ਸਾਊਥ ਵੈਸਟ ਓਨਟਾਰੀਓ ਵਿਚ ਖਸਰੇ ਕਾਰਨ ਬੱਚੇ ਦੀ ਮੌਤ

ਓਨਟਾਰੀਓ ਵਿਚ ਇੱਕ ਸਮੇਂ ਤੋਂ ਪਹਿਲਾਂ ਜਨਮੇ ਬੱਚੇ ਦੀ ਖਸਰੇ ਨਾਲ ਮੌਤ ਹੋਈ ਹੈ। ਸੂਬੇ ਦੇ ਮੁੱਖ ਮੈਡੀਕਲ ਅਫ਼ਸਰ ਮੁਤਾਬਕ, ਬੱਚੇ ਨੂੰ ਜਨਮ ਤੋਂ ਪਹਿਲਾਂ ਆਪਣੀ ਮਾਂ ਤੋਂ ਖਸਰੇ ਦਾ ਸੰਕਰਮਣ ਹੋਇਆ ਸੀ। ਡਾ. ਕੀਰਨ ਮੂਰ ਨੇ ਬਿਆਨ ਵਿਚ ਕਿਹਾ ਕਿ ਬੱਚੇ ਦੀ ਮਾਂ ਦਾ ਖਸਰੇ ਸਬੰਧੀ ਟੀਕਾਕਰਨ ਨਹੀਂ ਹੋਇਆ ਸੀ।

ਉਨ੍ਹਾਂ ਦੱਸਿਆ ਕਿ ਬੱਚੇ ਨੂੰ ਹੋਰ ਵੀ ਗੰਭੀਰ ਮੈਡੀਕਲ ਪੇਚੀਦਗੀਆਂ ਸਨ। ਮੁੱਖ ਮੈਡੀਕਲ ਅਫ਼ਸਰ ਨੇ ਬਿਆਨ ਵਿਚ ਕਿਹਾ ਕਿ ਪਰਿਵਾਰ ਦੇ ਸਨਮਾਨ ਨੂੰ ਧਿਆਨ ਵਿਚ ਰੱਖਦੇ ਹੋਏ ਮਾਂ ਅਤੇ ਬੱਚੇ ਬਾਰੇ ਹੋਰ ਕੋਈ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਜਾ ਰਹੀ। ਗੌਰਤਲਬ ਹੈ ਕਿ ਓਨਟਾਰੀਓ ਅਕਤੂਬਰ ਤੋਂ ਖਸਰੇ ਦੇ ਪ੍ਰਕੋਪ ਨਾਲ ਜੂਝ ਰਿਹਾ ਹੈ, ਇਸ ਦਾ ਪਹਿਲਾ ਮਾਮਲਾ ਨਿਊ ਬਰੰਜ਼ਵਿਕ ਵਿਚ ਸ਼ੁਰੂ ਹੋਏ ਮਾਮਲਿਆਂ ਨਾਲ ਜੁੜਿਆ ਹੋਇਆ ਸੀ।

ਓਨਟਾਰੀਓ ਵਿਚ ਹੁਣ ਤੱਕ ਖਸਰੇ ਦੇ 2,009 ਮਾਮਲੇ ਰਿਪੋਰਟ ਕੀਤੇ ਜਾ ਚੁੱਕੇ ਹਨ। ਸਿਹਤ ਅਧਿਕਾਰੀ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਮਾਮਲੇ ਬਿਨਾਂ ਟੀਕਾਕਰਨ ਵਾਲੇ ਵਿਅਕਤੀਆਂ ਵਿਚ ਆ ਰਹੇ ਹਨ।