ਬੀ.ਸੀ. ਵਿਚ ਤੇਲ ਕੀਮਤਾਂ ਵਿਚ ਉਛਾਲ ਦੇ ਮੱਦੇਨਜ਼ਰ ਫਿਊਲ ਟੈਕਸ ਰੋਕਣ ਦੀ ਕੀਤੀ ਗਈ ਮੰਗ

ਬੀ.ਸੀ. ਵਿਚ ਤੇਲ ਕੀਮਤਾਂ ਵਿਚ ਉਛਾਲ ਦੇ ਮੱਦੇਨਜ਼ਰ ਕੈਨੇਡੀਅਨ ਟੈਕਸਪੇਅਰਜ਼ ਫੈਡਰੇਸ਼ਨ ਨੇ ਪ੍ਰੀਮੀਅਰ ਡੇਵਿਡ ਈਬੀ ਨੂੰ ਸੂਬਾਈ ਮੋਟਰ ਫਿਊਲ ਟੈਕਸ ਨੂੰ ਅਸਥਾਈ ਤੌਰ 'ਤੇ ਸਸਪੈਂਡ ਕਰਨ ਦੀ ਅਪੀਲ ਕੀਤੀ ਹੈ। ਫੈਡਰੇਸ਼ਨ ਅਨੁਸਾਰ, ਬੀ.ਸੀ. ਦੇ ਡਰਾਈਵਰ ਪੂਰੇ ਕੈਨੇਡਾ ਵਿਚ ਸਭ ਤੋਂ ਵੱਧ ਕੀਮਤ ਅਦਾ ਕਰ ਰਹੇ ਹਨ।

ਮੈਟਰੋ ਵੈਨਕੂਵਰ ਅਤੇ ਵਿਕਟੋਰੀਆ ਵਿਚ ਗੈਸ ਕੀਮਤਾਂ $2 ਪ੍ਰਤੀ ਲਿਟਰ ਤੋਂ ਉੱਪਰ ਚਲੀਆਂ ਗਈਆਂ ਹਨ, ਜਦੋਂਕਿ ਬਾਕੀ ਸੂਬੇ ਵਿਚ ਇਹ $1.80 ਦੇ ਆਸਪਾਸ ਹਨ। ਫੈਡਰੇਸ਼ਨ ਦੇ ਬੀ.ਸੀ. ਡਾਇਰੈਕਟਰ ਕਾਰਸਨ ਬਿੰਦਾ ਮੁਤਾਬਕ, ਤੇਲ ਦੀ ਕੀਮਤਾਂ ਦਾ ਇੱਕ ਵੱਡਾ ਹਿੱਸਾ ਸਿਰਫ਼ ਟੈਕਸ ਹੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਸੂਬਾਈ ਫਿਊਲ ਟੈਕਸ ਮੁਲਤਵੀ ਕੀਤਾ ਜਾਂਦਾ ਹੈ ਤਾਂ ਵੈਨਕੂਵਰ ਵਿਚ ਡਰਾਈਵਰਾਂ ਪ੍ਰਤੀ 64-ਲਿਟਰ ਫਿੱਲ-ਅੱਪ 'ਤੇ $5.44 ਅਤੇ ਬਾਕੀ ਸੂਬੇ ਵਿਚ $9.28 ਤੱਕ ਦੀ ਬਚਤ ਹੋ ਸਕਦੀ ਹੈ।

ਟੈਕਸਪੇਅਰਜ਼ ਫੈਡਰੇਸ਼ਨ ਮੁਤਾਬਕ,ਮੈਟਰੋ ਵੈਨਕੂਵਰ ਵਿਚ ਸੂਬਾਈ ਮੋਟਰ ਫਿਊਲ ਟੈਕਸ ਪ੍ਰਤੀ ਲਿਟਰ 8.5 ਸੈਂਟ ਹੈ, ਜਦੋਂ ਕਿ ਬਾਕੀ ਸੂਬੇ ਵਿਚ ਇਹ ਟੈਕਸ 14.5 ਸੈਂਟ ਪ੍ਰਤੀ ਲਿਟਰ ਬਣਦਾ ਹੈ। ਕਾਰਸਨ ਨੇ ਕਿਹਾ ਕਿ ਪ੍ਰੀਮੀਅਰ ਈਬੀ ਨੂੰ ਇਸ ਸਮੇਂ ਕਾਰਪੋਰੇਟ ਨੂੰ ਦਿੱਤੀਆਂ ਜਾਣ ਵਾਲੀਆਂ ਸਬਸਿਡੀਆਂ ਬੰਦ ਕਰਕੇ ਉਹ ਪੈਸਾ ਆਮ ਜਨਤਾ ਨੂੰ ਟੈਕਸਾਂ ਵਿਚ ਰਾਹਤ ਦੇਣ ਲਈ ਵਰਤਣਾ ਚਾਹੀਦਾ ਹੈ।