ਓਨਟਾਰੀਓ ਦੀ ਪੀਲ ਪੁਲੀਸ ਨੇ ਹਥਿਆਰ ਅਤੇ ਡਰੱਗਜ਼ ਦੇ ਮਾਮਲੇ ਵਿਚ ਪੰਜ ਲੋਕਾਂ ਨੂੰ ਕੀਤਾ ਗ੍ਰਿਫਤਾਰ

ਓਨਟਾਰੀਓ ਦੀ ਪੀਲ ਪੁਲੀਸ ਨੇ ਇੱਕ ਔਰਤ ਤੇ ਤਿੰਨ ਪੰਜਾਬੀਆਂ ਸਮੇਤ ਪੰਜ ਲੋਕਾਂ ਨੂੰ ਹਥਿਆਰ ਅਤੇ ਡਰੱਗਜ਼ ਦੇ ਮਾਮਲੇ ਵਿਚ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ 1 ਜੂਨ ਨੂੰ ਸ਼ੱਕ ਦੇ ਆਧਾਰ ’ਤੇ ਬਰੈਂਪਟਨ ਵਿਚ ਇੱਕ ਘਰ ਦੀ ਸਰਚ ਵਾਰੰਟ 'ਤੇ ਲਈ ਗਈ ਤਾਲਾਸ਼ੀ ਮੌਕੇ ਉਥੋਂ 2 ਅਰਧ-ਆਟੋਮੈਟਿਕ ਹੈਂਡਗੰਨ, ਸ਼ੱਕੀ ਫੈਂਟਾਨਿਲ ਤੇ ਕੋਕੀਨ ਸਮੇਤ ਨਸ਼ਿਆਂ ਦੀ ਖੇਪ ਅਤੇ $30,000 ਕੈਸ਼ ਦੀ ਜ਼ਬਤੀ ਕੀਤੀ ਗਈ।

ਇਸ ਦੌਰਾਨ ਕਈ ਨੌਜਵਾਨ ਗ੍ਰਿਫਤਾਰ ਕੀਤੇ ਗਏ। ਹਿਰਾਸਤ ਵਿਚ ਲਏ ਗਏ ਪੰਜਾਬੀਆਂ ਦੀ ਪਛਾਣ 27 ਸਾਲਾ ਕਰਨ ਔਜਲਾ, 24 ਸਾਲਾ ਹਰਵੀਰ ਬੈਂਸ, 24 ਸਾਲਾ ਜਸਮੀਤ ਹਰਸ਼ ਅਤੇ 27 ਸਾਲਾ ਔਰਤ ਨੋਮਨਾ ਦਾਊਦ ਵਜੋਂ ਹੋਈ ਹੈ। ਇਹ ਸਾਰੇ ਬਰੈਂਪਟਨ ਦੇ ਰਹਿਣ ਵਾਲੇ ਹਨ।

ਪੰਜਵਾਂ ਗ੍ਰਿਫਤਾਰ ਕੀਤਾ ਗਿਆ 23 ਸਾਲਾ ਨੌਜਵਾਨ ਐਲੇਕਸ ਪਰਮੌਲ ਹੈ ਜੋ ਕਿ ਨਾਰਥ ਯਾਰਕ ਦਾ ਨਿਵਾਸੀ ਹੈ। ਪੀਲ ਪੁਲਿਸ ਵਲੋਂ ਇਨ੍ਹਾਂ 'ਤੇ ਹਥਿਆਰ ਅਤੇ ਨਸ਼ਾ ਤਸਕਰੀ ਨਾਲ ਸਬੰਧਤ ਚਾਰਜਿਜ਼ ਲਗਾਏ ਗਏ ਹਨ।