ਐਲਬਰਟਾ ਦੇ ਹਜ਼ਾਰਾਂ ਸਰਕਾਰੀ ਕਰਮਚਾਰੀਆਂ ਨੇ ਹੜਤਾਲ ਦੇ ਹੱਕ 'ਚ ਕੀਤੀ ਵੋਟਿੰਗ

ਐਲਬਰਟਾ ਦੇ ਸਰਕਾਰੀ ਕਰਮਚਾਰੀਆਂ ਨੇ ਤਨਖਾਹ ਵਧਾਉਣ ਦੀ ਮੰਗ ਲਈ ਹੜਤਾਲ ਕਰਵਾਉਣ ਦੇ ਹੱਕ ਵਿਚ ਇਤਿਹਾਸਕ ਵੋਟਿੰਗ ਕੀਤੀ ਹੈ। ਅਲਬਰਟਾ ਯੂਨੀਅਨ ਆਫ਼ ਪ੍ਰੋਵਿੰਸ਼ੀਅਲ ਇੰਪਲਾਈਜ਼ (ਏ.ਯੂ.ਪੀ.ਈ) ਸੂਬੇ ਦੇ ਪ੍ਰਸ਼ਾਸਨ, ਕਾਨੂੰਨ ਪਰਿਵਰਤਨ, ਸੋਸ਼ਲ ਵਰਕ ਅਤੇ ਜੰਗਲੀ ਅੱਗ ਕਾਬੂ ਕਰਨ ਵਾਲੇ ਕਰੀਬ 23 ਹਜ਼ਾਰ ਕਾਮਿਆਂ ਦੀ ਨੁਮਾਇੰਦਗੀ ਕਰਦੀ ਹੈ। ਇਸ ਨੇ ਬੀਤੇ ਦਿਨ ਜਾਣਕਾਰੀ ਦਿੱਤੀ ਕਿ ਚੰਗੀ ਤਨਖਾਹ, ਕੰਮ ਦੀ ਸੁਰੱਖਿਆ ਅਤੇ ਕੰਮ ਦੀਆਂ ਸਥਿਤੀਆਂ ਬਿਹਤਰ ਕਰਨ ਦੀ ਮੰਗ ਨੂੰ ਲੈ ਕੇ ਇਸ ਦੇ 90 ਫੀਸਦੀ ਮੈਂਬਰਾਂ ਨੇ ਹੜਤਾਲ 'ਤੇ ਜਾਣ ਦਾ ਫੈਸਲਾ ਲਿਆ ਹੈ।

ਯੂਨੀਅਨ ਮੁਤਾਬਕ ਉਹ ਕਰੀਬ ਇਕ ਸਾਲ ਤੋਂ ਇਸ ਲਈ ਗੱਲ ਕਰ ਰਰਹੇ ਹਨ ਪਰ 16 ਅਪ੍ਰੈਲ ਨੂੰ ਗੱਲਬਾਤ ਬੰਦ ਕਰ ਦਿੱਤੀ ਗਈ ਸੀ। 2017 ਤੱਕ ਸੂਬੇ ਦੇ ਪਬਲਿਕ ਸੈਕਟਰ ਦੇ ਵਰਕਰਜ਼ ਨੂੰ ਹੜਤਾਲ ਕਰਨ ਦਾ ਕਾਨੂੰਨੀ ਹੱਕ ਨਹੀਂ ਸੀ। ਕਰੀਬ 106 ਸਾਲਾ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਇੰਨੀ ਵੱਡੀ ਗਿਣਤੀ ਵਿਚ ਲੋਕਾਂ ਨੇ ਹੜਤਾਲ ਦੇ ਹੱਕ ਵਿਚ ਵੋਟਿੰਗ ਕੀਤੀ ਹੈ। ਇਸ ਦੇ ਨਤੀਜੇ ਅਲਬਰਟਾ ਲੇਬਰ ਰਿਲੇਸ਼ਨਜ਼ ਬੋਰਡ ਨੂੰ ਸੌਂਪ ਦਿੱਤੇ ਗਏ ਹਨ। ਫਿਲਹਾਲ ਹੜਤਾਲ ਦੀ ਤਾਰੀਖ ਨਿਸ਼ਚਿਤ ਨਹੀਂ ਕੀਤੀ ਗਈ। ਸੂਬੇ ਦੇ ਵਿੱਤ ਮੰਤਰੀ ਨੈਟ ਹੌਰਨਰ ਨੇ 90 ਫੀਸਦੀ ਲੋਕਾਂ ਵਲੋਂ ਹੜਤਾਲ ਦੇ ਪੱਖ ਵਿਚ ਵੋਟਿੰਗ ਨੂੰ ਮੰਦਭਾਗਾ ਦੱਸਿਆ ਹੈ।