ਸਰੀ ਪੁਲਿਸ ਸਰਵਿਸ ਨੇ ਚੋਰੀ ਦੀ ਘਟਨਾ ਦੇ ਮਾਮਲੇ ਵਿਚ ਸ਼ੱਕੀ ਦੀਆਂ ਤਸਵੀਰਾਂ ਕੀਤੀਆਂ ਜਾਰੀ

ਸਰੀ ਪੁਲਿਸ ਸਰਵਿਸ ਨੇ ਇੱਕ ਰਿਟਾਇਰਮੈਂਟ ਰਿਹਾਇਸ਼ ਵਿਚ ਚੋਰੀ ਦੀ ਘਟਨਾ ਦੇ ਮਾਮਲੇ ਵਿਚ ਇੱਕ ਸ਼ੱਕੀ ਦੀਆਂ ਤਸਵੀਰਾਂ ਜਾਰੀ ਕਰਦੇ ਹੋਏ ਉਸ ਦੀ ਪਛਾਣ ਵਿਚ ਪਬਲਿਕ ਤੋਂ ਸਹਿਯੋਗ ਦੀ ਮੰਗ ਕੀਤੀ ਹੈ। ਪੁਲਿਸ ਮੁਤਾਬਕ, ਘਟਨਾ 15 ਦਸੰਬਰ ਨੂੰ ਦੁਪਹਿਰ ਲਗਭਗ 2:10 ਵਜੇ 16 ਐਵੇਨਿਊ ਦੇ 15500 ਬਲਾਕ ਵਿਚ ਸਥਿਤ ਰਿਟਾਇਰਮੈਂਟ ਰਿਹਾਇਸ਼ ਵਿਚ ਵਾਪਰੀ।

ਪੁਲਿਸ ਅਨੁਸਾਰ, ਸ਼ੱਕੀ ਨੇ ਖੁਦ ਨੂੰ ਇੱਕ ਮੈਨਟੇਨੈਂਸ ਵਰਕਰ ਦੱਸਿਆ ਅਤੇ ਕਿਹਾ ਕਿ ਉਹ ਅਪਾਰਟਮੈਂਟ ਦੇ ਸਪ੍ਰਿੰਕਲਰ ਸਿਸਟਮ ਦੀ ਜਾਂਚ ਕਰਨ ਆਇਆ ਹੈ। ਇਸ ਬਹਾਨੇ ਨਾਲ ਅੰਦਰ ਵੜ ਕੇ ਉਸ ਨੇ ਮੌਕਾ ਪਾਉਂਦੇ ਹੀ ਬਜ਼ੁਰਗ ਮਹਿਲਾ ਦਾ ਪਰਸ ਚੋਰੀ ਕਰ ਲਿਆ ਅਤੇ ਉੱਥੋਂ ਫ਼ਰਾਰ ਹੋ ਗਿਆ। ਪੁਲਿਸ ਨੇ ਕਿਹਾ ਕਿ ਸ਼ੱਕੀ ਇੱਕ ਗੋਰਾ ਵਿਅਕਤੀ ਹੈ, ਜਿਸ ਦਾ ਕੱਦ ਲਗਭਗ 5 ਫੁੱਟ 8 ਇੰਚ ਹੈ ਅਤੇ ਉਸ ਨੇ ਘਟਨਾ ਸਮੇਂ ਐਨਕਾਂ ਲਗਾਈਆਂ ਹੋਈਆਂ ਸਨ।

ਸਰੀ ਪੁਲਿਸ ਨੂੰ ਖ਼ਦਸ਼ਾ ਹੈ ਕਿ ਇਸ ਸ਼ਖ਼ਸ ਨੇ ਹੋਰ ਲੋਕਾਂ ਨੂੰ ਵੀ ਆਪਣਾ ਨਿਸ਼ਾਨਾ ਬਣਾਇਆ ਹੋ ਸਕਦਾ ਹੈ। ਪੁਲਿਸ ਨੇ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਵੀ ਇਸ ਵਿਅਕਤੀ ਬਾਰੇ ਕੋਈ ਜਾਣਕਾਰੀ ਹੈ ਜਾਂ ਕਿਸੇ ਹੋਰ ਨਾਲ ਅਜਿਹੀ ਘਟਨਾ ਵਾਪਰੀ ਹੈ ਤਾਂ ਉਹਨਾਂ ਨੂੰ ਤੁਰੰਤ 604-599-0502 'ਤੇ ਸੰਪਰਕ ਕਰਨਾ ਚਾਹੀਦਾ ਹੈ।