ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਨਾਟੋ ’ਤੇ ਟਿੱਪਣੀ ਨਾਲ ਮਚੀ ਹਲਚਲ

ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਨਾਟੋ ’ਤੇ ਟਿੱਪਣੀ ਨਾਲ ਹਲਚਲ ਮਚੀ ਹੋਈ ਹੈ। ਟਰੰਪ ਨੇ ਹਾਲ ਹੀ ਵਿਚ ਦੱਖਣੀ ਕੈਰੋਲੀਨਾ ਵਿਚ ਰੈਲੀ ਦੌਰਾਨ ਕਿਹਾ ਸੀ ਕਿ ਅਮਰੀਕਾ ਸ਼ਾਇਦ ਉਨ੍ਹਾਂ ਨਾਟੋ ਸਹਿਯੋਗੀਆਂ ਦੀ ਰੱਖਿਆ ਨਹੀਂ ਕਰ ਸਕੇਗਾ ਜੋ ਰੱਖਿਆ ਲਈ ਆਪਣੀ ਵਚਨਬੱਧਤਾ ਮੁਤਾਬਕ ਬਜਟ ਖਰਚ ਨਹੀਂ ਕਰ ਰਹੇ।

ਕੈਨੇਡਾ ਦੇ ਰੱਖਿਆ ਮੰਤਰੀ ਨੇ ਟਰੰਪ ਦੀ ਇਸ ਟਿੱਪਣੀ ’ਤੇ ਬੜੇ ਸੰਭਲ ਕੇ ਕੁਮੈਂਟ ਕੀਤਾ। ਬਿੱਲ ਬਲੇਅਰ ਨੇ ਕਿਹਾ ਕਿ ਮੈਨੂੰ ਨਹੀਂ ਲਗਦਾ ਕਿ ਸਾਨੂੰ ਇਸ ’ਤੇ ਜ਼ਿਆਦਾ ਪ੍ਰਤੀਕਿਰਿਆ ਦੇਣ ਦੀ ਜ਼ਰੂਰਤ ਹੈ ਪਰ ਸਾਨੂੰ ਇਹ ਯਕੀਨੀ ਬਣਾਉਣ ਦੀ ਜ਼ਰੂਰਤ ਹੈ ਕਿ ਅਸੀਂ ਆਪਣੇ ਗੱਠਜੋੜ ਨੂੰ ਮਜ਼ਬੂਤ ​​ਰੱਖੀਏ।

ਟਰੰਪ ਦੀ ਇਹ ਟਿੱਪਣੀ ਇਸ ਲਈ ਮਹੱਤਵਪੂਰਨ ਹੈ ਕਿ ਕਿਉਂਕਿ ਉਨ੍ਹਾਂ ਦੀ ਵਾਈਟ ਹਾਊਸ ਵਿਚ ਵਾਪਸੀ ਦੀ ਸੰਭਾਵਨਾ ਜਤਾਈ ਜਾ ਰਹੀ ਹੈ, ਨਾਲ ਹੀ ਕੈਨੇਡਾ ਫ਼ੌਜੀ ਖ਼ਰਚੇ ਵਿਚ ਹੋਰ ਨਾਟੋ ਮੈਂਬਰ ਦੇ ਮੁਕਾਬਲੇ ਪਿੱਛੇ ਚੱਲ ਰਿਹਾ ਹੈ।

ਕੈਨੇਡਾ ਨੇ 2024-2025 ਤੱਕ ਆਪਣੀ ਜੀ. ਡੀ. ਪੀ. ਦਾ 1.43 ਫੀਸਦੀ ਰੱਖਿਆ ’ਤੇ ਖਰਚ ਹੋਣ ਦੀ ਉਮੀਦ ਜਤਾਈ ਹੈ, ਜੋ ਨਾਟੋ ਲਈ ਕੀਤੀ ਗਈ 2 ਫੀਸਦੀ ਵਚਨਬੱਧਤਾ ਤੋਂ ਘੱਟ ਹੈ।

ਓਧਰ, ਕੈਨੇਡਾ ਦੇ ਰੱਖਿਆ ਮੰਤਰੀ ਨੇ ਸਿੱਧੇ ਤੌਰ ’ਤੇ ਇਹ ਜਵਾਬ ਦੇਣ ਤੋਂ ਇਨਕਾਰ ਕਰ ਦਿੱਤਾ ਕਿ ਕੀ ਕੈਨੇਡਾ ਟਰੰਪ ਦੇ ਦੂਜੇ ਕਾਰਜਕਾਲ ਦੀ ਸਥਿਤੀ ਵਿਚ ਨਾਟੋ ਲਈ ਰੱਖਿਆ ਖਰਚ ਵਧਾਉਣ ਦੀ ਕੋਸ਼ਿਸ਼ ਕਰੇਗਾ।