12.19C Vancouver 12.19C VancouverJan 27, 2025 5:52 PM - Connect Newsroom
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਮਾਰਚ ਵਿਚ ਅਹੁਦਾ ਛੱਡਣ ਤੋਂ ਪਹਿਲਾਂ ਸੈਨੇਟ ਵਿਚ 10 ਖਾਲੀ ਅਸਾਮੀਆਂ ਨੂੰ ਭਰਨ ਦੀ ਯੋਜਨਾ ਬਣਾ ਰਹੇ ਹਨ। ਇਸ ਕਦਮ ਨਾਲ ਆਉਣ ਵਾਲੇ ਸਾਲਾਂ ਤੱਕ ਸੰਸਦ 'ਤੇ ਉਨ੍ਹਾਂ ਦੀ ਛਾਪ ਰਹੇਗੀ ਕਿਉਂਕਿ ਸੈਨੇਟਰ ਇੱਕ ਵਾਰ ਨਿਯੁਕਤ ਹੋਣ ਤੋਂ ਬਾਅਦ ਉਦੋਂ ਤੱਕ ਸੇਵਾ ਵਿਚ ਰਹਿੰਦੇ ਹਨ ਜਦੋਂ ਤੱਕ ਉਨ੍ਹਾਂ ਦੀ ਉਮਰ 75 ਸਾਲ ਨਹੀਂ ਹੋ ਜਾਂਦੀ ਜਾਂ ਉਹ ਖੁਦ ਅਹੁਦਾ ਛੱਡਣ ਦਾ ਫੈਸਲਾ ਨਹੀਂ ਲੈਂਦੇ।
ਸੈਨੇਟ ਕੈਨੇਡੀਅਨ ਪਾਰਲੀਮੈਂਟ ਦਾ ਉਪਰਲਾ ਸਦਨ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਪ੍ਰਧਾਨ ਮੰਤਰੀ ਦੇ ਸਲਾਹਕਾਰ ਬੋਰਡ-ਸੈਨੇਟਰ ਦੀ ਨਿਯੁਕਤੀ ਲਈ ਕੰਮ ਕਰ ਰਿਹਾ ਹੈ ਅਤੇ ਟਰੂਡੋ ਦੇ ਜਾਣ ਤੋਂ ਪਹਿਲਾਂ ਇਸ ਪ੍ਰਕਿਰਿਆ ਨੂੰ ਪੂਰਾ ਕਰ ਲਿਆ ਜਾਵੇਗਾ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ 9 ਮਾਰਚ ਨੂੰ ਪਾਰਟੀ ਦਾ ਨਵਾਂ ਲੀਡਰ ਚੁਣੇ ਜਾਣ ਮਗਰੋਂ ਸਿਆਸਤ ਨੂੰ ਅਲਵਿਦਾ ਆਖਣਗੇ। ਉਥੇ ਹੀ,ਕੰਜ਼ਰਵੇਟਿਵ ਨੂੰ ਖਦਸ਼ਾ ਹੈ ਕਿ ਜੇ ਉਨ੍ਹਾਂ ਦੀ ਪਾਰਟੀ ਅਗਲੀਆਂ ਚੋਣਾਂ ਜਿੱਤਦੀ ਹੈ ਤਾਂ ਟਰੂਡੋ ਵਲੋਂ ਨਿਯੁਕਤ ਸੈਨੇਟਰ ਉਨ੍ਹਾਂ ਦੀ ਸਰਕਾਰ ਦੇ ਏਜੰਡੇ ਨੂੰ ਰੋਕਣ ਦੀ ਕੋਸ਼ਿਸ਼ ਕਰਨਗੇ।
ਗੌਰਤਲਬ ਹੈ ਕਿ ਜਦੋਂ ਟਰੂਡੋ ਨੇ 2015 ਵਿਚ ਸੱਤਾ ਸੰਭਾਲੀ ਸੀ ਤਾਂ ਸੈਨੇਟ ਵਿਚ 22 ਅਸਾਮੀਆਂ ਖਾਲੀ ਸਨ। ਹੁਣ ਤੱਕ ਉਹ ਕੁੱਲ 90 ਸੈਨੇਟਰ ਦੀ ਨਿਯੁਕਤੀ ਕਰ ਚੁੱਕੇ ਹਨ। ਰਿਟਾਇਰਮੈਂਟ ਕਾਰਨ ਹੁਣ 2 ਫਰਵਰੀ ਤੱਕ 10 ਅਸਾਮੀਆਂ ਭਰੀਆਂ ਜਾਣੀਆਂ ਹਨ।
