ਸੁਪਰੀਮ ਕੋਰਟ ਔਫ ਕੈਨੇਡਾ ਨੇ ਸ਼ੁਤਰਮੁਰਗਾਂ ਦੇ ਝੁੰਡ ਨੂੰ ਮਾਰਨ 'ਤੇ ਲਗਾਈ ਰੋਕ

ਸੁਪਰੀਮ ਕੋਰਟ ਔਫ ਕੈਨੇਡਾ ਨੇ ਬੀ. ਸੀ. ਦੇ ਯੂਨੀਵਰਸਲ ਸ਼ੁਤਰਮੁਰਗ ਫਾਰਮਾਂ ਵਿਚ ਸ਼ੁਤਰਮੁਰਗਾਂ ਦੇ ਝੁੰਡ ਨੂੰ ਮਾਰਨ 'ਤੇ ਅੰਤਰਿਮ ਰੋਕ ਲਗਾ ਦਿੱਤੀ ਹੈ। ਇਸ ਦੀ ਪੁਸ਼ਟੀ ਕੇਟੀ ਪਾਸਿਟਨੀ ਵਲੋਂ ਕੀਤੀ ਗਈ, ਜੋ ਕਿ ਫਾਰਮ ਦੀ ਸਹਿ-ਮਾਲਕ ਕੈਰਨ ਐਸਪਰਸਨ ਦੀ ਧੀ ਹੈ। ਸੁਪਰੀਮ ਕੋਰਟ ਨੇ ਕਿਹਾ ਕਿ ਜਦੋਂ ਤੱਕ ਉਹ ਅਪੀਲ ਲਈ ਅਰਜ਼ੀਆਂ ਉਤੇ ਵਿਚਾਰ ਨਹੀਂ ਕਰਦਾ ਉਦੋਂ ਤੱਕ ਰੋਕ ਬਰਕਰਾਰ ਰਹੇਗੀ।

ਪਾਸਿਟਨੀ ਨੇ ਕਿਹਾ ਕਿ ਇਸ ਨਾਲ ਉਨ੍ਹਾਂ ਦੇ ਫਾਰਮ ਨੂੰ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦੇ ਕੂਲ ਆਰਡਰ ਖਿਲਾਫ ਲੜਾਈ ਲਈ ਹੋਰ ਸਮਾਂ ਮਿਲ ਰਿਹਾ ਹੈ। ਇਸ ਤੋਂ ਪਹਿਲਾਂ ਏਜੰਸੀ ਵਲੋਂ ਆਪਣੀ ਤਿਆਰੀ ਲਈ ਸ਼ੁਤਰਮੁਰਗਾਂ ਦੇ ਝੁੰਡ ਦੇ ਚਾਰੇ ਪਾਸੇ ਘਾਹ ਦੀਆਂ ਗੱਠਾਂ ਦੀ ਦੀਵਾਰ ਸਥਾਪਤ ਕਰ ਦਿੱਤੀ ਗਈ ਸੀ, ਇਹ ਲਗਭਗ ਤਿੰਨ ਮੀਟਰ ਉੱਚੀਆਂ ਸਨ, ਜਿਸ ਨੂੰ ਸਵੇਰ ਅੱਗ ਲੱਗੀ।

ਫਾਇਰ ਫਾਇਟਰ ਮੌਕੇ ਉਤੇ ਅੱਗ ਬਝਾਉਂਦੇ ਦੇਖੇ ਗਏ। ਗੌਰਤਲਬ ਹੈ ਕਿ ਯੂਨੀਵਰਸਲ ਓਸਟ੍ਰਿਚ ਫਾਰਮ ਵਿਚ ਸੋਮਵਾਰ ਤੋਂ ਹੀ ਤਣਾਅ ਬਰਕਰਾਰ ਹੈ, ਜਦੋਂ ਤੋਂ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਅਤੇ ਆਰ.ਸੀ.ਐਮ.ਪੀ. ਅਧਿਕਾਰੀਆਂ ਮੌਕੇ 'ਤੇ ਪਹੁੰਚੇ ਹਨ।