ਸਰੀ ਪੁਲਿਸ ਨੇ ਨਿਊਟਨ ਇਲਾਕੇ ਹੋਈ ਸ਼ੂਟਿੰਗ ਦੇ ਸੰਬੰਧ ਵਿੱਚ ਇਕ ਵਿਅਕਤੀ 'ਤੇ ਲਾਏ ਕਈ ਦੋਸ਼

ਸਰੀ ਪੁਲਿਸ ਸਰਵਿਸ ਨੇ ਨਿਊਟਨ ਇਲਾਕੇ ਵਿਚ ਨਵੇਂ ਸਾਲ ਦੇ ਦਿਨ ਹੋਈ ਸ਼ੂਟਿੰਗ ਦੀ ਵਾਰਦਾਤ ਦੇ ਸਬੰਧ ਵਿਚ 49 ਸਾਲਾ ਚੰਚਲ ਬਡਵਾਲ ਖਿਲਾਫ ਕਤਲ ਦੀ ਕੋਸ਼ਿਸ਼ ਸਮੇਤ ਕਈ ਗੰਭੀਰ ਧਾਰਾਵਾਂ ਤਹਿਤ ਚਾਰਜਿਜ਼ ਲਗਾਏ ਹਨ।

ਪੁਲਿਸ ਰਿਪੋਰਟ ਅਨੁਸਾਰ, ਇਹ ਘਟਨਾ 1 ਜਨਵਰੀ ਨੂੰ ਰਾਤ ਲਗਭਗ 11:45 ਵਜੇ 140ਬੀ ਸਟ੍ਰੀਟ ਅਤੇ 59 ਐਵੇਨਿਊ ਦੇ ਖੇਤਰ ਵਿਚ ਵਾਪਰੀ ਸੀ, ਜਿੱਥੇ ਇੱਕ ਘਰ ਅੰਦਰ ਗੋਲੀਆਂ ਚੱਲਣ ਦੀ ਸੂਚਨਾ ਮਿਲਣ 'ਤੇ ਐਸ.ਪੀ.ਐਸ. ਦੇ ਅਧਿਕਾਰੀ ਮੌਕੇ 'ਤੇ ਪਹੁੰਚੇ ਸਨ।

ਮੌਕੇ 'ਤੇ ਪੁਲਿਸ ਨੂੰ ਇੱਕ ਵਿਅਕਤੀ ਜ਼ਖਮੀ ਹਾਲਤ ਵਿਚ ਮਿਲਿਆ ਸੀ, ਜਿਸ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ ਸੀ। ਪੀੜਤ ਦੀ ਹਾਲਤ ਸਥਿਰ ਦੱਸੀ ਗਈ ਸੀ। ਪੁਲਿਸ ਨੇ ਮੌਕੇ ਤੋਂ ਹੀ ਬਡਵਾਲ ਨੂੰ ਗ੍ਰਿਫਤਾਰ ਕਰ ਲਿਆ ਸੀ।

ਸਰੀ ਪੁਲਿਸ ਸਰਵਿਸ ਦੀ ਗੰਭੀਰ ਅਪਰਾਧ ਇਕਾਈ ਦੀ ਜਾਂਚ ਦੇ ਆਧਾਰ 'ਤੇ ਬੀ.ਸੀ. ਪ੍ਰੌਸੀਕਿਊਸ਼ਨ ਸਰਵਿਸ ਨੇ 28 ਜਨਵਰੀ ਨੂੰ 49 ਸਾਲਾ ਚੰਚਲ ਬਡਵਾਲ ਵਿਰੁੱਧ ਕਤਲ ਦੀ ਕੋਸ਼ਿਸ਼, ਹਥਿਆਰਾਂ ਦੇ ਅਪਰਾਧ, ਹਮਲਾ ਅਤੇ ਰਿਹਾਈ ਦੇ ਹੁਕਮਾਂ ਦੀ ਉਲੰਘਣਾ ਦੇ ਚਾਰਜ਼ਿਜ਼ ਨੂੰ ਮਨਜ਼ੂਰੀ ਦਿੱਤੀ। ਮੁਲਜ਼ਮ ਇਸ ਵੇਲੇ ਪੁਲਿਸ ਹਿਰਾਸਤ ਵਿਚ ਹੈ। ਉਸ ਨੂੰ 6 ਫਰਵਰੀ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ, ਜਿੱਥੇ ਮਾਮਲੇ ਦੀ ਅਗਲੀ ਸੁਣਵਾਈ ਹੋਵੇਗੀ।