16.31C Vancouver 16.31C VancouverMar 14, 2024 5:12 PM - The Canadian Press
ਐਡਮਿੰਟਨ ਦੇ ਸਿਵਿਕ ਸਰਵਿਸ ਯੂਨੀਅਨ 52 ਦੇ ਕਰਮਚਾਰੀਆਂ ਨੇ ਅੱਜ ਦੀ ਹੜਤਾਲ ਅਗਲੇ 24 ਘੰਟਿਆਂ ਲਈ ਮੁਲਤਵੀ ਕਰ ਦਿੱਤੀ ਹੈ। ਸਿਟੀ ਅਤੇ ਕਰਮਚਾਰੀਆਂ ਵਿਚਕਾਰ ਤਨਖਾਹਾਂ ਦੇ ਵਾਧੇ ਲਈ ਤਕਰਾਰ ਕਾਰਨ ਅੱਜ ਸਵੇਰੇ 11 ਵਜੇ ਯੂਨੀਅਨ ਮੈਂਬਰਜ਼ ਨੇ ਹੜਤਾਲ ਸ਼ੁਰੂ ਕਰਨੀ ਸੀ ਪਰ ਤਾਜ਼ਾ
ਜਾਣਕਾਰੀ ਮੁਤਾਬਕ ਇਸ ਨੂੰ ਸ਼ੁੱਕਰਵਾਰ ਲਈ ਮੁਲਤਵੀ ਕੀਤਾ ਗਿਆ ਹੈ। ਇਹ ਯੂਨੀਅਨ ਲਗਭਗ 6000 ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਦੀ ਹੈ ਅਤੇ ਇਹ 2020 ਤੋਂ ਬਿਨਾਂ ਠੇਕੇ ਦੇ ਹਨ।
ਯੂਨੀਅਨ ਚਾਹੁੰਦੀ ਹੈ ਕਿ ਕਰਮਚਾਰੀਆਂ ਦੀ ਤਨਖਾਹ ਵਿਚ 2021 ਲਈ 1.5 ਫੀਸਦੀ, 2022 ਲਈ 1.5 ਫੀਸਦੀ ਅਤੇ 2023 ਲਈ 2 ਫੀਸਦੀ ਦਾ ਵਾਧਾ ਕੀਤਾ ਜਾਵੇ ਜਦਕਿ ਸਿਟੀ ਤਨਖਾਹ ਵਿਚ 2021 ਲਈ ਜ਼ੀਰੋ ਫੀਸਦੀ, 2022 ਲਈ 1 ਫੀਸਦੀ ਅਤੇ 2023 ਲਈ 2 ਫੀਸਦੀ ਵਾਧਾ ਕਰਨ ਲਈ ਤਿਆਰ ਹੈ।
ਐਡਮਿੰਟਨ ਸਿਟੀ ਨੇ 5 ਸਾਲ ਦੇ ਸਮਝੌਤੇ ਤਹਿਤ 2024 ਲਈ 2 ਫੀਸਦੀ ਅਤੇ 2025 ਲਈ 2.25 ਫੀਸਦੀ ਤਨਖਾਹ ਵਧਾਉਣ ਦਾ ਵੀ ਆਫਰ ਦਿੱਤਾ ਹੈ। ਪਿਛਲੇ ਸ਼ੁੱਕਰਵਾਰ ਕਰਮਚਾਰੀਆਂ ਨੇ 87.6 ਫੀਸਦੀ ਵੋਟ ਪਾ ਕੇ ਸਿਟੀ ਦੇ ਆਫਰ ਦਾ ਵਿਰੋਧ ਕੀਤਾ ਸੀ।
