15.46C Vancouver 15.46C VancouverAug 8, 2022 7:30 PM - The Canadian Press
ਐਬਟਸਫੋਰਡ 'ਚ ਪੁਲਿਸ ਵੱਲੋਂ ਵਾਹਨ ਦਾ ਪਿੱਛਾ ਕੀਤੇ ਜਾਣ ਦੀ ਘਟਨਾ ਦੌਰਾਨ ਵਾਪਰੇ ਕਰੈਸ਼ ਵਿੱਚ 2 ਲੋਕਾਂ ਦੀ ਮੌਤ ਹੋ ਗਈ ਹੈ।
ਮਾਮਲੇ ਦੀ ਜਾਂਚ ਬੀ.ਸੀ. ਦੇ ਇੰਡੀਪੈਂਡੈਂਟ ਇਨਵੈਸਟੀਗੇਸ਼ਨਸ ਆਫਿਸ ਯਾਨੀ ਕਿ ਆਈ.ਆਈ.ਓ. ਵੱਲੋਂ ਕੀਤੀ ਜਾ ਰਹੀ ਹੈ।
ਪੁਲਿਸ ਅਨੁਸਾਰ ਘਟਨਾ ਦੀ ਸ਼ੁਰੂਆਤ ਐਤਵਾਰ ਦੁਪਹਿਰ ਕਰੀਬ 3 ਵਜੇ ਹੋਈ ਸੀ।
ਅਫਸਰਾਂ ਨੇ ਕਥਿਤ ਤੌਰ 'ਤੇ ਇੱਕ ਚੋਰੀ ਦਾ ਚਿੱਟੇ ਰੰਗ ਦਾ ਐਕੁਰਾ ਇੰਟੈਗਰਾ ਵਾਹਨ ਲਿਵਿੰਗਸਟਨ ਐਵੀਨਿਊ ਅਤੇ ਮੈਕਲਿਓਰ ਰੋਡ ਦੇ ਇਲਾਕੇ 'ਚ ਵੇਖਿਆ ਸੀ।
ਪਰ ਜਲਦੀ ਹੀ ਪੁਲਿਸ ਇਸ ਵਾਹਨ 'ਤੇ ਨਜਰ ਰੱਖਣ 'ਚ ਨਾਕਾਮ ਰਹੀ ਸੀ ਅਤੇ ਵਾਹਨ ਦਾ ਪਿੱਛਾ ਨਹੀਂ ਕੀਤਾ ਗਿਆ।
ਪੁਲਿਸ ਅਨੁਸਾਰ ਕਰੀਬ ਇੱਕ ਘੰਟੇ ਬਾਅਦ ਇਹ ਵਾਹਨ ਫਿਰ ਤੋਂ ਹਿਲਕਰੈਸਟ ਐਵੀਨਿਊ ਅਤੇ ਐਮਰਸਨ ਸਟ੍ਰੀਟ ਕੋਲ ਵਿਖਾਈ ਦਿੱਤਾ।
ਸਾਰਜੈਂਟ ਪੌਲ ਵਾਕਰ ਦਾ ਕਹਿਣਾ ਸੀ ਕਿ ਇਸ ਵਾਹਨ ਨਾਲ ਪੁਲਿਸ ਦੇ ਵਾਹਨ ਦਾ ਕੰਟੈਕਟ ਹੋਇਆ ਸੀ ਅਤੇ ਇੱਕ ਹੋਰ ਜਿਉਰਿਸਡਿਕਸ਼ਨ 'ਚ ਇਸ ਵਾਹਨ ਦੀ ਵਰਤੋਂ ਇੱਕ ਕਥਿਤ ਅਪਰਾਧਿਕ ਗਤੀਵਿਧੀ 'ਚ ਹੋਣ ਕਾਰਨ ਇਸ ਦਾ ਪਿੱਛਾ ਕਰਨ ਦਾ ਫੈਸਲਾ ਲਿਆ ਗਿਆ।
ਪੁਲਿਸ ਨੇ ਅਪਰਾਧਿਕ ਕਾਰਵਾਈ ਸੰਬੰਧੀ ਵੇਰਵੇ ਸਾਂਝੇ ਨਹੀਂ ਕੀਤੇ।
ਪੁਲਿਸ ਦੇ ਪਿੱਛਾ ਕਰਨ ਦੌਰਾਨ ਇਹ ਵਾਹਨ ਨਿਯੰਤਰਣ ਗਵਾ ਬੈਠਾ ਅਤੇ ਮੈਕਲਿਓਰ ਰੋਡ ਅਤੇ ਕਲੀਅਰਬਰੁਕ ਰੋਡ ਕੋਲ ਕਰੈਸ਼ ਕਰ ਗਿਆ।
ਪੁਲਿਸ ਅਨੁਸਾਰ ਪਸੈਂਜਰ ਸੀਟ 'ਤੇ ਬੈਠੀ ਔਰਤ ਨੇ ਮੌਕੇ 'ਤੇ ਹੀ ਜਾਨ ਗਵਾ ਦਿੱਤੀ ਜਦਕਿ ਵਾਹਨ ਚਾਲਕ ਨੇ ਹਸਪਤਾਲ 'ਚ ਦਮ ਤੋੜ ਦਿੱਤਾ।
ਇੱਕ ਪੁਲਿਸ ਵਾਹਨ ਨੂੰ ਵੀ ਨੁਕਸਾਨ ਪਹੁੰਚਿਆ।
ਮਾਮਲੇ 'ਚ ਐਬਟਸਫੋਰਡ ਪੁਲਿਸ ਦੇ ਮੇਜਰ ਕਰਾਈਮ ਯੂਨਿਟ ਅਤੇ ਇੰਟੈਗ੍ਰੇਟਿਡ ਕੌਲੀਜਨ ਅਨੈਲੀਸਿਸ ਰੀਕੰਸਟ੍ਰਕਸ਼ਨ ਸਰਵਿਸ ਵੱਲੋਂ ਵੀ ਜਾਂਚ ਕੀਤੀ ਜਾ ਰਹੀ ਹੈ।
