16.28C Vancouver 16.28C VancouverFeb 25, 2021 8:21 AM -
ਕਿਸਾਨੀ ਸੰਘਰਸ਼ ਨਾਲ ਸਬੰਧਿਤ 'ਟੂਲਕਿੱਟ' ਦਸਤਾਵੇਜ਼ ਦੇ ਮਾਮਲੇ 'ਚ ਅੱਜ ਵੀਰਵਾਰ ਨੂੰ ਦਿੱਲੀ ਦੀ ਇੱਕ ਅਦਾਲਤ ਵੱਲੋਂ ਸ਼ਾਂਤਨੂ ਮੁਲੁਕ ਨੂੰ 9 ਮਾਰਚ ਤੱਕ ਗ੍ਰਿਫ਼ਤਾਰੀ ਤੋਂ ਅੰਤਰਿਮ ਸੁਰੱਖਿਆ ਦੀ ਰਾਹਤ ਦੇ ਦਿੱਤੀ ਗਈ ਹੈ|
ਐਡੀਸ਼ਨਲ ਸੈਸ਼ਨ ਜੱਜ ਧਰਮਿੰਦਰ ਰਾਣਾ ਨੇ ਇਸ ਮਾਮਲੇ ਦੀ ਸੁਣਵਾਈ 9 ਮਾਰਚ ਤੱਕ ਇਸ ਲਈ ਟਾਲੀ, ਕਿਉਂਕਿ ਦਿੱਲੀ ਪੁਲਿਸ ਨੇ ਇਸ ਮਾਮਲੇ 'ਚ ਵਿਸਥਾਰਤ ਜਵਾਬ ਦਾਖਲ ਕਰਨ ਲਈ ਹੋਰ ਸਮੇਂ ਦੀ ਮੰਗ ਕੀਤੀ ਸੀ|
ਐਡੀਸ਼ਨਲ ਪਬਲਿਕ ਪ੍ਰੋਸੀਕੂਟਰ ਇਰਫ਼ਾਨ ਅਹਿਮਦ ਵੱਲੋਂ ਇਸ ਮਾਮਲੇ 'ਚ ਵਿਸਥਾਰ 'ਚ ਜਵਾਬ ਦੇਣ ਲਈ 7 ਦਿਨਾਂ ਦਾ ਹੋਰ ਸਮਾਂ ਮੰਗਿਆ ਗਿਆ, ਤਾਂ ਜੋ ਜਾਂਚ ਏਜੰਸੀ ਕਥਿਤ ਦੋਸ਼ੀ ਵੱਲੋਂ ਦਿੱਤੇ ਗਏ ਵਿਰੋਧਾਭਾਸ ਵਾਲੇ ਜਵਾਬਾਂ ਦੇ ਮਾਮਲੇ 'ਚ ਹੋਰ ਪੁੱਛ-ਗਿੱਛ ਕਰ ਸਕੇ|
ਮੁਲੁਕ ਦੀ ਵਕੀਲ ਵ੍ਰਿੰਦਾ ਗਰੋਵਰ ਨੇ ਕਿਹਾ ਕਿ ਇਸ 'ਤੇ ਉਨ੍ਹਾਂ ਨੂੰ ਕੋਈ ਐਤਰਾਜ਼ ਨਹੀਂ ਹੈ ਪਰ ਉਹਨਾਂ ਨੇ ਅਦਾਲਤ ਨੂੰ ਉਸਦੀ ਅੰਤਰਿਮ ਸੁਰੱਖਿਆ ਵਧਾਉਣ ਲਈ ਬੇਨਤੀ ਕੀਤੀ|
ਪ੍ਰੋਸੀਕੂਟਰ ਅਹਿਮਦ ਨੇ ਆਖਿਆ ਕਿ ਉਸਨੂੰ ਹਦਾਇਤਾਂ ਮਿਲੀਆਂ ਹੋਈਆਂ ਹਨ ਕਿ ਉਸ ਖ਼ਿਲਾਫ਼ ਕੋਈ ਵੀ ਕਾਰਵਾਈ ਜ਼ਬਰਦਸਤੀ ਨਹੀਂ ਕੀਤੀ ਜਾਵੇਗੀ|
