ਅਮਰੀਕਾ ਦੇ ਆਗਾਮੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਹੁਣ ਯੂਰੋਪੀ ਸੰਘ ਨੂੰ ਦਿੱਤੀ ਧਮਕੀ

ਅਮਰੀਕਾ ਦੇ ਆਗਾਮੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਹੁਣ ਯੂਰੋਪੀ ਸੰਘ ਨੂੰ ਧਮਕੀ ਦਿੱਤੀ ਹੈ ਕਿ ਜੇ ਉਹ ਅਮਰੀਕਾ ਨਾਲ ਵਪਾਰ ਘਾਟਾ ਘੱਟ ਕਰਨ ਲਈ ਉਸ ਤੋਂ ਵੱਡੇ ਪੱਧਰ ’ਤੇ ਤੇਲ ਅਤੇ ਗੈਸ ਨਹੀਂ ਖਰੀਦਦਾ ਤਾਂ ਉਸ ਨੂੰ ਟੈਰਿਫ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਟਰੰਪ ਨੇ ਇਹ ਧਮਕੀ ਉਦੋਂ ਦਿੱਤੀ ਹੈ ਜਦੋਂ ਅਮਰੀਕਾ ਸਰਕਾਰ ਦੇ ਹੀ ਅੰਕੜਿਆਂ ਅਨੁਸਾਰ, ਯੂਰਪੀ ਸੰਘ ਪਹਿਲਾਂ ਤੋਂ ਹੀ ਅਮਰੀਕਨ ਤੇਲ ਅਤੇ ਗੈਸ ਨਿਰਯਾਤ ਦਾ ਵੱਡਾ ਹਿੱਸਾ ਖਰੀਦ ਰਿਹਾ ਹੈ।

ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫੋਰਮ ਟਰੁੱਥ ਸੋਸ਼ਲ ’ਤੇ ਇੱਕ ਪੋਸਟ ਵਿਚ ਕਿਹਾ ਕਿ ਮੈਂ ਯੂਰਪੀ ਸੰਘ ਨੂੰ ਕਿਹਾ ਹੈ ਕਿ ਉਨ੍ਹਾਂ ਨੂੰ ਅਮਰੀਕਾ ਨਾਲ ਭਾਰੀ ਘਾਟੇ ਦੀ ਪੂਰਤੀ ਸਾਡੇ ਤੇਲ ਅਤੇ ਗੈਸ ਦੀ ਵੱਡੇ ਪੈਮਾਨੇ ’ਤੇ ਖਰੀਦ ਕਰਕੇ ਕਰਨੀ ਹੋਵੇਗੀ, ਨਹੀਂ ਤਾਂ ਇਸ ਦਾ ਹੱਲ ਹਰ ਮਾਲ ’ਤੇ ਟੈਰਿਫ ਹੈ।

ਅਮਰੀਕਾ ਦਾ ਯੂਰਪੀਅਨ ਯੂਨੀਅਨ ਨਾਲ ਪਿਛਲੇ ਸਾਲ $161.9-ਬਿਲੀਅਨ ਦਾ ਵਪਾਰ ਘਾਟਾ ਸੀ। 20 ਜਨਵਰੀ ਨੂੰ ਅਹੁਦਾ ਸੰਭਾਲਦੇ ਹੀ ਉਹ ਕੈਨੇਡਾ, ਮੈਕਸੀਕੋ ਅਤੇ ਚੀਨ ’ਤੇ ਭਾਰੀ ਟੈਰਿਫ ਲਗਾਉਣ ਦਾ ਪਹਿਲਾਂ ਹੀ ਐਲਾਨ ਕਰ ਚੁੱਕੇ ਹਨ।