13.18C Vancouver 13.18C VancouverOct 26, 2021 9:29 PM - The Canadian Press
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਨਵੇਂ ਕੈਬਿਨੇਟ ਦੇ ਐਲਾਨ ਤੋਂ ਬਾਅਦ ਅੱਜ ਮੀਡੀਆ ਦੇ ਸਵਾਲਾਂ ਦਾ ਜਵਾਬ ਦਿੱਤਾ।
ਇਸੇ ਦੌਰਾਨ ਉਨ੍ਹਾਂ ਦੱਸਿਆ ਕਿ ਅਨੀਤਾ ਅਨੰਦ ਨੂੰ ਰੱਖਿਆ ਮੰਤਰੀ ਦੀ ਜਿੰਮੇਵਾਰੀ ਸੌਂਪਣ ਤੋਂ ਬਾਅਦ ਉਨ੍ਹਾਂ ਤੋਂ ਚੰਗੇ ਪ੍ਰਦਰਸ਼ਨ ਦੀ ਆਸ ਹੈ।
ਉਨ੍ਹਾਂ ਕਿਹਾ ਕਿ ਅਨੀਤਾ ਅਨੰਦ ਦੇ ਇਸ ਅਹੁਦੇ ਨੂੰ ਸੰਭਾਲਣ 'ਤੇ ਉਹ ਬੇਹੱਦ ਉਤਸ਼ਾਹਿਤ ਹਨ।
ਉਨ੍ਹਾਂ ਇਹ ਵੀ ਕਿਹਾ ਕਿ ਮਿਲਟਰੀ 'ਚ ਸਾਹਮਣੇ ਆਏ ਮਸਲਿਆਂ ਦੇ ਹੱਲ ਲਈ ਹਰ ਜਰੂਰੀ ਕਦਮ ਚੁੱਕਿਆ ਜਾਵੇਗਾ।
ਟਰੂਡੋ ਨੇ ਕਿਹਾ ਕਿ ਮਿਲਟਰੀ ਨੇ ਹਰ ਮੌਕੇ ਕੈਨੇਡਾ ਲਈ ਅਹਿਮ ਯੋਗਦਾਨ ਪਾਏ ਹਨ ਚਾਹੇ ਉਹ ਹੜ੍ਹਾਂ ਦਾ ਸਮਾਂ ਹੋਵੇ ਤੇ ਚਾਹੇ ਪੈਂਡੈਮਿਕ ਜਾਂ ਵਾਈਲਡਫਾਇਰਸ ਦਾ ਸਮਾਂ ਹੋਵੇ।
ਟਰੂਡੋ ਨੇ ਅਨੀਤਾ ਅਨੰਦ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਜਲਦੀ ਹੀ ਸਭ ਜਾਣ ਜਾਣਗੇ ਕਿ ਅਨੀਤਾ ਇੱਕ ਬਿਹਤਰੀਨ ਗਵਰਨੈਂਸ ਦੀ ਕਾਬਲੀਅਤ ਰੱਖਦੀ ਹੈ।
ਹਾਲਾਂਕਿ ਇਸ ਮੌਕੇ ਉਨ੍ਹਾਂ ਬਤੌਰ ਰੱਖਿਆ ਮੰਤਰੀ ਹਰਜੀਤ ਸੱਜਣ ਦੇ ਕੀਤੇ ਕੰਮ ਦੀ ਵੀ ਸ਼ਲਾਘਾ ਕੀਤੀ।
ਟਰੂਡੋ ਨੂੰ ਨਵੇਂ ਕੈਬਿਨੇਟ ਤੋਂ ਵੱਡੀਆਂ ਆਸਾਂ
ਅੱਜ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੋਂ ਪੁੱਛਿਆ ਗਿਆ ਕਿ ਚੋਣਾਂ ਦੇ ਨਤੀਜੇ ਪਿਛਲੀਆਂ ਚੋਣਾਂ ਤੋਂ ਕੋਈ ਬਹੁਤੇ ਵੱਖਰੇ ਨਹੀਂ ਸਨ ਤਾਂ ਅਜਿਹੇ 'ਚ ਕੈਬਿਨੇਟ 'ਚ ਇੰਨੀਆਂ ਤਬਦੀਲੀਆਂ ਕਿਉਂ ਕੀਤੀਆਂ ਗਈਆਂ।
ਟਰੂਡੋ ਨੇ ਕਿਹਾ ਕਿ ਇਸ ਇਲੈਕਸ਼ਨ 'ਚ ਇੱਕ ਗੱਲ ਸਪਸ਼ਟ ਸੀ ਕਿ ਕਨੇਡੀਅਨ ਲੋਕ ਇਸ ਸਰਕਾਰ ਤੋਂ ਵੱਡੇ ਫੈਸਲਿਆਂ ਦੀ ਆਸ ਕਰ ਰਹੇ ਹਨ, ਜਿਸ 'ਚ ਕਲਾਈਮੇਟ ਚੇਂਜ, ਰੀਕੰਸੀਲੀਏਸ਼ਨ ਅਤੇ ਇਕਾਨਮੀ ਦੇ ਪ੍ਰਸਾਰ ਤੇ ਇਸ 'ਚ ਸਾਰਿਆਂ ਦੀ ਸ਼ਮੂਲੀਅਤ ਜਿਹੇ ਮਸਲੇ ਸ਼ਾਮਿਲ ਹਨ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਆਸਾਂ 'ਤੇ ਖਰੇ ਉਤਰਨ ਲਈ ਜੋ ਸਭ ਤੋਂ ਬਿਹਤਰ ਕੈਬਿਨੇਟ ਚੁਣਿਆ ਜਾ ਸਕਦਾ ਸੀ, ਉਸ ਦੀ ਚੋਣ ਕੀਤੀ ਗਈ ਹੈ।
ਉਨ੍ਹਾਂ ਕਿਹਾ ਕਿ ਇੱਕ ਤਾਜਾ ਟੀਮ ਕੰਮ ਲਈ ਤਿਆਰ ਹੈ ਅਤੇ ਉਹ ਇਸ ਟੀਮ ਲਈ ਬੇਹੱਦ ਉਤਸ਼ਾਹਿਤ ਹਨ।
