22.18C Vancouver 22.18C VancouverJul 23, 2020 3:42 PM -
ਵਿਰੋਧੀ ਪਾਰਟੀਆਂ ਵੱਲੋਂ ‘ਵੀ’ ਸੰਗਠਨ ਵਿਵਾਦ ਦੇ ਸੰਬੰਧ ਵਿੱਚ ਜਿੱਥੇ ਵਿੱਤ ਮੰਤਰੀ ਬਿੱਲ ਮੋਰਨੋ ਦੇ ਅਸਤੀਫੇ ਦੀ ਮੰਗ ਕੀਤੀ ਜਾ ਰਹੀ ਹੈ ਉੱਥੇ ਹੀ ਐਥਿਕਸ ਕਮਿਸ਼ਨਰ ਵੱਲੋਂ ਕੀਤੀ ਜਾ ਰਹੀ ਜਾਂਚ ਦਾ ਦਾਇਰਾ ਫੈਲਾਉਣ ਦੀ ਮੰਗ ਵੀ ਜਾਰੀ ਹੈ।
ਕੰਜ਼ਰਵੇਟਿਵ ਅਤੇ ਨਿਊ ਡੈਮੋਕਰੇਟ ਪਾਰਟੀਆਂ ਨੇ ਐਥਿਕਸ ਕਮਿਸ਼ਨਰ ਮਾਰੀਓ ਡਿਓਨ ਨੂੰ ਮੋਰਨੋ ਵੱਲੋਂ ਕੀਤੀਆਂ ਯਾਤਰਾਵਾਂ ਦੀ ਜਾਂਚ ਕਰਨ ਲਈ ਕਿਹਾ ਹੈ ਜਿਸ ਦਾ ਖਰਚਾ 'ਵੀ’ ਸੰਗਠਨ ਵੱਲੋਂ ਚੁੱਕਿਆ ਗਿਆ ਸੀ।
ਕੱਲ੍ਹ ਫਾਈਨਾਂਸ ਕਮੇਟੀ ਸਾਹਮਣੇ ਪੇਸ਼ ਹੋਣ ਤੇ ਮੋਰਨੋ ਨੇ ਮੰਨਿਆ ਕਿ 'ਵੀ ਸੰਗਠਨ' ਨਾਲ ਸੰਬੰਧਤ ਕਿਸੇ ਮਨੁੱਖਤਾ ਸੰਬੰਧੀ ਕੰਮ ਲਈ ਸਾਲ 2017 'ਚ ਕੀਤੀ ਇਕੁਏਡੌਰ ਅਤੇ ਕੀਨੀਆ ਦੀ ਯਾਤਰਾ ਦੇ ਬਿੱਲ ਉਨ੍ਹਾਂ ਨਹੀਂ ਭਰੇ ਸਨ।
ਮੋਰਨੋ ਨੇ ਮੰਨਿਆ ਕਿ ਉਨ੍ਹਾਂ ਕੱਲ੍ਹ ਚੈਰਿਟੀ ਨੂੰ $41,366 ਦਾ ਚੈੱਕ ਭੇਜਿਆ ਹੈ, ਤਾਂ ਜੋ ਉਨ੍ਹਾਂ ਵੱਲੋਂ ਯਾਤਰਾ ਦੇ ਖਰਚੇ ਦੀ ਭਰਪਾਈ ਕੀਤੀ ਜਾਵੇ।
‘ਵੀ’ ਦਾ ਕਹਿਣਾ ਹੈ ਕਿ ਇਨ੍ਹਾਂ ਯਾਤਰਾਵਾਂ ਦਾ ਖ਼ਰਚਾ ਸੰਸਥਾ ਵੱਲੋਂ ਚੁੱਕਿਆ ਜਾਣਾ ਸੀ ਤਾਂ ਕਿ ਡੋਨਰਾਂ ਨੂੰ ਹੋਰ ਡੋਨੇਸ਼ਨਾਂ ਦੇਣ ਲਈ ਉਤਸ਼ਾਹਤ ਕੀਤਾ ਜਾ ਸਕੇ।
ਕੰਜ਼ਰਵੇਟਿਵ ਫਾਇਨਾਂਸ ਕ੍ਰਿਟਿਕ ਪੀਅਰ ਪਾਲਿਵਿਅਰ ਦਾ ਕਹਿਣਾ ਹੈ ਕਿ ਇਹ ਯਾਤਰਾਵਾਂ ਉਸ ‘ਕਾਨਫਲਿਕਟ ਆਫ ਇੰਟਰਸਟ’ ਕਾਨੂੰਨ ਦੇ ਕਈ ਹਿੱਸਿਆਂ ਦੀ ਉਲੰਘਣਾ ਕਰਦੀਆਂ ਹਨ ਜਿਸ ਵਿੱਚ ਮੰਤਰੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਅਜਿਹਾ ਕਰਨ ਦੀ ਇਜਾਜ਼ਤ ਨਹੀਂ ਹੁੰਦੀ ਅਤੇ ਮੋਰਨੋ ਨੂੰ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦੇਣਾ ਚਾਹੀਦਾ ਹੈ।
ਐੱਨ.ਡੀ.ਪੀ. ਐੱਮ.ਪੀ. ਚਾਰਲੀ ਐਂਗਸ ਨੇ ਐਥਿਕਸ ਕਮਿਸ਼ਨਰ ਨੂੰ ਚਿੱਠੀ ਵਿੱਚ ਕਿਹਾ ਕਿ ਇਹ ਯਾਤਰਾਵਾਂ ਮੋਰਨੋ ਦੀ ‘ਵੀ’ ਸੰਗਠਨ ਨਾਲ ਸਰਕਾਰ ਦੇ ਸਟੂਡੈਂਟ ਵਾਲੰਟੀਅਰ ਪ੍ਰੋਗਰਾਮ ਦੇ $912 ਮਿਲੀਅਨ ਦੇ ਸਮਝੌਤੇ ਵਿੱਚ ਸ਼ਮੂਲੀਅਤ ਉੱਤੇ ਹੋਰ ਵੀ ਸਵਾਲ ਖੜ੍ਹੇ ਕਰਦੀਆਂ ਹਨ।
