ਸਰੀ ਪੁਲਿਸ ਸਰਵਿਸ ਨੇ ਇਕ ਸ਼ੱਕੀ ਦੀ ਤਸਵੀਰ ਜਾਰੀ ਕਰਕੇ, ਲੋਕਾਂ ਨੂੰ ਕੀਤੀ ਮਦਦ ਦੀ ਅਪੀਲ

ਸਰੀ ਪੁਲਿਸ ਸਰਵਿਸ ਵਲੋਂ ਇੱਕ ਸ਼ੱਕੀ ਦੀ ਤਸਵੀਰ ਜਾਰੀ ਕਰਦੇ ਹੋਏ ਉਸ ਦੀ ਪਛਾਣ ਵਿਚ ਮਦਦ ਮੰਗੀ ਗਈ ਹੈ। ਪੁਲਿਸ ਮੁਤਾਬਕ, ਇੱਕ ਅਣਪਛਾਤੇ ਵਿਅਕਤੀ ਨੇ ਰਾਹ ਜਾਂਦੀ ਇੱਕ ਲੜਕੀ ਨੂੰ ਪਿੱਛੋਂ ਫੜ ਕੇ ਹਮਲਾ ਕਰਨ ਦੀ ਕੋਸ਼ਿਸ਼ ਕੀਤੀ। ਇਹ ਘਟਨਾ 6 ਫਰਵਰੀ ਨੂੰ ਸ਼ਾਮ ਕਰੀਬ 4:35 ਵਜੇ ਵਾਪਰੀ।

ਪੁਲਿਸ ਅਨੁਸਾਰ, ਪੀੜਤ ਲੜਕੀ 123 ਏ ਸਟ੍ਰੀਟ ਦੇ ਇਲਾਕੇ ਵਿਚ 100 ਐਵੇਨਿਊ 'ਤੇ ਪੈਦਲ ਜਾ ਰਹੀ ਸੀ। ਇਸੇ ਦੌਰਾਨ ਸ਼ੱਕੀ ਨੇ ਪਿੱਛੋਂ ਆ ਕੇ ਉਸ ਨਾਲ ਛੇੜਛਾੜ ਕੀਤੀ। ਖੁਸ਼ਕਿਸਮਤੀ ਨਾਲ ਲੜਕੀ ਉਸ ਦੀ ਪਕੜ ਵਿਚੋਂ ਛੁੱਟਣ ਵਿਚ ਕਾਮਯਾਬ ਰਹੀ, ਜਿਸ ਤੋਂ ਬਾਅਦ ਸ਼ੱਕੀ 123ਏ ਸਟ੍ਰੀਟ 'ਤੇ ਸਾਊਥ ਬਾਊਂਡ ਵੱਲ ਫਰਾਰ ਹੋ ਗਿਆ। ਇਸ ਘਟਨਾ ਵਿਚ ਪੀੜਤਾ ਨੂੰ ਕੋਈ ਸਰੀਰਕ ਸੱਟ ਲੱਗਣ ਤੋਂ ਬਚਾਅ ਰਿਹਾ।

ਐਸ.ਪੀ.ਐਸ. ਵੱਲੋਂ ਜਾਰੀ ਕੀਤੇ ਗਏ ਵੇਰਵਿਆਂ ਅਨੁਸਾਰ ਸ਼ੱਕੀ ਇੱਕ ਗੋਰਾ ਜਾਂ ਮਿਡਲ ਈਸਟਨ ਜਾਪਦਾ ਹੈ, ਜਿਸ ਦਾ ਕੱਦ ਲਗਭਗ 5 ਫੁੱਟ 10 ਇੰਚ ਹੈ। ਔਫੀਸਰ ਵਲੋਂ ਅਪੀਲ ਕੀਤੀ ਗਈ ਹੈ ਕਿ ਜੇਕਰ ਕਿਸੇ ਕੋਲ ਵੀ ਇਸ ਸ਼ੱਕੀ ਵਿਅਕਤੀ ਬਾਰੇ ਕੋਈ ਜਾਣਕਾਰੀ ਹੈ ਤਾਂ ਉਹ ਸਰੀ ਪੁਲਿਸ ਦੇ ਨੌਨ-ਐਮਰਜੈਂਸੀ ਨੰਬਰ 604-599-0502 'ਤੇ ਸੰਪਰਕ ਕਰ ਸਕਦਾ ਹੈ।