ਕੈਲਗਰੀ ਦੇ ਇਕ ਘਰ 'ਚ ਅੱਗ ਲੱਗਣ ਕਾਰਨ ਪੰਜਾਬੀ ਪਿਓ ਧੀ ਦੀ ਮੌਤ

ਕੈਲਗਰੀ ਦੇ ਟੈਰਾਡੇਲ ਇਲਾਕੇ ਵਿਚ ਬੀਤੇ ਦਿਨ ਪੰਜਾਬੀ ਪਰਿਵਾਰ ਨਾਲ ਸਬੰਧਤ ਘਰ ਵਿਚ ਅੱਗ ਲੱਗਣ ਨਾਲ ਪਿਓ-ਧੀ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਦੀ ਪਛਾਣ 50 ਸਾਲਾ ਸੰਨੀ ਗਿੱਲ ਅਤੇ ਉਨ੍ਹਾਂ ਦੀ 9 ਸਾਲਾ ਮਾਸੂਮ ਧੀ ਹਰਗੁਣ ਗਿੱਲ ਵਜੋਂ ਹੋਈ।

ਐਮਰਜੈਂਸੀ ਅਮਲੇ ਨੂੰ ਟੈਰਾਡੇਲ ਕਮਿਊਨਿਟੀ ਦੇ ਟੈਰਾਲੇਕ ਵੇਅ ਨੌਰਥ ਵੈਸਟ ਦੇ 100 ਬਲਾਕ ਵਿਚ ਵੀਰਵਾਰ ਤੜਕੇ ਕਰੀਬ 1.30 ਵਜੇ ਅੱਗ ਦੀ ਸੂਚਨਾ ਮਿਲੀ ਸੀ। ਦੋ ਮੰਜ਼ਲਾਂ ਘਰ ਵਿਚ ਅੱਗ ਲੱਗਣ ਸਮੇਂ 6 ਪਰਿਵਾਰਕ ਮੈਂਬਰ ਸਨ,ਬੱਚੀ ਦੀ ਮਾਂ ਸੁਖਜੀਤ ਗਿੱਲ ਅਤੇ 17 ਸਾਲਾ ਭਰਾ ਰੋਹਨਪ੍ਰੀਤ ਗਿੱਲ ਇਸ ਸਮੇਂ ਹਸਪਤਾਲ ਵਿਚ ਹਨ। ਉਹ ਦੋਵੇਂ ਦੂਜੀ ਮੰਜ਼ਿਲ 'ਤੇ ਸਨ ਅਤੇ ਖਿੜਕੀ ਤੋੜ ਕੇ ਘਰ ਦੇ ਬਾਹਰਲੇ ਪਾਸੇ ਆਉਣ ਵਿਚ ਸਫਲ ਰਹੇ ਸਨ, ਜਿੱਥੋਂ ਫਾਇਰ ਫਾਈਟਰਜ਼ ਨੇ ਉਨ੍ਹਾਂ ਨੂੰ ਰੈਸਕਿਊ ਕੀਤਾ।

ਘਰ ਵਿਚ ਮੌਜੂਦ ਦੋ ਹੋਰ ਪਰਿਵਾਰ ਮੈਂਬਰ ਬੇਸਮੈਂਟ ਵਿਚ ਸਨ ਜੋ ਸੁਰੱਖਿਅਤ ਬਾਹਰ ਨਿਕਲਣ ਵਿਚ ਸਫਲ ਰਹੇ,ਜਦੋਂ ਕਿ ਸੰਨੀ ਗਿੱਲ ਦੀ ਅੰਦਰ ਹੀ ਮੌਤ ਹੋ ਗਈ ਅਤੇ ਗੰਭੀਰ ਜ਼ਖਮੀ ਹਰਗੁਣ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿਥੇ ਉਸ ਨੇ ਦਮ ਤੋੜ ਦਿੱਤਾ। ਸ਼ੁਰੂਆਤੀ ਜਾਂਚ ਵਿਚ ਪੁਲਿਸ ਨੇ ਇਸ ਨੂੰ ਗੈਰ-ਅਪਰਾਧਿਕ ਮਾਮਲਾ ਦੱਸਿਆ ਹੈ ਅਤੇ ਜਾਂਚ ਜਾਰੀ ਹੈ।