ਕੈਲਗਰੀ ਸਟੈਂਪੀਡ ਵਿਚ ਤਿੰਨ ਲੋਕਾਂ 'ਤੇ ਚਾਕੂ ਨਾਲ ਹਮਲਾ

ਕੈਲਗਰੀ ਸਟੈਂਪੀਡ ਵਿਚ ਮੰਗਲਵਾਰ ਰਾਤ ਤਿੰਨ ਲੋਕਾਂ 'ਤੇ ਚਾਕੂ ਨਾਲ ਹਮਲਾ ਹੋਇਆ। ਪੁਲਿਸ ਨੇ ਕਿਹਾ ਕਿ ਇਹ ਟਾਰਗੇਟਿਡ ਹਮਲਾ ਸੀ ਅਤੇ ਪੀੜਤ ਗੰਭੀਰ ਰੂਪ ਵਿਚ ਜ਼ਖਮੀ ਸਨ, ਜਿਨ੍ਹਾਂ ਦਾ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ। ਪੁਲਿਸ ਨੂੰ ਪਹਿਲਾਂ ਰਾਤ ਕਰੀਬ 11 ਵਜੇ ਸਟੈਂਪੀਡ ਮਿਡਵੇਅ ਵਿਚ ਲੱਗੇ ਝੂਲਿਆਂ ਵਿਚੋਂ ਇੱਕ ਯੂਰੋਸਲਾਈਡ ਕੋਲ ਵਾਰਦਾਤ ਹੋਣ ਦੀ ਸੂਚਨਾ ਮਿਲੀ, ਜਿੱਥੇ ਅਧਿਕਾਰੀਆਂ ਨੂੰ ਮੌਕੇ 'ਤੇ ਇੱਕ ਵਿਅਕਤੀ ਜ਼ਖਮੀ ਮਿਲਿਆ, ਜਿਸ ਨੂੰ ਜਾਨਲੇਵਾ ਪਰ ਸਥਿਰ ਹਾਲਤ ਵਿਚ ਹਸਪਤਾਲ ਪਹੁੰਚਾਇਆ ਗਿਆ।

ਇਸ ਤੋਂ ਥੋੜ੍ਹੀ ਦੇਰ ਬਾਅਦ ਹੀ ਅਧਿਕਾਰੀਆਂ ਨੂੰ 17 ਐਵੇਨਿਊ ਸਾਊਥ ਈਸਟ ਅਤੇ ਮੈਕਲੋਡ ਟ੍ਰੇਲ ਦੇ ਖੇਤਰ ਵਿਚ ਅਤੇ ਫਿਰ ਅਰਲਟਨ ਸਟ੍ਰੀਟ ਸਾਊਥ ਵੈਸਟ ਤੇ 27 ਐਵੇਨਿਊ ਸਾਊਥ ਵੈਸਟ ਦੇ ਨੇੜੇ ਕੁੱਲ ਦੋ ਵਿਅਕਤੀਆਂ ਦੇ ਜ਼ਖਮੀ ਹਾਲਤ ਵਿਚ ਹੋਣ ਦੀ ਰਿਪੋਰਟ ਮਿਲੀ।

ਪੁਲਿਸ ਮੁਤਾਬਕ, ਇਨ੍ਹਾਂ ਦੋਹਾਂ ਦੀ ਹਾਲਤ ਵੀ ਗੰਭੀਰ ਪਰ ਸਥਿਰ ਸੀ। ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਤਿੰਨੋਂ ਹਮਲੇ ਆਪਸ ਵਿਚ ਜੁੜੇ ਹਨ ਅਤੇ ਟਾਰਗੇਟਿਡ ਸਨ। ਹੁਣ ਤੱਕ ਸ਼ੱਕੀਆਂ ਦੀ ਪਛਾਣ ਜਾਂ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ।