13.71C Vancouver 13.71C VancouverJul 6, 2020 3:39 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਇਸ ਹਫਤੇ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਅਤੇ ਮੈਕਸੀਕੋ ਦੇ ਰਾਸ਼ਟਰਪਤੀ ਔਂਡਰੇ ਮੈਨਯੂਲ ਲੋਪੇਜ਼ ਔਬਰਾਡੋਰ ਦੇ ਨਾਲ ਬੈਠਕ ਵਿੱਚ ਸ਼ਾਮਲ ਨਹੀਂ ਹੋਣਗੇ।
ਟਰੂਡੋ ਦੇ ਦਫਤਰ ਮੁਤਾਬਕ ਉਹ ਦੋਵੇਂ ਦੇਸ਼ਾਂ ਅਤੇ ਉਨ੍ਹਾਂ ਦੇ ਆਗੂਆਂ ਨੂੰ ਸ਼ੁਭ ਇਛਾਵਾਂ ਭੇਜ ਰਹੇ ਹਨ ਪਰ ਕੈਬਿਨੇਟ ਰਿਟਰੀਟ ਅਤੇ ਪਾਰਲੀਮੈਂਟ ਵਿੱਚ ਨਿਰਧਾਰਤ ਬੈਠਕ ਵਿੱਚ ਸ਼ਮੂਲੀਅਤ ਲਈ ਔਟਵਾ ਹੀ ਰਹਿਣਗੇ।
ਲੋਪੇਜ਼ ਔਬਰਾਡੋਰ ਨਵੇਂ ਉੱਤਰੀ ਅਮਰੀਕੀ ਫ੍ਰੀ ਟ੍ਰੇਡ ਸਮਝੌਤੇ ਦੇ ਸੰਬੰਧ ਵਿੱਚ ਡੀ.ਸੀ. ਜਾ ਰਹੇ ਹਨ ਅਤੇ ਉਨ੍ਹਾਂ ਨੇ ਟਰੂਡੋ ਦੇ ਵੀ ਸ਼ਾਮਲ ਹੋਣ ਦੀ ਇੱਛਾ ਜਤਾਈ ਸੀ।
ਟਰੂਡੋ ਦੇ ਦਫਤਰ ਮੁਤਾਬਕ ਪ੍ਰਧਾਨ ਮੰਤਰੀ ਦੋਵੇਂ ਮੁਲਕਾਂ ਨਾਲ ਮਿਲਕੇ ਸਮਝੌਤੇ ਦੀ ਕਾਮਯਾਬੀ ਵਾਸਤੇ ਕੰਮ ਕਰਦੇ ਰਹਿਣਗੇ ਤਾਂ ਕਿ ਉੱਤਰੀ ਅਮਰੀਕਾ ਕੋਵਿਡ-19 ਮਹਾਂਮਾਰੀ ਤੋਂ ਬਾਅਦ ਮਜ਼ਬੂਤੀ ਨਾਲ ਉੱਭਰ ਸਕੇ।
ਪਿਛਲੇ ਹਫਤੇ ਜਦ ਟਰੂਡੋ ਨੂੰ ਬੈਠਕ ਵਿੱਚ ਸ਼ਾਮਲ ਹੋਣ ਬਾਰੇ ਪੁੱਛਿਆ ਗਿਆ ਸੀ ਤਾਂ ਉਨ੍ਹਾਂ ਨੇ ਰਿਟਰੀਟ ਅਤੇ ਪਾਰਲੀਮੈਂਟ ਦਾ ਜ਼ਿਕਰ ਨਹੀਂ ਸੀ ਕੀਤਾ।
ਉਸ ਵਕਤ ਉਨ੍ਹਾਂ ਵੱਲੋਂ ਐਲੂਮੀਨੀਅਮ ਉੱਤੇ ਟੈਰਿਫ ਬਾਰੇ ਅਮਰੀਕੀਆਂ ਦੇ ਤਾਜ਼ਾ ਪ੍ਰਤੀਕਰਮ ਬਾਰੇ ਚਿੰਤਾ ਜ਼ਰੂਰ ਜਤਾਈ ਗਈ ਸੀ।
ਉਨ੍ਹਾਂ ਨੇ ਹੋਰ ਮੁਲਕਾਂ ਵਿੱਚ ਕੋਵਿਡ-19 ਦੀ ਗੰਭੀਰਤਾ ਦਾ ਜ਼ਿਕਰ ਵੀ ਕੀਤਾ ਸੀ।
ਲੋਪੇਜ਼ ਔਬਰਾਡੋਰ ਦਾ ਵਾਸ਼ਿੰਗਟਨ ਦਾ ਫੇਰੀ ਤੋਂ ਪਹਿਲਾਂ ਟਰੂਡੋ ਨਾਲ ਫੋਨ ਜ਼ਰੀਏ ਗੱਲਬਾਤ ਕਰਨ ਦਾ ਅੰਦਾਜ਼ਾ ਹੈ।
