ਕੈਨੇਡਾ ਪੋਸਟ ਦੀ ਹੜਤਾਲ ਜਾਰੀ ਰਹਿਣ ਕਾਰਨ ਹਜ਼ਾਰਾਂ ਕੈਨੇਡੀਅਨਾਂ ਦੇ ਪਾਸਪੋਰਟ ਫਸੇ

ਕੈਨੇਡਾ ਪੋਸਟ ਦੀ ਹੜਤਾਲ ਜਾਰੀ ਰਹਿਣ ਕਾਰਨ ਹਜ਼ਾਰਾਂ ਕੈਨੇਡੀਅਨਾਂ ਦੇ ਪਾਸਪੋਰਟ ਫਸ ਗਏ ਹਨ। ਸਰਵਿਸ ਕੈਨੇਡਾ ਵਲੋਂ 85,000 ਪਾਸਪੋਰਟ ਰੋਕ ਕੇ ਰੱਖੇ ਗਏ ਹਨ। ਰੁਜ਼ਗਾਰ ਅਤੇ ਸਮਾਜਿਕ ਵਿਕਾਸ ਡਿਪਾਰਟਮੈਂਟ ਨੇ ਦੱਸਿਆ ਹੈ ਕਿ ਹੜਤਾਲ ਦੀ ਸੰਭਾਵਨਾ ਦੇਖਦੇ ਹੋਏ ਸਰਵਿਸ ਕੈਨੇਡਾ ਨੇ ਹਫ਼ਤਾ ਪਹਿਲਾਂ ਹੀ 8 ਨਵੰਬਰ ਨੂੰ ਪਾਸਪੋਰਟ ਭੇਜਣਾ ਬੰਦ ਕਰ ਦਿੱਤਾ ਸੀ ਕਿਉਂਕਿ ਇਹ ਰਸਤੇ ਵਿਚ ਫਸ ਸਕਦੇ ਸਨ।

ਬੁਲਾਰੇ ਮੀਲਾ ਰਾਏ ਨੇ ਕਿਹਾ ਕਿ ਜੇ ਕਿਸੇ ਨੇ ਹੜਤਾਲ ਸ਼ੁਰੂ ਹੋਣ ਤੋਂ ਠੀਕ ਪਹਿਲਾਂ ਆਪਣੀ ਪਾਸਪੋਰਟ ਅਰਜ਼ੀ ਡਾਕ ਰਾਹੀਂ ਭੇਜੀ ਹੈ ਤਾਂ ਹੋ ਸਕਦਾ ਹੈ ਕਿ ਸਰਵਿਸ ਕੈਨੇਡਾ ਨੂੰ ਅਰਜ਼ੀ ਪ੍ਰਾਪਤ ਨਾ ਹੋਈ ਹੋਵੇ, ਇਸ ਲਈ ਅਜਿਹੇ ਲੋਕਾਂ ਨੂੰ ਵੀ ਹੜਤਾਲ ਸਮਾਪਤ ਹੋਣ ਅਤੇ ਡਾਕ ਸੇਵਾਵਾਂ ਬਹਾਲ ਹੋਣ ਦਾ ਇੰਤਜ਼ਾਰ ਕਰਨਾ ਹੋਵੇਗਾ।

ਉਥੇ ਹੀ, ਜਿਨ੍ਹਾਂ ਕੈਨੇਡੀਅਨਾਂ ਨੇ ਪਹਿਲਾਂ ਹੀ ਅਰਜ਼ੀਆਂ ਸਬਮਿਟ ਕੀਤੀਆਂ ਸਨ ਅਤੇ ਉਨ੍ਹਾਂ ਨੂੰ ਪਾਸਪੋਰਟ ਦੀ ਤੁਰੰਤ ਲੋੜ ਹੈ ਤਾਂ ਇਸ ਸਥਿਤੀ ਵਿਚ ਉਨ੍ਹਾਂ ਨੂੰ ਪਾਸਪੋਰਟ ਪ੍ਰੋਗਰਾਮ ਨਾਲ 1-800-567-6868 ’ਤੇ ਸੰਪਰਕ ਕਰਨ ਲਈ ਕਿਹਾ ਗਿਆ ਹੈ। ਇਸ ਤੋਂ ਇਲਾਵਾ ਸਰਵਿਸ ਕੈਨੇਡਾ ਦੇ ਸੈਂਟਰ ਵੀ ਵਿਜ਼ਿਟ ਕੀਤਾ ਜਾ ਸਕਦਾ ਹੈ।