ਪੀ., ਐੰਮ. ਟਰੂਡੋ ਦੇ ਸਕਦੇ ਹਨ ਕਿ ਕੁਝ ਚੀਜ਼ਾਂ ’ਤੇ ਜੀ.ਐਸ.ਟੀ. ਦੀ ਛੋਟ

ਕੈਨੇਡੀਅਨਾਂ ਨੂੰ ਕਿਸਮਿਸ ਦੀਆਂ ਛੁੱਟੀਆਂ ਤੋਂ ਪਹਿਲਾਂ ਗ੍ਰੋਸਰੀ ਤੋਂ ਲੈ ਕੇ ਕੁਝ ਚੀਜ਼ਾਂ ’ਤੇ ਜੀ.ਐਸ.ਟੀ. ਵਿਚ ਛੋਟ ਮਿਲਣ ਜਾ ਰਹੀ ਹੈ, ਜਿਸ ਦੀ ਘੋਸ਼ਣਾ ਅੱਜ ਹੋ ਸਕਦੀ ਹੈ। ਸੂਤਰਾਂ ਮੁਤਾਬਕ, ਇਸ ਵਿਚ ਚੀਜ਼ਾਂ ਦੀ ਇੱਕ ਲੰਮੀ ਸੂਚੀ ਸ਼ਾਮਲ ਕੀਤੀ ਗਈ ਹੈ, ਜਿਸ ਵਿਚ ਬੀਅਰ, ਸ਼ਰਾਬ ਅਤੇ ਬਣੇ-ਬਣਾਏ ਗਰਮ ਖਾਣਾ ਸਮੇਤ ਕੁਝ ਹੋਰ ਕਰਿਆਨੇ ਦੇ ਉਤਪਾਦ ਵੀ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਸਰਕਾਰ ਵਲੋਂ ਡਾਇਪਰ, ਬੱਚਿਆਂ ਦੇ ਕੱਪੜੇ, ਜੁੱਤੀਆਂ, ਬੱਚਿਆਂ ਦੀ ਕਾਰ ਸੀਟਾਂ ਅਤੇ ਖਿਡੌਣਿਆਂ ’ਤੇ ਵੀ ਜੀ.ਐਸ.ਟੀ. ਅਸਥਾਈ ਤੌਰ ’ਤੇ ਮੁਅੱਤਲ ਕੀਤਾ ਜਾਵੇਗਾ।

ਸੂਤਰਾਂ ਨੇ ਕਿਹਾ ਕਿ ਇਹ ਕਦਮ ਕੈਨੇਡੀਅਨ ਪਰਿਵਾਰਾਂ ਨੂੰ ਮਹਿੰਗਾਈ ਤੋਂ ਰਾਹਤ ਦੇਣ ਲਈ ਤਿਆਰ ਕੀਤੇ ਗਏ ਮਲਟੀ-ਬਿਲੀਅਨ-ਡਾਲਰ ਪੈਕੇਜ ਦਾ ਹਿੱਸਾ ਹੈ। ਲਿਬਰਲ ਸਰਕਾਰ ਬਸੰਤ ਵਿਚ ਇੱਕ ਨਿਸ਼ਚਿਤ ਆਮਦਨੀ ਬਰੈਕਟ ਤਹਿਤ ਕੁਝ ਕੈਨੇਡੀਅਨਾਂ ਨੂੰ ਚੈੱਕ ਵੀ ਭੇਜੇਗੀ।

ਇਹ ਦੋਵੇਂ ਕਦਮ ਇੱਕੋ ਬਿੱਲ ਵਿਚ ਸ਼ਾਮਲ ਕੀਤੇ ਗਏ ਹਨ। ਐੱਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਕਿਹਾ ਕਿ ਬੇੱਸ਼ਕ ਇਹ ਰਾਹਤ ਨਾਕਾਫ਼ੀ ਹੈ ਪਰ ਉਹ ਸਰਕਾਰ ਦੇ ਜੀ.ਐਸ.ਟੀ. ਪ੍ਰਸਤਾਵ ਦਾ ਸੰਸਦ ਵਿਚ ਸਮਰਥਨ ਕਰਨਗੇ ਕਿਉਂਕਿ ਕੈਨੇਡੀਅਨਾਂ ਨੂੰ ਮਹਿੰਗਾਈ ਤੋਂ ਤੁਰੰਤ ਰਾਹਤ ਦੀ ਲੋੜ ਹੈ।