ਟਰੂਡੋ ਦੇ ਸਾਬਕਾ ਐੱਮ.ਪੀ. ਨੇ ਓਨਟਾਰੀਓ ਦੇ ਅਟਾਰਨੀ ਜਨਰਲ ’ਤੇ ਕੀਤਾ ਕੇਸ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਸਾਬਕਾ ਐੱਮ.ਪੀ. ਰਾਜ ਗਰੇਵਾਲ ਨੇ ਆਰ.ਸੀ.ਐੱਮ.ਪੀ. ਅਤੇ ਓਨਟਾਰੀਓ ਦੇ ਅਟਾਰਨੀ ਜਨਰਲ ’ਤੇ $50-ਮਿਲੀਅਨ ਦੇ ਹਰਜਾਨੇ ਲਈ ਕੇਸ ਕੀਤਾ ਹੈ।

ਉਨ੍ਹਾਂ ਇਹ ਕੇਸ ਪਿਛਲੇ ਸਾਲ ਓਨਟਾਰੀਓ ਦੀ ਕੋਰਟ ਵਲੋਂ ਉਨ੍ਹਾਂ ਨੂੰ ਵਿਸ਼ਵਾਸ ਦੀ ਉਲੰਘਣਾ ਦੇ ਉਨ੍ਹਾਂ ਦੋ ਦੋਸ਼ਾਂ ਤੋਂ ਬਰੀ ਕੀਤੇ ਜਾਣ ਦੇ ਸਬੰਧ ਵਿਚ ਕੀਤਾ ਹੈ, ਜਿਸ ਵਿਚ ਉਨ੍ਹਾਂ ’ਤੇ ਸਿਆਸੀ ਅਹੁਦੇ ਦੀ ਦੁਰਵਰਤੋਂ ਕਰਨ ਦੇ ਚਾਰਜ ਲੱਗੇ ਸਨ।

ਗਰੇਵਾਲ ’ਤੇ ਦੋਸ਼ ਸਨ ਕਿ ਜੂਏ ਵਿਚ ਹੋਏ ਨੁਕਸਾਨ ਨੂੰ ਪੂਰਾ ਕਰਨ ਲਈ ਉਨ੍ਹਾਂ ਨੇ ਇਮੀਗ੍ਰੇਸ਼ਨ ਫਾਈਲਾਂ ’ਤੇ ਕੰਮ ਕਰਾਉਣ ਅਤੇ ਟਰੂਡੋ ਦੀ 2018 ਦੀ ਭਾਰਤ ਯਾਤਰਾ ਦੌਰਾਨ ਬਰੈਂਪਟਨ-ਇਲਾਕੇ ਦੇ ਦੋ ਕਾਰੋਬਾਰੀਆਂ ਨੂੰ ਪ੍ਰਧਾਨ ਮੰਤਰੀ ਦੇ ਪ੍ਰੋਗਰਾਮ ਵਿਚ ਸ਼ਾਮਲ ਕਰਵਾਉਣ ਲਈ ਪੈਸੇ ਲਏ ਸਨ।

ਓਨਟਾਰੀਓ ਦੀ ਸੁਪੀਰੀਅਰ ਕੋਰਟ ਨੇ ਪਿਛਲੇ ਸਾਲ ਮਾਰਚ ਵਿਚ ਵਿਸ਼ਵਾਸ ਦੀ ਉਲੰਘਣਾ ਦੇ ਦੋਵਾਂ ਦੋਸ਼ਾਂ ਨੂੰ ਖਾਰਜ ਕਰ ਦਿੱਤਾ ਸੀ। ਗਰੇਵਾਲ ਦਾ ਕਹਿਣਾ ਹੈ ਕਿ ਇਨ੍ਹਾਂ ਦੋਸ਼ਾਂ ਦੇ ਚੱਲਦੇ ਉਨ੍ਹਾਂ ਨੂੰ ਸਮਾਜਿਕ ਕਲੰਕ ਨਾਲ ਜਿਉਣ ਲਈ ਮਜਬੂਰ ਕੀਤਾ ਗਿਆ ਅਤੇ ਉਸ ਦੇ ਉਭਰਦੇ ਸਿਆਸੀ ਕਰੀਅਰ ਨੂੰ ਨਾ ਪੂਰਾ ਹੋਣ ਵਾਲਾ ਨੁਕਸਾਨ ਹੋਇਆ।

ਨਾਲ ਹੀ ਵਪਾਰਕ ਅਤੇ ਨਿੱਜੀ ਜਾਇਦਾਦ ਖਰੀਦਣ ਲਈ ਵਿੱਤੀ ਗਤੀਵਿਧੀਆਂ ਪ੍ਰਾਪਤ ਕਰਨ ਵਿਚ ਮੁਸ਼ਕਲ ਹੋਈ। ਗਰੇਵਾਲ ਨੇ ਆਰ. ਸੀ. ਐੱਮਪੀ. ਤੋਂ 25.6 ਮਿਲੀਅਨ ਡਾਲਰ ਹਰਜਾਨੇ ਦੀ ਮੰਗ ਕੀਤੀ ਹੈ।