ਸਰੀ ਪੁਲਿਸ ਸਰਵਿਸ ਨੇ ਉਸਾਰੀ ਜ਼ੋਨ ਵਿਚ ਤੇਜ਼ ਰਫ਼ਤਾਰ ਨਾਲ ਗੱਡੀਆਂ ਚਲਾਉਣ ਵਾਲਿਆਂ ਨੂੰ ਜਾਰੀ ਕੀਤੀ ਚਿਤਾਵਨੀ

ਸਰੀ ਪੁਲਿਸ ਸਰਵਿਸ ਨੇ ਉਸਾਰੀ ਜ਼ੋਨ ਵਿਚ ਤੇਜ਼ ਰਫ਼ਤਾਰ ਨਾਲ ਗੱਡੀਆਂ ਚਲਾਉਣ ਵਾਲਿਆਂ ਨੂੰ ਸਖ਼ਤ ਚਿਤਾਵਨੀ ਜਾਰੀ ਕੀਤੀ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਉਸ ਦੇ ਰੋਡ ਸੇਫਟੀ ਔਫੀਸਰ ਵਲੋਂ ਇੱਕ ਹੀ ਸਵੇਰ ਵਿਚ 5 ਡਰਾਈਵਰਾਂ ਨੂੰ ਬਹੁਤ ਜ਼ਿਆਦਾ ਰਫ਼ਤਾਰ ਲਈ ਭਾਰੀ ਜੁਰਮਾਨਾ ਟਿਕਟ ਜਾਰੀ ਕੀਤੇ ਗਏ ਹਨ। ਇਨ੍ਹਾਂ ਵਿਚੋਂ 4 ਚਲਾਨ ਉਸਾਰੀ ਜ਼ੋਨ ਵਿਚ ਕੱਟੇ ਗਏ।ਰੋਡ ਸੇਫਟੀ ਔਫੀਸਰ ਨੇ ਇਹ ਕਾਰਵਾਈ ਬੀਤੀ ਸਵੇਰ ਕੀਤੀ।

ਪੁਲਿਸ ਅਨੁਸਾਰ, ਇੱਕ ਮਾਮਲੇ ਵਿਚ ਡਰਾਈਵਰ ਉਸਾਰੀ ਵਾਲੀ ਥਾਂ 'ਤੇ ਲਗਾਈ ਗਈ 30 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਲਿਮਟ ਦੇ ਬਾਵਜੂਦ 102 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਗੱਡੀ ਚਲਾ ਰਿਹਾ ਸੀ। ਐਸ.ਪੀ.ਐਸ. ਨੇ ਚਿਤਾਵਨੀ ਦਿੱਤੀ ਕਿ ਉਸਾਰੀ ਜ਼ੋਨ ਵਿਚ ਸਪੀਡ ਲਿਮਟ ਦੀ ਉਲੰਘਣਾ ਕਰਨ ਲਈ ਦੁੱਗਣੇ ਜੁਰਮਾਨੇ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਸਰੀ ਪੁਲਿਸ ਸਰਵਿਸ ਨੇ ਕਿਹਾ ਕਿ ਜਦੋਂ ਵਰਕਰ ਮੌਜੂਦ ਹੁੰਦੇ ਹਨ ਤਾਂ ਹਾਈਵੇ 'ਤੇ ਰਫ਼ਤਾਰ ਦੀ ਸੀਮਾ ਘਟਾ ਕੇ 70 ਕਿਲੋਮੀਟਰ ਅਤੇ ਸ਼ਹਿਰੀ ਸੜਕਾਂ 'ਤੇ 30 ਕਿਲੋਮੀਟਰ ਪ੍ਰਤੀ ਘੰਟਾ ਕਰ ਦਿੱਤੀ ਜਾਂਦੀ ਹੈ। ਪੁਲਿਸ ਨੇ ਕਿਹਾ ਕਿ ਲੋਕਾਂ ਨੂੰ ਉਸਾਰੀ ਜ਼ੋਨ ਬਾਰੇ ਸੜਕਾਂ 'ਤੇ ਲੱਗੇ ਸਾਈਨ 'ਤੇ ਧਿਆਨ ਦੇਣਾ ਚਾਹੀਦਾ ਹੈ, ਜਿਨ੍ਹਾਂ ਵਿਚ ਅਕਸਰ ਸਪੀਡ, ਪਾਬੰਦੀ ਅਤੇ ਦਿਸ਼ਾ ਬਾਰੇ ਜ਼ਰੂਰੀ ਜਾਣਕਾਰੀ ਹੁੰਦੀ ਹੈ।