ਸੂਫੀ ਗਾਇਕ ਹੰਸ ਰਾਜ ਜਲੰਧਰ ਤੋਂ ਲੜ ਸਕਦੇ ਹਨ ਚੋਣ, ਹੁਸ਼ਿਆਰਪੁਰ ਤੋਂ ਵੀ ਭਾਜਪਾ ਉਮੀਦਵਾਰ ਦੀਆਂ ਕਿਆਸਅਰਾਈਆਂ

ਪੰਜਾਬ ਵਿਚ ਭਾਜਪਾ ਜਲੰਧਰ ਜਾਂ ਹੁਸ਼ਿਆਰਪੁਰ ਤੋਂ ਸੂਫੀ ਗਾਇਕ ਹੰਸ ਰਾਜ ਹੰਸ ਨੂੰ ਲੋਕ ਸਭਾ ਉਮੀਦਵਾਰ ਬਣਾ ਸਕਦੀ ਹੈ। ਹੰਸ ਰਾਜ ਹੰਸ ਮੌਜੂਦਾ ਸਮੇਂ ਦਿੱਲੀ ਪੱਛਮੀ ਤੋਂ ਐੱਮ.ਪੀ. ਹਨ।

ਫਿਲਹਾਲ ਕਿਸੇ ਵੀ ਨੇਤਾ ਨੇ ਇਸ ’ਤੇ ਖੁੱਲ੍ਹ ਕੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ। ਹੰਸ ਰਾਜ ਮੂਲ ਰੂਪ ਤੋਂ ਜਲੰਧਰ ਜ਼ਿਲ੍ਹੇ ਦੇ ਹੀ ਰਹਿਣ ਵਾਲੇ ਹਨ। ਉਨ੍ਹਾਂ ਨੇ ਆਪਣੇ ਸਿਆਸੀ ਸਫਰ ਦੀ ਸ਼ੁਰੂਆਤ ਸ਼੍ਰੋਮਣੀ ਅਕਾਲੀ ਦਲ ਦੇ ਮੈਂਬਰ ਦੇ ਰੂਪ ਵਿਚ ਕੀਤੀ ਸੀ। 2009 ਦੀ ਲੋਕ ਸਭਾ ਚੋਣ ਵੀ ਉਹ ਜਲੰਧਰ ਤੋਂ ਲੜੇ ਸਨ ਪਰ ਹਾਰ ਗਏ। ਭਾਜਪਾ ਵਿਚ ਸ਼ਾਮਲ ਹੋਣ ਮਗਰੋਂ ਉਹ 2019 ਵਿਚ ਦਿੱਲੀ ਪੱਛਮੀ ਤੋਂ ਲੋਕ ਸਭਾ ਚੋਣਾਂ ਜਿੱਤੇ ਸਨ।

ਓਧਰ, ਢੀਂਡਸਾ ਪਰਿਵਾਰ ਦੀ ਅਕਾਲੀ ਦਲ ਵਿਚ ਵਾਪਸੀ ਦੇ ਮੱਦੇਨਜ਼ਰ ਭਾਜਪਾ ਦੇ ਆਗੂ ਫਤਿਹਜੰਗ ਸਿੰਘ ਬਾਜਵਾ ਨੇ ਅਕਾਲੀ-ਭਾਜਪਾ ਵਿਚਕਾਰ ਗਠਜੋੜ ਹੋਣ ਦੀ ਉਮੀਦ ਜਤਾਈ ਹੈ।