ਸਟੈਟਿਸਟਿਕਸ ਕੈਨੇਡਾ ਜਾਰੀ ਕਰੇਗਾ ਅਕਤੂਬਰ ਮਹੀਨੇ ਦੀਆਂ ਨੌਕਰੀਆਂ ਦੀ ਰਿਪੋਰਟ

ਕੈਨੇਡੀਅਨ ਆਰਥਿਕਤਾ ਨੇ ਅਕਤੂਬਰ ਵਿਚ ਮਹਿਜ 14,500 jobs ਸ਼ਾਮਲ ਕੀਤੀਆਂ ਹਨ। ਬੈਂਕ ਔਫ ਕੈਨੇਡਾ ਵਲੋਂ ਵਿਆਜ ਦਰਾਂ ਵਿਚ 4 ਦੌਰ ਦੀ ਕਟੌਤੀ ਦੇ ਬਾਵਜੂਦ ਕਾਰੋਬਾਰੀ ਨਿਵੇਸ਼ ਅਤੇ ਭਰਤੀ ਵਿਚ ਰਫਤਾਰ ਤੇਜ਼ ਨਹੀਂ ਹੋਈ, ਜਦੋਂ ਕਿ ਰਿਕਾਰਡ ਇਮੀਗ੍ਰੇਸ਼ਨ ਦੇ ਚੱਲਦੇ ਲੇਬਰ ਫੋਰਸ ਵੀ ਵੱਡੀ ਗਿਣਤੀ ਵਿਚ ਉਪਲਬਧ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਸ਼ੁੱਕਰਵਾਰ ਜਾਰੀ ਰਿਪੋਰਟ ਵਿਚ ਕਿਹਾ ਕਿ ਬੇਰੁਜ਼ਗਾਰੀ ਦਰ ਅਜੇ ਵੀ 34 ਮਹੀਨਿਆਂ ਦੇ ਉੱਚ ਪੱਧਰ 6.5 ਫੀਸਦੀ 'ਤੇ ਬਣੀ ਹੋਈ ਹੈ, ਸਤੰਬਰ ਵਿਚ ਵੀ ਇਹ ਇਸੇ ਪੱਧਰ 'ਤੇ ਸੀ।

ਸਟੈਟਿਸਟਿਕਸ ਡਿਪਾਰਟਮੈਂਟ ਮੁਤਾਬਕ, ਪਿਛਲੇ ਸਾਲ ਤੋਂ ਕੈਨੇਡਾ ਦੀ ਲੇਬਰ ਫੋਰਸ ਵਿਚ 2.4 ਫੀਸਦੀ ਦਾ ਵਾਧਾ ਹੋਇਆ ਹੈ, ਜਿਸ ਨਾਲ ਅਰਥਚਾਰੇ ਵਿਚ ਕਾਮਿਆਂ ਦਾ ਹੜ੍ਹ ਆਇਆ ਹੈ ਪਰ ਰੁਜ਼ਗਾਰ ਦਰ ਵਿਚ ਲਗਾਤਾਰ ਕਮੀ ਆ ਰਹੀ ਹੈ।

ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲੇਮ ਨੇ ਕਿਹਾ ਸੀ ਕਿ ਜੇ ਅਰਥਵਿਵਸਥਾ ਤੇ ਰੁਜ਼ਗਾਰ ਨੂੰ ਵਧਾਉਣ ਲਈ ਵਿਆਜ ਦਰਾਂ ਵਿਚ ਕਟੌਤੀ ਦੀ ਲੋੜ ਹੋਈ ਤਾਂ ਬੈਂਕ ਅੱਗੇ ਵੀ ਇਸ 'ਤੇ ਵਿਚਾਰ ਕਰੇਗਾ, ਸੈਂਟਰਲ ਬੈਂਕ ਦੀ ਅਗਲੀ ਬੈਠਕ 11 ਦਸੰਬਰ ਨੂੰ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਬੈਂਕ ਆਫ ਕੈਨੇਡਾ ਕੀ ਫੈਸਲਾ ਲੈਂਦਾ ਹੈ।