ਸਾਬਕਾ ਪੀ.ਐੱਮ. ਸਟੀਫਨ ਹਾਰਪਰ ਨੂੰ ਔਟਵਾ 'ਚ ਕੀਤਾ ਜਾਵੇਗਾ ਸਨਮਾਨਿਤ

ਕੈਨੇਡਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਨੂੰ ਸਨਮਾਨ ਦੇਣ ਵਜੋਂ ਅੱਜ ਡਾਊਨਟਾਊਨ ਔਟਵਾ ਵਿਚ ਸਰ ਜੌਨ ਏ. ਮੈਕਡੋਨਲਡ ਬਿਲਡਿੰਗ ਵਿਚ ਉਨ੍ਹਾਂ ਦੇ ਪੋਰਟਰੇਟ ਦਾ ਉਦਘਾਟਨ ਕੀਤਾ ਜਾਵੇਗਾ। ਇਹ ਸਮਾਗਮ ਹਾਰਪਰ ਦੇ ਪਹਿਲੀ ਵਾਰ ਪ੍ਰਧਾਨ ਮੰਤਰੀ ਬਣਨ ਦੀ 20ਵੀਂ ਵਰ੍ਹੇਗੰਢ ਮੌਕੇ 'ਤੇ ਰੱਖਿਆ ਗਿਆ ਹੈ। ਉਨ੍ਹਾਂ 6 ਫਰਵਰੀ 2006 ਨੂੰ ਕੈਨੇਡਾ ਦੇ 22ਵੇਂ ਪ੍ਰਧਾਨ ਮੰਤਰੀ ਵਜੋਂ ਸਹੁੰ ਚੁੱਕੀ ਸੀ। ਇਹ ਹਰ ਕੈਨੇਡੀਅਨ ਪ੍ਰਧਾਨ ਮੰਤਰੀ ਲਈ ਇੱਕ ਪਰੰਪਰਾ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਇਸ ਖਾਸ ਸਮਾਗਮ ਮੌਕੇ ਮੌਜੂਦ ਰਹਿਣਗੇ। ਇਹ ਪੋਰਟਰੇਟ ਪ੍ਰਸਿੱਧ ਕੈਨੇਡੀਅਨ ਕਲਾਕਾਰ ਫਿਲ ਰਿਚਰਡਸ ਵਲੋਂ ਤਿਆਰ ਕੀਤਾ ਗਿਆ ਹੈ, ਜਿਨ੍ਹਾਂ ਨੇ ਮਹਾਰਾਣੀ ਐਲਿਜ਼ਾਬੈਥ II ਦਾ ਡਾਇਮੰਡ ਜੁਬਲੀ ਪੋਰਟਰੇਟ ਵੀ ਬਣਾਇਆ ਸੀ। ਕੰਜ਼ਰਵੇਟਿਵ ਦੇ ਸਾਬਕਾ ਪ੍ਰਧਾਨ ਮੰਤਰੀ ਦਾ ਇਹ ਪੋਰਟਰੇਟ ਹੁਣ ਪਾਰਲੀਮੈਂਟ ਹਿੱਲ ਦੀ ਪ੍ਰਧਾਨ ਮੰਤਰੀਆਂ ਦੀ ਪੋਰਟਰੇਟ ਗੈਲਰੀ ਦਾ ਹਿੱਸਾ ਬਣੇਗਾ।

ਹਾਰਪਰ ਫਰਵਰੀ 2006 ਤੋਂ ਨਵੰਬਰ 2015 ਤੱਕ ਪ੍ਰਧਾਨ ਮੰਤਰੀ ਰਹੇ ਸਨ। ਉਨ੍ਹਾਂ ਦਾ ਕਾਰਜਕਾਲ ਕਈ ਵੱਡੇ ਬਦਲਾਵਾਂ ਲਈ ਜਾਣਿਆ ਜਾਂਦਾ ਹੈ, ਜਿਸ ਵਿਚ ਜੀ.ਐਸ.ਟੀ. ਨੂੰ ਘਟਾ ਕੇ 5 ਫੀਸਦੀ ਕਰਨਾ ਅਤੇ ਅਪਰਾਧ ਖਿਲਾਫ ਕੁਝ ਸਖ਼ਤ ਨੀਤੀਆਂ ਸ਼ਾਮਲ ਸਨ। 2008 ਵਿਚ ਉਨ੍ਹਾਂ ਰਿਹਾਇਸ਼ੀ ਸਕੂਲ ਲਈ ਕੈਨੇਡੀਅਨਜ਼ ਵੱਲੋਂ ਰਸਮੀ ਤੌਰ 'ਤੇ ਮੁਆਫੀ ਮੰਗੀ ਸੀ।