ਸਵੀਡਨ ਅਧਿਕਾਰਤ ਤੌਰ ’ਤੇ ਨਾਟੋ ਵਿੱਚ ਹੋਇਆ ਸ਼ਾਮਲ

ਸਵੀਡਨ ਅੱਜ ਤੋਂ ਅਧਿਕਾਰਤ ਤੌਰ ’ਤੇ ਨਾਟੋ ਦਾ 32ਵਾਂ ਮੈਂਬਰ ਬਣ ਗਿਆ ਹੈ। ਇਸ ਦੀ ਅੰਤਿਮ ਪ੍ਰਕਿਰਿਆ ਵੀਰਵਾਰ ਨੂੰ ਵਾਸ਼ਿੰਗਟਨ ਵਿਚ ਪੂਰੀ ਹੋ ਗਈ। ਰੂਸ ਵਲੋਂ ਯੂਕਰੇਨ ’ਤੇ ਹਮਲੇ ਮਗਰੋਂ ਸਵੀਡਨ ਨੇ ਮਈ 2022 ਵਿਚ ਫਿਨਲੈਂਡ ਦੇ ਨਾਲ ਮਿਲ ਕੇ ਨਾਟੋ ਵਿਚ ਸ਼ਾਮਲ ਹੋਣ ਲਈ ਅਰਜ਼ੀ ਦਿੱਤੀ ਸੀ।

ਹੰਗਰੀ ਤੋਂ ਸਹਿਮਤੀ ਨਾ ਮਿਲਣ ਕਾਰਨ ਕਰੀਬ ਦੋ ਸਾਲਾਂ ਤੋਂ ਸਵੀਡਨ ਦੀ ਮੈਂਬਰਿਸ਼ਪ ਰੁਕੀ ਹੋਈ ਸੀ ਪਿਛਲੇ ਮਹੀਨੇ ਹੀ ਹੰਗਰੀ ਦੀ ਸੰਸਦ ਨੇ ਇਸ ਨੂੰ ਹਰੀ ਝੰਡੀ ਦਿੱਤੀ। ਉਥੇ ਹੀ, ਫਿਨਲੈਂਡ ਨੂੰ ਪਿਛਲੇ ਸਾਲ ਨਾਟੋ ਮੈਂਬਰਸ਼ਿਪ ਦੇ ਦਿੱਤੀ ਗਈ ਸੀ।

ਗੌਰਤਲਬ ਹੈ ਕਿ ਸਵੀਡਨ ਵਿਚ 19ਵੀਂ ਸਦੀ ਦੀ ਸ਼ੁਰੂਆਤ ਤੋਂ ਹੀ ਹਥਿਆਰਬੰਦ ਸੰਘਰਸ਼ ਵਿਚ ਨਿਊਟਰਲ ਰਹਿਣ ਦੀ ਨੀਤੀ ਸੀ। ਦੋਵੇਂ ਵਿਸ਼ਵ ਯੁੱਧ ਦੌਰਾਨ ਵੀ ਸਵੀਡਨ ਨਿਊਟਰਲ ਰਿਹਾ ਸੀ ਪਰ ਰੂਸ ਵਲੋਂ ਯੂਕਰੇਨ ’ਤੇ ਹਮਲੇ ਨੇ ਉਸ ਨੂੰ ਆਪਣੀ ਵਿਚਾਰਧਾਰਾ ਬਦਲਣ ਲਈ ਮਜਬੂਰ ਕੀਤਾ।

ਸਵੀਡਨ ਨੇ ਹਾਲ ਹੀ ਵਿਚ ਅਮਰੀਕਾ ਨੂੰ ਆਪਣੇ 17 ਫੌਜੀ ਠਿਕਾਣਿਆਂ ਤੱਕ ਪੂਰੀ ਪਹੁੰਚ ਦੇਣ ਵਾਲੇ ਇੱਕ ਸਮਝੌਤੇ ’ਤੇ ਦਸਤਖਤ ਕੀਤੇ ਹਨ। ਸਵੀਡਨ ਦੀ ਮੈਂਬਰਸ਼ਿਪ ਨੂੰ ਦਰਸਾਉਣ ਲਈ ਸੋਮਵਾਰ ਨੂੰ ਬ੍ਰਸੇਲਜ਼ ਵਿਚ ਨਾਟੋ ਮੁੱਖ ਦਫ਼ਤਰ ਵਿਖੇ ਝੰਡਾ ਚੜ੍ਹਾਉਣ ਦੀ ਰਸਮ ਹੋਵੇਗੀ।