ਨੇ ਉਸ ‘ਤੇ ਇਸ ਸੰਬੰਧ ਵਿੱਚ ਦੋਸ਼ ਲਗਾਇਆ ਅਤੇ ਅਪ੍ਰੈਲ 2025 ਵਿੱਚ ਸੰਵਿਧਾਨਕ ਅਦਾਲਤ ਨੇ ਉਸ ਨੂੰ ਅਹੁਦੇ ਤੋਂ ਹਟਾ ਦਿੱਤਾ। ਇਸ ਤੋਂ ਬਾਅਦ ਹੋਈ ਚੋਣ ਵਿੱਚ ਯੂਨ ਦੇ ਵਿਰੋਧੀ ਲੀ ਜੇ ਮਯੁੰਗ ਸੱਤਾ ਵਿੱਚ ਆ ਗਏ। ਇਸ ਮਾਮਲੇ ਵਿੱਚ ਪ੍ਰੋਸੀਕਿਊਟਰ ਨੇ ਉਸ ਲਈ ਮੌਤ ਦੀ ਸਜ਼ਾ ਦੀ ਮੰਗ ਕੀਤੀ ਹੈ। ਅਦਾਲਤ ਵੱਲੋਂ ਇਸ ਸੰਬੰਧੀ ਫੈਸਲਾ 19 ਫਰਵਰੀ ਨੂੰ ਸੁਣਾਇਆ ਜਾਵੇਗਾ।