12.32C Vancouver 12.32C VancouverJun 15, 2021 3:38 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਯੂਰੋਪੀਅਨ ਯੂਨੀਅਨ ਦੇ ਆਗੂਆਂ ਨਾਲ ਬੈਠਕ ਖਤਮ ਹੋ ਗਈ ਹੈ ਅਤੇ ਅੱਜ ਉਨ੍ਹਾਂ ਨੇ ਆਪਣੀ ਅੰਤਰਰਾਸ਼ਟਰੀ ਫੇਰੀ ਦੇ ਆਖਰੀ ਦਿਨ ਬੈਲਜੀਅਮ ਵਿੱਚ ਸਥਿਤ ਫਾਈਜ਼ਰ ਬਾਇਓ ਐਨਟੈਕ ਦੀ ਮੈਨਿਊਫੈਕਚਰਿੰਗ ਫਸੀਲਿਟੀ ਦਾ ਦੌਰਾ ਕੀਤਾ।
ਟਰੂਡੋ ਨੇ ਇਸ ਮੌਕੇ ਓਥੇ ਕੰਮ ਕਰਦੇ ਮੁਲਾਜ਼ਮਾਂ ਦਾ ਧੰਨਵਾਦ ਕੀਤਾ।
ਇਸ ਫਸੀਲਿਟੀ ਤੋਂ ਕੈਨੇਡਾ ਨੂੰ ਵੱਡੀ ਗਿਣਤੀ ਵਿੱਚ ਕੋਵਿਡ-19 ਵੈਕਸੀਨ ਭੇਜੀਆਂ ਜਾਂਦੀਆਂ ਰਹੀਆਂ ਹਨ।
ਇਸ ਫਸੀਲਿਟੀ ਤੋਂ ਲਗਭਗ 11.6 ਮਿਲੀਅਨ ਟੀਕੇ ਪਿਛਲੇ ਦਸੰਬਰ ਮਨਜ਼ੂਰੀ ਮਿਲਣ ਤੋਂ ਬਾਅਦ ਕੈਨੇਡਾ ਭੇਜੇ ਗਏ ਸਨ।
ਇਸ ਮੌਕੇ ਅਧਿਕਾਰੀਆਂ ਨੇ ਟਰੂਡੋ ਨੂੰ ਉਹ ਫ੍ਰੀਜ਼ਰ ਦਿਖਾਏ ਜਿਥੇ ਟੀਕੇ ਸਟੋਰ ਕੀਤੇ ਜਾਂਦੇ ਹਨ ਅਤੇ ਫਿਰ ਉਨ੍ਹਾਂ ਇੱਕ ਵੱਖਰੀ ਪ੍ਰੋਡਕਸ਼ਨ ਲਾਈਨ ਦੇਖੀ ਜਿਥੇ ਖੁਰਾਕਾਂ ਡੱਬਿਆਂ ਵਿੱਚ ਬੰਦ ਕਰਕੇ ਵੱਖ ਵੱਖ ਥਾਵਾਂ ’ਤੇ ਭੇਜੀਆਂ ਜਾਂਦੀਆਂ ਹਨ।
ਅੱਜ ਯੂਰੋਪੀਅਨ ਨੇਤਾਵਾਂ ਨਾਲ ਇੱਕ ਸੰਮੇਲਨ ਤੋਂ ਬਾਅਦ, ਟਰੂਡੋ ਨੇ ਕਿਹਾ ਕਿ ਕੋਵਿਡ -19 ਵੈਕਸੀਨ ਦੇ ਪੇਟੈਂਟਾਂ ਦੇ ਨਿਯਮਾਂ ਕਾਰਨ ਦੁਨੀਆਂ ਭਰ ਦੇ ਲੋਕਾਂ ਨੂੰ ਜਲਦ ਤੋਂ ਜਲਦ ਟੀਕੇ ਉਪਲੱਭਦ ਕਰਵਾਉਣਾ ਗੁੰਝਲਦਾਰ ਮਸਲਾ ਹੈ।
ਪ੍ਰਧਾਨ ਮੰਤਰੀ ਮੁਤਾਬਕ ਇਹ ਅਜਿਹੀਆਂ ਮੁਸ਼ਕਲਾਂ ਹਨ ਜਿਨ੍ਹਾਂ ਨੂੰ ਸੁਲਝਾਉਣ ਦੀ ਲੋੜ ਹੈ।
ਕਨੇਡੀਅਨ ਸਰਕਾਰ ਨੇ ਪੁਸ਼ਟੀ ਕੀਤੀ ਹੈ ਕਿ ਵਿਸ਼ਵ ਵਪਾਰ ਸੰਗਠਨ ਦੀ ਟੀਕੇ ਦੇ ਪੇਟੈਂਟਾਂ ਸੰਬੰਧੀ ਗੱਲਬਾਤ ਵਿੱਚ ਕੈਨੇਡਾ ਸ਼ਾਮਲ ਹੈ ਪਰ ਟਰੂਡੋ ਨੇ ਇਸ ਸੰਬੰਧ ਵਿੱਚ ਫਿਲਹਾਲ ਕੋਈ ਬਿਆਨ ਨਹੀਂ ਦਿੱਤਾ ਹੈ।
