ਟਰੂਡੋ ਨੇ ਇਜ਼ਰਾਈਲ ਨੂੰ ਰਫਾਹ ਹਮਲੇ ਦੇ ‘ਵਿਨਾਸ਼ਕਾਰੀ’ ਨਤੀਜਿਆਂ ਬਾਰੇ ਦਿੱਤੀ ਚਿਤਾਵਨੀ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਇਜ਼ਰਾਇਲ ਨੂੰ ਦੱਖਣੀ ਗਾਜ਼ਾ ਦੇ ਰਫ਼ਾਹ ਇਲਾਕੇ ਵਿਚ ਫੌਜੀ ਹਮਲੇ ਦੇ ਵਿਨਾਸ਼ਕਾਰੀ ਨਤੀਜੇ ਹੋਣ ਦੀ ਚਿਤਾਵਨੀ ਦਿੱਤੀ ਹੈ। ਰਫ਼ਾਹ ਉਹ ਇਲਾਕਾ ਹੈ ਜਿੱਥੇ ਲਗਭਗ 1.5 ਮਿਲੀਅਨ ਫਲਸਤੀਨੀਆਂ ਨੇ ਬੰਬਾਰੀ ਤੋਂ ਬਚਣ ਲਈ ਸ਼ਰਨ ਲਈ ਹੈ। ਇੱਥੇ ਬਹੁਤ ਸਾਰੇ ਲੋਕ ਤੰਬੂ ਵਿਚ ਹਨ।

ਟਰੂਡੋ ਨੇ ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀਆਂ ਦੇ ਨਾਲ ਇੱਕ ਸਾਂਝੇ ਬਿਆਨ ਵਿਚ ਕਿਹਾ ਕਿ ਰਫ਼ਾਹ ਵਿਚ ਫੌਜੀ ਹਮਲੇ ਆਮ ਲੋਕਾਂ ਲਈ ਵਿਨਾਸ਼ਕਾਰੀ ਹੋਣਗੇ ਅਤੇ ਉਨ੍ਹਾਂ ਕੋਲ ਇਸ ਤੋਂ ਇਲਾਵਾ ਕਿਤੇ ਹੋਰ ਜਾਣ ਦਾ ਟਿਕਾਣਾ ਨਹੀਂ ਹੈ।

ਕੈਨੇਡਾ ਸਮੇਤ ਤਿੰਨੋਂ ਮੁਲਕਾਂ ਨੇ ਇਜ਼ਰਾਇਲ ਨੂੰ ਇਸ ਇਲਾਕੇ ਵਿਚ ਬੰਬਾਰੀ ਤੋਂ ਬਚਣ ਅਤੇ ਆਪਣੇ ਦੋਸਤਾਂ ਤੇ ਇੰਟਰਨੈਸ਼ਨਲ ਭਾਈਚਾਰੇ ਦੀ ਗੱਲ ਸੁਣਨ ਦੀ ਅਪੀਲ ਕੀਤੀ।

ਉਥੇ ਹੀ, ਕੈਨੇਡਾ ਦੌਰੇ ’ਤੇ ਪਹੁੰਚੇ ਜੋਰਡਨ ਦੇ ਰਾਜਾ ਨਾਲ ਮੁਲਾਕਾਤ ਦੌਰਾਨ ਵੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਗਾਜ਼ਾ ਦੀ ਮੌਜੂਦਾ ਸਥਿਤੀ ’ਤੇ ਚਿੰਤਾ ਪ੍ਰਗਟ ਕੀਤੀ। ਉਨ੍ਹਾਂ ਇਸ ਨੂੰ ਗੰਭੀਰ ਦੱਸਦਿਆਂ ਖੇਤਰ ਵਿਚ ਸਥਾਈ ਸ਼ਾਂਤੀ ਕਾਇਮ ਕਰਨ ਲਈ ਦੋ-ਮੁਲਕੀ ਹੱਲ ’ਤੇ ਜ਼ੋਰ ਦਿੱਤਾ।

ਗੌਰਤਲਬ ਹੈ ਕਿ ਇਜ਼ਰਾਇਲੀ ਫੌਜ ਨੇ ਗਾਜ਼ਾ ਦੇ ਨਾਸਿਰ ਹਸਪਤਾਲ ’ਤੇ ਰੇਡ ਕਰਦੇ ਹੋਏ 20 ਤੋਂ ਵੱਧ ਲੋਕ ਗ੍ਰਿਫਤਾਰ ਕੀਤੇ ਹਨ। ਰਫ਼ਾਹ ਸਿਟੀ ਇਸ ਹਸਪਤਾਲ ਤੋਂ ਮਹਿਜ 5 ਕਿਲੋਮੀਟਰ ਦੀ ਦੂਰੀ ’ਤੇ ਹੈ। ਇਸ ਵਿਚਕਾਰ ਰੈੱਡ ਕਰਾਸ ਨੇ ਯੂ.ਐਨ ਨੂੰ ਅਪੀਲ ਕੀਤੀ ਹੈ ਕਿ ਇਜ਼ਰਾਇਲ ਨੂੰ ਰਫ਼ਾਹ ਵਿਚ ਜ਼ਮੀਨੀ ਕਾਰਵਾਈਆਂ ਤੋਂ ਰੋਕਿਆ ਜਾਵੇ।