ਮਾਲਦੀਵ ਦੀ ਮੁਹੰਮਦ ਮੁਈਜ਼ੂ ਸਰਕਾਰ ਨੇ ਭਾਰਤੀ ਫੌਜੀਆਂ ਨੂੰ ਵਾਪਸ ਭੇਜਣ ਦੇ ਮਸਲੇ ’ਤੇ ਗੱਲਬਾਤ ਕੀਤੀ ਸ਼ੁਰੂ

ਮਾਲਦੀਵ ਦੀ ਮੁਹੰਮਦ ਮੁਈਜ਼ੂ ਸਰਕਾਰ ਨੇ ਭਾਰਤੀ ਫੌਜੀਆਂ ਨੂੰ ਵਾਪਸ ਭੇਜਣ ਦੇ ਮਸਲੇ ’ਤੇ ਗੱਲਬਾਤ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਮੁਤਾਬਕ, ਦੋਹਾਂ ਮੁਲਕਾਂ ਵਿਚ ਇਸ ਮੁੱਦੇ ’ਤੇ ਸ਼ੁੱਕਰਵਾਰ ਨੂੰ ਨਵੀਂ ਦਿੱਲੀ ਵਿਚ ਦੂਜੇ ਦੌਰ ਦੀ ਗੱਲਬਾਤ ਹੋਈ।

ਪਹਿਲੀ ਮੀਟਿੰਗ ਮਾਲਦੀਵ ਦੀ ਰਾਜਧਾਨੀ ਮਾਲੇ ਵਿਚ ਹੋਈ ਸੀ। ਇਸ ਦਾ ਮਕਸਦ ਅਜਿਹਾ ਹੱਲ ਤਲਾਸ਼ਣਾ ਹੈ ਜੋ ਦੋਵੇਂ ਮੁਲਕਾਂ ਨੂੰ ਮਨਜ਼ੂਰ ਹੋਵੇ। ਭਾਰਤ ਦੇ ਕਰੀਬ 75 ਫੌਜੀ ਮਾਲਦੀਵ ਵਿਚ ਮੌਜੂਦ ਹਨ, ਜੋ ਗੈਰ ਫੌਜੀ ਕਾਰਵਾਈਆਂ ਵਿਚ ਉੱਥੇ ਦੀ ਫੌਜ ਦੀ ਮਦਦ ਕਰਦੇ ਹਨ।

ਮੁਈਜ਼ੂ ਨੇ ਪਿਛਲੇ ਸਾਲ ਚੋਣ ਪ੍ਰਚਾਰ ਦੌਰਾਨ ਮਾਲਦੀਵ ਵਿਚ ਭਾਰਤੀ ਸੈਨਿਕਾਂ ਦੀ ਮੌਜੂਦਗੀ ਦਾ ਮੁੱਦਾ ਉਠਾਇਆ ਸੀ ਅਤੇ ਉਨ੍ਹਾਂ ਨੂੰ ਵਾਪਸ ਭੇਜਣ ਦੀ ਕੰਪੇਨ ਚਲਾਈ ਸੀ।

ਮਾਲਦੀਵ ਦੀ ਮੁਈਜ਼ੂ ਸਰਕਾਰ ਨੇ ਹਾਲ ਹੀ ਵਿਚ ਭਾਰਤੀ ਫੌਜੀਆਂ ਨੂੰ 15 ਮਾਰਚ ਤੱਕ ਦੇਸ਼ ਛੱਡਣ ਲਈ ਕਿਹਾ ਸੀ। ਰਿਪੋਰਟ ਮੁਤਾਬਕ ਮੁਹੰਮਦ ਮੁਈਜ਼ੂ ਅਤੇ ਪੀਐੱਮ ਨਰਿੰਦਰ ਮੋਦੀ ਦੀ ਪਿਛਲੇ ਸਾਲ ਮੁਲਾਕਾਤ ਦੌਰਾਨ ਵੀ ਇਹ ਮੁੱਦਾ ਉੱਠਿਆ ਸੀ।