15.99C Vancouver 15.99C VancouverAug 5, 2021 12:52 PM -
ਟੋਕੀਓ ਓਲੰਪਿਕਸ ਵਿੱਚ ਵੀਰਵਾਰ ਨੂੰ ਪਹਿਲਵਾਨ ਰਵੀ ਦਹੀਆ ਵੱਲੋਂ ਚਾਂਦੀ ਦਾ ਤਮਗ਼ਾ ਜਿੱਤਣ 'ਤੇ, ਭਾਰਤ ਦੇ ਸਦਰ ਰਾਮ ਨਾਥ ਕੋਵਿੰਦ ਅਤੇ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਵਧਾਈ ਦਿੱਤੀ ਹੈ।
"ਭਾਰਤ #ਟੋਕੀਓ ਓਲੰਪਿਕਸ ਵਿੱਚ ਪਹਿਲਵਾਨੀ 'ਚ ਚਾਂਦੀ ਦਾ ਤਮਗ਼ਾ ਜਿੱਤਣ 'ਤੇ, ਰਵੀ ਦਹੀਆ 'ਤੇ ਮਾਣ ਕਰਦਾ ਹੈ। ਤੁਸੀਂ ਬਹੁਤ ਮੁਸ਼ਕਿਲ ਹਾਲਾਤ ਵਿੱਚੋਂ ਵਾਪਸੀ ਕਰਕੇ ਜਿੱਤੇ ਹੋ। ਇੱਕ ਸੱਚੇ ਜੇਤੂ ਦੀ ਤਰਾਂ, ਤੁਸੀਂ ਆਪਣੀ ਅੰਦਰੂਨੀ ਤਾਕਤ ਵੀ ਵਿਖਾਈ ਹੈ। ਤੁਹਾਡੀ ਇਸ ਮਿਸਾਲੀ ਜਿੱਤ ਅਤੇ ਭਾਰਤ ਦਾ ਮਾਣ ਵਧਾਉਣ 'ਤੇ ਤੁਹਾਨੂੰ ਵਧਾਈਆਂ,"ਸਦਰ ਐਵਾਨ ਨੇ ਟਵੀਟ ਕੀਤਾ।
ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਆਖਿਆ ਕਿ ਮੁਲਕ ਨੂੰ ਰਵੀ ਦਹੀਆ ਦੀ ਉਪਲਬਧੀ 'ਤੇ ਮਾਣ ਹੈ।
"ਰਵੀ ਕੁਮਾਰ ਦਹੀਆ ਇੱਕ ਸ਼ਾਨਦਾਰ ਪਹਿਲਵਾਨ ਹੈ। ਉਨ੍ਹਾਂ ਦਾ ਜੋਸ਼ ਅਤੇ ਦ੍ਰਿੜ੍ਹਤਾ ਕਮਾਲ ਦੀ ਹੈ। #ਟੋਕੀਓ ਓਲੰਪਿਕਸ ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਣ 'ਤੇ ਉਨ੍ਹਾਂ ਨੂੰ ਮੁਬਾਰਕਬਾਦ। ਭਾਰਤ ਨੂੰ ਉਨ੍ਹਾਂ ਦੀਆਂ ਉਪਲਬਧੀਆਂ 'ਤੇ ਮਾਣ ਹੈ,"ਪ੍ਰਧਾਨ ਮੰਤਰੀ ਮੋਦੀ ਨੇ ਟਵੀਟ ਕੀਤਾ।
ਕੇਂਦਰੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਵੀ ਦਹੀਆ ਨੂੰ ਵਧਾਈ ਦਿੱਤੀ।
"#ਓਲੰਪਿਕਸ ਵਿੱਚ ਚਾਂਦੀ ਦਾ ਤਮਗ਼ਾ ਜਿੱਤਣ 'ਤੇ ਰਵੀ ਦਹੀਆ ਨੂੰ ਮੁਬਾਰਕਬਾਦ। ਉਨ੍ਹਾਂ ਨੇ ਆਪਣੇ ਆਪ ਨੂੰ ਇੱਕ ਵਧੀਆ ਪਹਿਲਵਾਨ ਅਤੇ ਇੱਕ ਲਾਜਵਾਬ ਖਿਡਾਰੀ ਦੇ ਤੌਰ 'ਤੇ ਪੇਸ਼ ਕੀਤਾ ਹੈ। ਆਪਣੀ ਉਪਲਬਧੀ ਨਾਲ ਉਨ੍ਹਾਂ ਨੇ ਮੁਲਕ ਨੂੰ ਮਾਣ ਬਖਸ਼ਿਆ ਹੈ,"ਸਿੰਘ ਨੇ ਟਵੀਟ ਕੀਤਾ।
ਦੱਸਣਯੋਗ ਹੈ ਕਿ ਵੀਰਵਾਰ ਨੂੰ ਭਾਰਤੀ ਪਹਿਲਵਾਨ ਰਵੀ ਦਹੀਆ ਨੇ ਟੋਕੀਓ ਓਲੰਪਿਕਸ ਵਿੱਚ ਰੂਸੀ ਓਲੰਪਿਕ ਕਮੇਟੀ ਦੇ ਜ਼ਾਵੁਰ ਉਗੁਏਵ ਤੋਂ, ਮਰਦਾਂ ਦੀ 57 ਕਿਲੋ ਦੇ ਫ਼੍ਰੀ ਸਟਾਈਲ ਵਰਗ ਵਿੱਚ ਹਾਰ ਕੇ ਚਾਂਦੀ ਦਾ ਤਮਗ਼ਾ ਹਾਸਲ ਕੀਤਾ।
ਉਗੁਏਵ ਨੇ ਮੈਚ ਦੀ ਸ਼ੁਰੂਆਤ ਵਿੱਚ ਹੀ ਆਪਣਾ ਦਬਦਬਾ ਕਾਇਮ ਕਰ ਲਿਆ ਸੀ ਅਤੇ ਭਾਰਤੀ ਪਹਿਲਵਾਨ ਨੂੰ ਕੋਈ ਮੌਕਾ ਹੀ ਨਹੀਂ ਦਿੱਤਾ, ਜਿਸ ਕਰਕੇ ਭਾਰਤ ਪਹਿਲਵਾਨੀ ਵਿੱਚ ਆਪਣੇ ਪਹਿਲੇ ਸੋਨ ਤਮਗ਼ੇ ਤੋਂ ਖੁੰਝ ਗਿਆ।
