10.19C Vancouver 10.19C VancouverOct 27, 2020 3:40 PM -
ਚੀਨ ਦੀ ਦਿੱਗਜ ਟੈਲੀਕਾਮ ਕੰਪਨੀ ਵੁਆਵੇ ਦੀ ਉੱਚ ਕਾਰਜਕਾਰੀ ਅਧਿਕਾਰੀ, ਮੰਗ ਵੈਨਜੋਹ ਦੀ ਐਕਸਟਰਾਡਿਸ਼ਨ ਦੀ ਸੁਣਵਾਈ ਦਾ ਸਿਲਸਿਲਾ ਬੀ.ਸੀ. ਸੁਪਰੀਮ ਕੋਰਟ ਵਿੱਚ ਅੱਜ ਵੀ ਜਾਰੀ ਹੈ।
ਮੰਗ ਦੇ ਵਕੀਲ ਉਸ ਦੀ ਦੋ ਸਾਲ ਪਹਿਲਾਂ ਕੀਤੀ ਗਿਰਫਤਾਰੀ ਨੂੰ ਗੈਰਕਾਨੂੰਨੀ ਸਾਬਤ ਕਰਨ ਦੇ ਯਤਨ ਕਰ ਰਹੇ ਹਨ ਤਾਂ ਕਿ ਉਸ ਨੂੰ ਕਥਿਤ ਧੋਖਾਧੜੀ ਦੇ ਇਲਜ਼ਾਮਾਂ ਲਈ ਅਮਰੀਕਾ ਜਾਣ ਤੋਂ ਰੋਕਿਆ ਜਾ ਸਕੇ।
ਸੋਮਵਾਰ ਨੂੰ ਅਦਾਲਤ ਸਾਹਮਣੇ ਉਹ ਆਰ.ਸੀ.ਐਮ.ਪੀ. ਅਫਸਰ ਪੇਸ਼ ਹੋਇਆ ਜਿਸ ਨੇ ਮੰਗ ਨੂੰ ਗਿਰਫ਼ਤਾਰ ਕੀਤਾ ਸੀ।
ਉਸ ਮੁਤਾਬਕ ਪੁਲਿਸ ਵਲੋਂ ਜਹਾਜ਼ ‘ਤੇ ਚੜ੍ਹ ਵੈਨਕੂਵਰ ਪਹੁੰਚਣ 'ਤੇ ਤੁਰੰਤ ਮੰਗ ਨੂੰ ਗ੍ਰਿਫਤਾਰ ਕਰਨ ਦੀ ਯੋਜਨਾ ਬਣਾਉਣਾ ਇੱਕ ਸੁਝਾਅ ਸੀ।
ਕੌਂਸਟੇਬਲ ਵਿੰਸਟਨ ਯੇਪ ਮੁਤਾਬਕ ਇਹ ਸੁਝਾਅ ਇੱਕ ਹੋਰ ਪੁਲਿਸ ਅਫਸਰ ਵਲੋਂ ਟੈਕਸਟ ਰਾਹੀਂ ਸਾਂਝਾ ਕੀਤਾ ਗਿਆ ਸੀ ਅਤੇ ਆਮ ਲੋਕਾਂ ਦੀ ਸੁਰਖਿਆ ਨੂੰ ਖ਼ਤਰੇ ਵਿੱਚ ਪਾਉਣ ਦੇ ਡਰ ਕਾਰਨ ਉਨ੍ਹਾਂ ਨੇ ਇਸ ਉੱਤੇ ਅਮਲ ਨਹੀਂ ਕੀਤਾ।
ਇਸ ਦੀ ਬਜਾਏ ਉਨ੍ਹਾਂ ਨੇ ਕੈਨੇਡਾ ਬਾਰਡਰ ਸਰਵਿਸਜ਼ ਏਜੇਂਸੀ ਅਧਿਕਾਰੀਆਂ ਨਾਲ ਮਿਲਕੇ ਮੰਗ ਨੂੰ ਗਿਰਫ਼ਤਾਰ ਕਰਨ ਤੋਂ ਪਹਿਲਾਂ ਕਸਟਮਜ਼ ਅਤੇ ਸਕ੍ਰੀਨਿੰਗ ਤੋਂ ਲੰਘਾਉਣ ਦਾ ਫੈਸਲਾ ਕੀਤਾ।
ਇਸ ਹਫ਼ਤੇ ਅਦਾਲਤ ਵਿਚ ਗਵਾਹੀ ਦੇਣ ਲਈ ਬੁਲਾਏ ਗਏ ਗਵਾਹਾਂ ਨੂੰ ਮੰਗ ਦੇ ਬਚਾਅ ਪੱਖ ਦੁਆਰਾ ਆਉਣ ਦੀ ਬੇਨਤੀ ਕੀਤੀ ਗਈ ਹੈ ਪਰ ਯੇਪ ਦੀ ਪੁੱਛ ਗਿੱਛ ਪਹਿਲਾਂ ਅਟਰਨੀ ਜਨਰਲ ਆਫ ਕੈਨੇਡਾ ਦੇ ਵਕੀਲ ਨੇ ਕੀਤੀ।
