12.42C Vancouver 12.42C VancouverJun 25, 2021 3:36 PM -
ਗੋਰੇ ਰਾਸ਼ਟਰਵਾਦੀ ਹਿੰਸਾ ਦੇ ਵਾਧੇ ਦਾ ਮੁਕਾਬਲਾ ਕਰਨ ਦੀ ਕੋਸ਼ਿਸ਼ ਅਧੀਨ ਟਰੂਡੋ ਸਰਕਾਰ ਵਲੋਂ ਆਪਣੀ ਅੱਤਵਾਦੀ ਸੰਸਥਾਵਾਂ ਦੀ ਸੂਚੀ ਵਿੱਚ ਦੋ ਹੋਰ ਅਤਿਅੰਤ ਸੱਜੇਪੱਖੀ ਸਮੂਹਾਂ ਅਤੇ ਇੱਕ ਅਮਰੀਕੀ ਨਿਓ-ਨਾਜ਼ੀ ਨੂੰ ਸ਼ਾਮਲ ਕੀਤਾ ਗਿਆ ਹੈ।
ਜਨਤਕ ਸੁਰੱਖਿਆ ਮੰਤਰੀ ਬਿਲ ਬਲੇਅਰ ਨੇ ਅੱਜ ਘੋਸ਼ਣਾ ਕੀਤੀ ਕਿ ‘ਥ੍ਰੀ ਪਰਸੇਂਟਰਜ਼’ ਅਤੇ ‘ਆਰੀਅਨ ਸਟ੍ਰਾਈਕਫੋਰਸ’ ਪਰਾਊਡ ਬੁਆਏਜ਼ ਦੇ ਨਾਲ ਇਸ ਸੂਚੀ ਵਿੱਚ ਸ਼ਾਮਲ ਹੋਣਗੇ, ਜਿਨ੍ਹਾਂ ਨੂੰ ਫਰਵਰੀ ਵਿੱਚ 6 ਜਨਵਰੀ ਨੂੰ ਵਾਸ਼ਿੰਗਟਨ ਦੀ ਕੈਪੀਟਲ ਹਿੱਲ ਵਿੱਚ ਦਾਖ਼ਲ ਹੋਣ ਤੋਂ ਬਾਅਦ ਸ਼ਾਮਲ ਕੀਤਾ ਗਿਆ ਸੀ।
‘ਥ੍ਰੀ ਪਰਸੇਂਟਰਜ਼’ ਦੇ ਮੈਂਬਰਾਂ ਦਾ ਨਾਂ ਮਿਸ਼ੀਗਨ ਦੇ ਗਵਰਨਰ ਨੂੰ ਅਗਵਾ ਕਰਨ ਦੀ ਸਾਜਿਸ਼ ਨਾਲ ਜੁੜਿਆ ਹੋਇਆ ਹੈ, ਅਤੇ ਸੀਨੀਅਰ ਖੁਫੀਆ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕਨੇਡੀਅਨ ਚੈਪਟਰਜ਼ ਵਲੋਂ ਐਲਬਰਟਾ ਅਤੇ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਸਿਖਲਾਈ ਦੀਆਂ ਗਤੀਵਿਧੀਆਂ ਕੀਤੀਆਂ ਗਈਆਂ ਹਨ।
77 ਦੀ ਸੂਚੀ ਵਿੱਚ ਜੇਮਜ਼ ਮੇਸਨ ਨਾਮੀ ਇੱਕ 69 ਸਾਲਾ ‘ਵ੍ਹਾਈਟ ਸੁਪ੍ਰੇਮਿਸਟ’ ਵੀ ਸ਼ਾਮਲ ਹੈ, ਜਿਸ ਨੂੰ ਅਧਿਕਾਰੀ ਨਿਓ-ਨਾਜ਼ੀ ਮੰਨਦੇ ਹਨ ਅਤੇ ਜੋ ਅਮਰੀਕਾ ਵਿੱਚ ਅੱਤਵਾਦੀ ਸਮੂਹਾਂ ਦੀਆਂ ਕਾਰਵਾਈਆਂ ਨਾਲ ਜੁੜਿਆ ਹੋਇਆ ਹੈ।
ਅਮਰੀਕਾ ਉੱਤੇ 9/11 ਦੇ ਹਮਲਿਆਂ ਤੋਂ ਬਾਅਦ ਕੈਨੇਡਾ ਵਲੋਂ ਤਿਆਰ ਕੀਤੀ ਗਈ ਅੱਤਵਾਦ ਨਾਲ ਸੰਬੰਧਤ ਸੂਚੀ ਵਿੱਚ ਸ਼ਾਮਲ ਸਮੂਹਾਂ ਦੀਆਂ ਜਾਇਦਾਦਾਂ ਜ਼ਬਤ ਹੋ ਸਕਦੀਆਂ ਹਨ ਅਤੇ ਕੱਟੜਪੰਥੀ ਗਤੀਵਿਧੀਆਂ ਕਰਨ ਵਿੱਚ ਸਹਾਇਤਾ ਕਰਨ ਲਈ ਗੰਭੀਰ ਅਪਰਾਧਕ ਜੁਰਮਾਨੇ ਹੋ ਸਕਦੇ ਹਨ।