ਦੱਸਣਯੋਗ ਹੈ ਕਿ ਸ਼ਾਂਤਨੂ ਮੁਲੁਕ ਕਿਸਾਨਾਂ ਨਾਲ ਜੁੜੇ 'ਟੂਲਕਿੱਟ' ਦਸਤਾਵੇਜ਼ ਮਾਮਲੇ 'ਚ ਸ਼ੱਕੀ ਹੈ|
ਸ਼ਾਂਤਨੂ ਮੁਲੁਕ ਨੂੰ 21 ਸਾਲਾ ਸਹਿ-ਦੋਸ਼ੀ 'ਵਾਤਾਵਰਨ ਕਾਰਕੁੰਨ' ਦਿਸ਼ਾ ਰਵੀ ਨਾਲਕੌਮੀ ਰਾਜਧਾਨੀ 'ਚ ਦਿੱਲੀ ਪੁਲਿਸ ਦੇ ਸਾਈਬਰ ਸੈੱਲ ਦੇ ਦਫ਼ਤਰ 'ਚ ਚੱਲ ਰਹੇ ਮਾਮਲੇ 'ਚ ਅਗਲੀ ਪੁੱਛ-ਗਿੱਛ ਲਈ ਲਿਆਂਦਾ ਗਿਆ ਸੀ|
ਦਿਸ਼ਾ ਰਵੀ ਨੂੰ ਦਿੱਲੀ ਦੀ ਅਦਾਲਤ ਵੱਲੋਂ ਮੰਗਲਵਾਰ ਨੂੰ ਜ਼ਮਾਨਤ ਦੇ ਦਿੱਤੀ ਗਈ ਹੈ|
21 ਸਾਲਾ ਕਾਰਕੁੰਨ ਨੂੰ ਕਿਸਾਨਾਂ ਦੇ ਸੰਘਰਸ਼ ਨਾਲ ਜੁੜੇ 'ਟੂਲਕਿੱਟ' ਦਸਤਾਵੇਜ਼ ਨੂੰ ਬਣਾਉਣ ਅਤੇ ਉਸਦਾ ਪ੍ਰਸਾਰ ਕਰਨ ਦੇ ਮਾਮਲੇ 'ਚ ਬੈਂਗਲੁਰੂ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ|
ਉਹ 'ਟੂਲਕਿੱਟ' ਦਸਤਾਵੇਜ਼ ਦੇ ਐਡੀਟਰਾਂ 'ਚੋਂ ਇੱਕ ਸੀ|
3 ਫਰਵਰੀ ਨੂੰ ਸਵੀਡਨ ਦੀ ਵਾਤਾਵਰਨ ਕਾਰਕੁੰਨ ਗ੍ਰੇਟ ਥਨਬਰਗ ਨੇ ਇਹ 'ਟੂਲਕਿੱਟ' ਟਵੀਟ ਕਰਕੇ ਸਾਂਝੀ ਕੀਤੀ ਸੀ,ਜਿਸਨੂੰ ਉਸਨੇ ਬਾਅਦ ਵਿਚ ਹਟਾਅ ਦਿੱਤਾ ਸੀ|
ਗ੍ਰੇਟ ਵੱਲੋਂ ਦਿੱਲੀ ਦੇ ਬਾਰਡਰਾਂ 'ਤੇ ਨਵੇਂ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਚੱਲ ਰਹੇ ਕਿਸਾਨਾਂ ਦੇ ਪ੍ਰਦਰਸ਼ਨ ਨੂੰ ਵੀ ਸਮਰਥਨ ਦਿੱਤਾ ਗਿਆ ਸੀ|
