ਅਮਰੀਕੀ ਪੱਤਰਕਾਰ ਨੂੰ ਮਿਲੀਆਂ ਜਾਨੋ ਮਾਰਨ ਦੀਆਂ ਧਮਕੀਆਂ, ਸਰੀ ਨਿਵਾਸੀ 'ਤੇ ਲੱਗੇ ਦੋਸ਼

ਸਰੀ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਅਮਰੀਕਾ ਦੀ ਇੱਕ ਪੱਤਰਕਾਰ ਨੂੰ ਧਮਕਾਉਣ ਦੇ ਮਾਮਲੇ 'ਚ ਸਰੀ ਨਿਵਾਸੀ 'ਤੇ ਦੋਸ਼ ਲੱਗੇ ਹਨ।

ਜਾਣਕਾਰੀ ਦਿੱਤੀ ਗਈ ਕਿ ਅਮਰੀਕਾ ਦੀ ਪੱਤਰਕਾਰ ਨੂੰ ਔਨਲਾਈਨ ਢੰਗ ਨਾਲ ਜਾਨੋ ਮਾਰਨ ਦੀ ਧਮਕੀ ਦਿੱਤੀ ਗਈ ਸੀ।

ਸਰੀ ਆਰ.ਸੀ.ਐਮ.ਪੀ. ਦੀ ਜਨਰਲ ਇਨਵੈਸਟੀਗੇਸ਼ਨ ਯੂਨਿਟ ਨੇ ਜੂਨ 'ਚ ਮਾਮਲੇ ਦੀ ਜਾਂਚ ਅਰੰਭੀ ਸੀ ਅਤੇ ਇੱਕ ਸ਼ੱਕੀ ਦੀ ਪਛਾਣ ਕੀਤੀ ਗਈ।

ਪੁਲਿਸ ਨੇ ਦੱਸਿਆ ਕਿ ਇਸੇ ਸਾਲ 10 ਜੁਲਾਈ ਨੂੰ ਇੱਕ 38 ਸਾਲਾ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ ਅਤੇ ਉਸ ਦੀ ਰਿਹਾਇਸ਼ 'ਤੇ ਤਲਾਸ਼ੀ ਵਾਰੰਟ ਨੂੰ ਅੰਜਾਮ ਦਿੱਤਾ ਗਿਆ ਸੀ।

ਹੁਣ ਪੁਲਿਸ ਨੇ ਦੱਸਿਆ ਹੈ ਕਿ ਮਾਮਲੇ 'ਚ 10 ਨਵੰਬਰ ਨੂੰ 38 ਸਾਲਾ ਨਿਕੋਲਸ ਸਲਿਵਨ 'ਤੇ ਦੋਸ਼ ਤੈਅ ਕੀਤੇ ਗਏ ਹਨ।

ਇਸ ਵਿਅਕਤੀ 'ਤੇ ਸੋਸ਼ਲ ਮੀਡੀਆ ਜਰੀਏ ਜਾਨੋ ਮਾਰਨ ਜਾਂ ਸ਼ਰੀਰਕ ਨੁਕਸਾਨ ਪਹੁੰਚਾਉਣ ਸੰਬੰਧੀ ਧਮਕਾਉਣ ਦੇ 5 ਦੋਸ਼ ਲੱਗੇ ਹਨ।

ਸਰੀ ਆਰ.ਸੀ.ਐਮ.ਪੀ. ਵੱਲੋਂ ਇਸ ਮਾਮਲੇ 'ਚ ਐਫ.ਬੀ.ਆਈ. ਸਮੇਤ ਅਮਰੀਕੀ ਅਧਿਕਾਰੀਆਂ ਨਾਲ ਮਿਲ ਕੇ ਕੰਮ ਕੀਤਾ ਗਿਆ ਸੀ।

ਯਾਦ ਰਹੇ ਸਰੀ ਆਰ.ਸੀ.ਐਮ.ਪੀ. ਨੇ ਸਪਸ਼ਟ ਨਹੀਂ ਕੀਤਾ ਹੈ ਕਿ ਕਿਸ ਪੱਤਰਕਾਰ ਨੂੰ ਧਮਕਾਇਆ ਗਿਆ ਸੀ।

ਹਾਲਾਂਕਿ ਪਹਿਲਾਂ ਉਜਾਗਰ ਹੋਈਆਂ ਖਬਰਾਂ ਅਨੁਸਾਰ ਮਾਮਲਾ ਸੀ.ਐਨ.ਐਨ. ਦੀ ਪੱਤਰਕਾਰ ਐਰਿਨ ਬਰਨੈਟ ਨੂੰ ਧਮਕਾਉਣ ਨਾਲ ਸੰਬੰਧਤ ਹੈ।

ਇਹ ਐਂਕਰ ਫਿਲਹਾਲ ਸੀ.ਐਨ.ਐਨ. ਨੈਟਵਰਕ 'ਤੇ ਐਰਿਨ ਬਰਨੈਟ ਆਊਟਫਰੰਟ ਨਾਮ ਦਾ ਸ਼ੋਅ ਕਰਦੀ ਹੈ ਜਿਸ 'ਚ ਖਬਰਾਂ ਨੂੰ ਵਿਸ਼ਲੇਸ਼ਣ ਸਮੇਤ ਪੇਸ਼ ਕੀਤਾ ਜਾਂਦਾ ਹੈ।

ਮੀਡੀਆ ਰਿਪੋਰਟਸ (ਨਿਊਜ 1130) ਅਨੁਸਾਰ ਆਰ.ਸੀ.ਐਮ.ਪੀ. ਨਾਲ ਇੰਟਰਪੋਲ, ਨਿਊ ਯੌਰਕ ਪੁਲਿਸ ਡਿਪਾਰਟਮੈਂਟ ਅਤੇ ਐਫ.ਬੀ.ਆਈ. ਨੇ ਸੰਪਰਕ ਬਣਾਇਆ ਸੀ।