16.85C Vancouver 16.85C VancouverFeb 23, 2021 4:46 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਅੱਜ ਮੰਗਲਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਜੋ ਬਾਇਡਨ ਨਾਲ ਬੈਠਕ ਹੋਣ ਜਾ ਰਹੀ ਹੈ। ਵਰਚੂਅਲ ਢੰਗ ਨਾਲ ਹੋਣ ਜਾ ਰਹੀ ਇਹ ਗੱਲਬਾਤ ਬਾਇਡਨ ਦੇ ਰਾਸ਼ਟਰਪਤੀ ਚੁਣੇ ਜਾਣ ਤੋਂ ਬਾਅਦ ਪਹਿਲੀ ਦੁਵੱਲੀ ਬੈਠਕ ਹੋਵੇਗੀ।
ਅੱਜ ਦੀ ਗੱਲਬਾਤ ਦਾ ਮੁੱਖ ਕੇਂਦਰ ਮਹਾਂਮਾਰੀ, ਮੌਸਮੀ ਤਬਦੀਲੀ, ਡਿਫੈਂਸ ਅਤੇ ਸਮਾਜਕ ਨਿਆਂ ਹੋਵੇਗਾ।
ਵ੍ਹਾਈਟ ਹਾਊਸ ਵੱਲੋਂ ਜਾਰੀ ਕੀਤੇ ਗਏ ਦਸਤਾਵੇਜ਼ ਮੁਤਾਬਕ ਅੱਜ ਦੀ ਬੈਠਕ ਵਿਚ 6 ਵਿਸ਼ਿਆਂ ਨੂੰ ਤਰਜੀਹ ਦਿੱਤੀ ਜਾਵੇਗੀ ਜਿਨ੍ਹਾਂ ਵਿੱਚ ਕੋਵਿਡ-19 ਮਹਾਂਮਾਰੀ ਨੂੰ ਖਤਮ ਕਰਨਾ, ਬਾਰਡਰ ਦੇ ਦੋਵੇਂ ਪਾਸੇ ਆਰਥਿਕਤਾ ਨੂੰ ਹੁੰਗਾਰਾ ਦੇਣਾ ਅਤੇ 2050 ਤੱਕ ‘ਨੈੱਟ ਜ਼ੀਰੋ ਇਮਿਸ਼ਨ’ ਦੇ ਯਤਨਾਂ ਬਾਰੇ ਵਿਚਾਰ ਵਟਾਂਦਰਾ ਕਰਨਾ ਸ਼ਾਮਲ ਹੈ।
ਦੂਜੇ ਖੇਤਰਾਂ ਵਿੱਚ ਸਮਾਜਿਕ ਵਿਭਿੰਨਤਾ ਅਤੇ ਸੁਧਾਰ ਸ਼ਾਮਲ ਕਰਨਾ, ਮਹਾਂਦੀਪੀ ਬਚਾਅ ਵਿੱਚ ਸਹਿਯੋਗ ਵਧਾਉਣਾ, ਅਤੇ ਨੇਟੋ ਅਤੇ ਡਬਲਯੂ.ਟੀ.ਓ. ਵਰਗੀਆਂ ਵਿਸ਼ਵਵਿਆਪੀ ਸੰਸਥਾਵਾਂ ਪ੍ਰਤੀ ਸਮੂਹਕ ਵਚਨਬੱਧਤਾ ਬਹਾਲ ਕਰਨਾ ਸ਼ਾਮਲ ਹੈ।
ਇਹ ਕੈਨੇਡਾ, ਅਮਰੀਕਾ ਅਤੇ ਮੈਕਸੀਕੋ ਦੀ ‘ਨੌਰਥ ਅਮਰੀਕਨ ਲੀਡਰਜ਼ ਸੱਮਿਟ’ ਨੂੰ ਮੁੜ ਜ਼ਿੰਦਾ ਕਰਨ ਵੱਲ ਵੀ ਸੰਕੇਤ ਕਰਦਾ ਹੈ।
ਇਸ ਦਸਤਾਵੇਜ਼ ਵਿੱਚ ਕੈਨੇਡਾ ਲਈ ਵੈਕਸੀਨ ਹਾਸਲ ਕਰਨਾ, ਚੀਨ ਦੀ ਹਿਰਾਸਤ ਤੋਂ ਮਾਈਕਲ ਸਪਾਵੋਰ ਅਤੇ ਮਾਈਕਲ ਕੋਵਰਿਗ ਨੂੰ ਛੁਡਾਉਣਾ ਜਾਂ ਬਾਇਡਨ ਦੇ ‘ਬਾਏ ਅਮਰੀਕਨ ਪਲਾਨ’ ਤੋਂ ਕੈਨੇਡਾ ਨੂੰ ਛੋਟ ਦੇਣ ਬਾਰੇ ਕੋਈ ਜ਼ਿਕਰ ਨਹੀਂ ਹੈ।
ਮਾਹਰ ਔਟਵਾ ਨੂੰ ਕੈਨੇਡਾ ਨੂੰ ਛੋਟ ਦੇ ਸੰਬੰਧ ਵਿੱਚ ਅਮਰੀਕਾ ’ਤੇ ਦਬਾਅ ਪਾਉਣ ਦੀ ਮੰਗ ਕਰ ਰਹੇ ਹਨ।
