ਸਰੀ ਦਾ ਰਹਿਣ ਵਾਲਾ ਇੱਕ ਭਾਰਤੀ ਨਸ਼ਾ ਤਸਕਰ ਸਜ਼ਾ ਤੋਂ ਬਚਣ ਲਈ ਭੱਜਿਆ ਭਾਰਤ

ਸਰੀ ਦਾ ਇੱਕ ਨਸ਼ਾ ਤਸਕਰ ਰਾਜ ਕੁਮਾਰ ਮਹਿਮੀ 15 ਸਾਲ ਦੀ ਜੇਲ੍ਹ ਤੋਂ ਬਚਣ ਲਈ ਭਾਰਤ ਭੱਜ ਗਿਆ ਹੈ। ਕੈਨੇਡੀਅਨ ਪੁਲਿਸ ਨੇ ਉਸ ਖਿਲਾਫ ਇੰਟਰਪੋਲ ਕੋਲ ਰੈੱਡ ਨੋਟਿਸ ਜਾਰੀ ਕਰਨ ਲਈ ਪਹੁੰਚ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ 60 ਸਾਲਾ ਰਾਜ ਕੁਮਾਰ ਮਹਿਮੀ ਨੂੰ ਕੈਨੇਡਾ ਵਿੱਚ ਕੋਕੀਨ ਤਸਕਰੀ ਦੇ ਮਾਮਲੇ ਵਿੱਚ 15 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ।

ਬੀ. ਸੀ. ਦਾ ਰਾਜ ਕੁਮਾਰ ਮਹਿਮੀ ਟਰੱਕ ਡਰਾਈਵਰ ਸੀ। ਨਵੰਬਰ 2017 ਵਿੱਚ ਕੈਨੇਡਾ-ਅਮਰੀਕਾ ਸਰਹੱਦ 'ਤੇ ਉਸ ਦੇ ਟਰੱਕ ਵਿੱਚੋਂ 80 ਕਿਲੋ ਕੋਕੀਨ ਬਰਾਮਦ ਕੀਤੀ ਗਈ ਸੀ, ਜਿਸ ਦੀ ਮਾਰਕੀਟ ਵੈਲਿਊ ਕੋਈ $3.2 ਮਿਲੀਅਨ ਸੀ। ਆਰਸੀਐੱਮਪੀ ਵੱਲੋਂ ਮਹਿਮੀ ਦੀ ਗ੍ਰਿਫਤਾਰੀ ਲਈ ਕੈਨੇਡਾ ਭਰ ਵਿੱਚ ਵਾਰੰਟ ਵੀ ਜਾਰੀ ਕੀਤੇ ਗਏ ਹਨ। ਉਸ ਨੂੰ ਸਤੰਬਰ 2022 ਵਿੱਚ ਦੋਸ਼ੀ ਠਹਿਰਾਇਆ ਗਿਆ ਸੀ। 11 ਅਕਤਬੂਰ ਨੂੰ ਉਹ ਵੈਨਕੂਵਰ ਤੋਂ ਫਲਾਈਟ ਵਿੱਚ ਸਵਾਰ ਹੋ ਕੇ ਭਾਰਤ ਭੱਜ ਗਿਆ।

ਉਸ ਦੀ ਗੈਰ-ਹਾਜ਼ਰੀ ਦੇ ਬਾਵਜੂਦ ਸਰੀ ਪ੍ਰੋਵਿੰਸ਼ੀਅਲ ਕੋਰਟ ਨੇ ਇਸ ਸਾਲ ਨਵੰਬਰ ਵਿੱਚ ਉਸ ਨੂੰ 15 ਸਾਲ ਦੀ ਸਜ਼ਾ ਸੁਣਾਈ। ਜੇ ਇੰਟਰਪੋਲ ਰੈੱਡ ਨੋਟਿਸ ਜਾਰੀ ਕਰ ਦਿੰਦਾ ਹੈ ਤਾਂ ਇਸ ਦੀ ਮਦਦ ਨਾਲ ਮਹਿਮੀ ਨੂੰ ਗ੍ਰਿਫਤਾਰ ਕਰਨ ਵਿੱਚ ਮਦਦ ਮਿਲ ਸਕਦੀ ਹੈ।

ਇਸਦੇ ਨਾਲ ਹੀ ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇਕਰ ਕਿਸੇ ਨੂੰ ਮਹਿਮੀ ਦੇ ਠਿਕਾਣੇ ਬਾਰੇ ਜਾਣਕਾਰੀ ਹੈ ਤਾਂ 1-800-222-8477 'ਤੇ ਕ੍ਰਾਈਮ ਸਟੌਪਰਸ ਨੂੰ ਜਾਣਕਾਰੀ ਦਿੱਤੀ ਜਾਵੇ।